សែលកាតសហការស្ថាប័នសហគ្រាសសង្គម គាំទ្រសហគ្រិនកម្ពុជា

2015-05-22 21:32:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្សិលមិញក្រុមហ៊ុនទូរសព្ទចល័តសែលកាត បានចុះកិច្ចព្រមព្រៀងជាមួយសហគ្រាសសង្គមកម្ពុជា (Social Enterprise Cambodia) លើភាពជាដៃគូ ដើម្បីផ្ដល់ប្រយោជន៍និងនាំភាពរីកចម្រើនដល់ការអភិវឌ្ឍសហគ្រិនកម្ពុជា។

លោក Laszlo Barta នាយកការិយាល័យពាណិជ្ជកម្មក្រុមហ៊ុនសែលកាត បានឲ្យដឹងថា ការសហការភាពជាដៃគូនេះ នឹងជួយគាំទ្រដល់សហគ្រិនកម្ពុជាក្នុងការសម្រេចបានភាពរីកចម្រើន ដោយផ្តល់ការគាំទ្របន្ថែមទៀតដល់សហគ្រិនកម្ពុជា ក្នុងការបង្កើតបានសហគ្រាសផ្ទាល់ខ្លួនពិតប្រាកដ។

ក្នុងឱកាសនោះដែរ លោក Alberto Creminesi ស្ថាបនិក សហគ្រាសសង្គមកម្ពុជា បានឲ្យដឹងដែរថា កិច្ចសហប្រតិបត្តិការជាមួយសែលកាត នឹងជំរុញឱកាសបង្កើតបណ្តាញទំនាក់ទំនងការងារដល់សមាជិក ដើម្បីឲ្យពួកគេអាចសម្រេចគម្រោងការសង្គមជាលក្ខណៈផ្ទាល់ខ្លួន។

លោកថា សហគ្រាសសង្គមកម្ពុជា បច្ចុប្បន្នកំពុងស្ថិតនៅក្នុងដំណើរការបើកដាក់ឲ្យប្រើប្រាស់កម្មវិធី Impact Hub ក្នុងរាជធានីភ្នំពេញ ដើម្បីឲ្យសហគ្រិនវ័យក្មេងកម្ពុជាមានឱកាសសិក្សាពីសហគ្រិនដទៃទៀតទូទាំងសាកលលោក។

សហគ្រាសសង្គមកម្ពុជាជាអង្គភាពឯករាជ្យមួយដែលបានខិតខំប្រឹងប្រែងក្នុងការលើកស្ទួយសហគ្រិនភាពសង្គមលើប្រទេសកម្ពុជា។ សហគ្រិនសង្គមកម្ពុជានឹងរៀបចំពិព័រណ៍សហគ្រាសសង្គមរយៈពេល ២ ថ្ងៃក្នុងសប្ដាហ៍នេះពីថ្ងៃ ២២ និង ២៣ នៅហាងកាហ្វេ Joma Bakery លើវិថីព្រះនរោត្តម ហើយប្រិយមិត្តអាចសិក្សាស្វែងយល់ពីវាគ្មិននានា។

សម្រាប់ព័ត៌មានបន្ថែម សហគ្រាសសង្គមកម្ពុជា (Social Enterprise Cambodia) និង ពិព័រណ៍សហគ្រាសសង្គម (Social Enterprise Fair) ដែលគ្រោងធ្វើឡើងក្នុងសប្ដាហ៍នេះ ដោយ ចុចត្រង់នេះ..

ចុចអាន៖ និស្សិតខ្មែរមួយរូបចែករំលែកបទពិសោធន៍ការសិក្សាអាហារូបករណ៍នៅថៃ

អត្ថបទ៖ ដារ៉ាឆានី