តារាល្បីៗទាំងពីរដួងរបស់សិង្ហបុរី ហូរទឹកភ្នែកក្នុងបេសកកម្មមនុស្សធម៌នៅកំពង់ចាម

2015-05-27 16:31:50
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាល្បីទាំងពីរដួងរបស់ប្រទេសសិង្ហបុរីគឺ Elvin Ng និងអ្នកនាង Zoe Tay ហៅ បូបូ បានជួបរឿងរន្ធត់ចិត្តរហូតដល់ហូរទឹកភ្នែក ក្នុងបេសកកម្មមនុស្សធម៌ដែលជាបេសកកម្មទី៣របស់ខ្លួននៅខេត្តកំពង់ចាម សម្រាប់ដំណើរមកកម្ពុជានាពេលថ្មីៗនេះ។ នេះបើតាមលោក សុខ គង់ តំណាងក្រុមហ៊ុនទូរទស្សន៍ខ្សែកាប PPCTV។

តំណាងក្រុមហ៊ុនរូបនេះ បានរៀបរាប់ឲ្យដឹងថា កាលពីថ្មីៗនេះ Elvin Ng និងអ្នកនាង Zoe Tay ហៅ បូបូ បាននាំយកជំនួយ និងមូលនិធិសប្បុរសធម៌របស់ក្រុមហ៊ុន PPCTV និង Media Corp. ទៅផ្ដល់ជូនកុមារកំព្រារស់នៅក្នុងអង្គការ AFESIP នៅខេត្តកំពង់ចាម ដោយមានតារាល្បីៗជាច្រើនដួងរបស់កម្ពុជា រួមដំណើរទៅជាមួយផង។

នៅទីនោះ ពួកគេបានស្ដាប់ការច្រៀងរៀបរាប់ពីខ្សែជីវិតជូរចត់របស់ប្អូនៗកុមារក្នុងអង្គការ AFESIP ដែលជួបរឿងជូរចត់ និងកម្សត់ជាច្រើន ពេលនោះហើយ Elvin និង Zoe Tay ក៏ស្រក់ទឹកភ្នែកព្រមគ្នាយំតែម្ដង។ ជាមួយគ្នានោះ អ្នកផ្សេងទៀតដែលរួមដំណើរ ក៏រំជួលចិត្តរហូតដល់ស្រក់ទឹកភ្នែកមិនដឹងខ្លួនដូចគ្នាដែរ។ សុខ គង់ ថ្លែង។

លោក បន្តថា "ពួកគេនឹកមិនដល់ថា ប្អូនៗកុមារទាំងនោះ មានរឿងកម្សត់យ៉ាងនេះ ហើយពួកគេបានរត់ទៅឱបប្អូនៗកុមារ និងនិយាយលើកទឹកចិត្តពួកគេកុំឲ្យអស់សង្ឃឹមក្នុងជីវិត តែផ្ទុយទៅវិញ ត្រូវខិតខំរៀនសូត្រដើម្បីកែប្រែជីវិត ក៏ដូចជាជោគវាសនារបស់ខ្លួន"។

សកម្មភាព Elvin Ng និង Zoe Tay នៅអង្គការ AFESIP នាខេត្តកំពង់ចាម(រូបភាពពី PPCTV)

ក្នុងបេសកកម្មមនុស្សធម៌ខាងលើ Elvin និង Zoe Tay បាននាំយកអំណោយ និងមូលនិធិសប្បុរសធម៌ជាគ្រឿងឧបភោគ បរិភោគ សម្ភារសិក្សា និងប្រើប្រាស់មួយចំនួន គិតជាទឹកប្រាក់ស្មើនឹង ២៨៨៨ដុល្លារសហរដ្ឋអាមេរិក ទៅផ្ដល់ជូនកុមារៗរស់នៅក្នុងអង្គការ AFESIP។

ទទួលបានជំនួយនេះ អ្នកស្រី ម៉ម សុម៉ាលី ប្រធានអង្គការ AFESIP បានមានប្រសាសន៍ថ្លែងអំណរគុណ ឯកឧត្តមអ្នកឧកញ៉ា សុខ ចំរើន អគ្គនាយកក្រុមហ៊ុន PPCTV និងលោកជំទាវ រួមទាំងតារាសិង្ហបុរីទាំងពីរដួងផង ដែលបាននាំយកអំណោយសប្បុរសខាងលើមកផ្ដល់ជូនកុមារៗក្នុងអង្គការរបស់អ្នកស្រី។

អ្នកស្រី បន្តរៀបរាប់ថា អង្គការរបស់អ្នកស្រី មានចំនួន៣មណ្ឌលនៅទូទាំងប្រទេសកម្ពុជា។ ដោយឡែក មណ្ឌលនៅកំពង់ចាមនេះ ត្រូវបានបង្កើតឡើងនៅឆ្នាំ ១៩៩៨ បច្ចុប្បន្នមានក្មេងៗជាកុមារីរស់នៅចំនួន ៥០នាក់។ ពួកគេទាំងនោះ សុទ្ធជាកុមារត្រូវគេជួញដូរផ្លូវភេទ និងរំលោភសេពសន្ថវៈ រួមទាំងការបំពានផ្សេងៗទៀត។

Elvin Ng និង Zoe Tay បានមកដល់ប្រទេសកាលពីថ្ងៃទី ២៣ ដើម្បីមកផ្សព្វផ្សាយភាពយន្តរបស់ពួកគេរឿង "សន្ដានចិត្តអ្នកមានបុណ្យ"ដែលជាកិច្ចការទី១។ កិច្ចការទី២របស់ពួកគេ គឺជួបជុំអ្នកគាំទ្រ ហៅថា “You Can Be An Angel Too Fans Meet” ឯការនាំជំនួយសប្បុរសធម៌ទៅផ្ដល់ជូនកុមារនៅអង្គការ AFESIP គឺជាកិច្ចការទី៣របស់ពួកគេ។ ពួកគេបានត្រឡប់ទៅប្រទេសកំណើតវិញហើយ កាលពីរសៀលថ្ងៃទី២៥ ឧសភា កន្លងទៅ៕

អត្ថបទ៖ ទារិកា