អត្ថន័យសុបិនទាំង១៤ ដែលអ្នកតែងយល់ខុស

2015-05-30 19:06:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេលខ្លះអ្នកហាក់ដូចជាមិនជឿឬយល់ខុសអំពីសុបិនដែលអ្នកបានឃើញកាលគេងពីយប់ តែធាតុពិតអាចជាប់ទាក់ទងនឹងស្ថានការណ៍ផ្លូវចិត្តរបស់អ្នក បើនិយាយអំពីចិត្តសាស្ត្រ។ ឧទាហរណ៍ នៅពេលថ្ងៃអ្នកមានអារម្មណ៍ភ័យខ្លាចនឹងអ្វីមួយ នោះនៅពេលគេងយប់ អ្នកអាចនឹងស្រមើស្រមៃ (សុបិន) ឃើញអ្វីមិនល្អ ដែលធ្វើឱ្យអ្នកភ័យខ្លាចក្នុងយល់សប្ដិនោះមិនខាន។ ការបកស្រាយបែបចិត្តសាស្រ្តខាងក្រោមនឹងប្រាប់ប្រិយមិត្តអំពីអត្ថន័យនៃសុបិនដែលអ្នកបានឃើញ៖

១.ទារក៖ បង្ហាញអំពីបំណងប្រាថ្នារបស់អ្នកក្នុងការបង្កើតពូជពង្សវង់ត្រកូលដើម្បីបន្តវេន ឬក៏អារម្មណ៍ត្រូវការការស្រឡាញ់។ ២. ត្រូវគេដេញចាប់៖ នៅពេលអ្នកយល់សប្តិថាមាននរណាដេញតាមចាប់ ហើយអ្នករត់ទាំងភិតភ័យវាបង្ហាញពីអារម្មណ៍ដែលអ្នកកំពុងភ័យខ្លាចនឹងបញ្ហាអ្វីមួយជាចម្បងមិនខាន។

៣. សំលៀកបំពាក់៖ ការយល់សប្តិឃើញសំលៀកបំពាក់បែបនេះ បង្ហាញពីអារម្មណ៍ដែលអ្នកចង់ឱ្យមនុស្សនៅជុំវិញទទួលយកការស្លៀកពាក់របស់អ្នក។ ប៉ុន្តែប្រសិនបើយល់សប្តិឃើញថា អ្នកកំពុងស្លៀកពាក់រយីករយាក នោះបង្ហាញថា អ្នកកំពុងមានអារម្មណ៍ថាខ្លួនឯងកំពុងស្លៀកសំលៀកបំពាក់មិនសូវទាក់ទាញឬមិនចុះចំណោមគេ។

៤. ការប្រឡង៖ បង្ហាញពីការវាយតម្លៃខ្លួនឯង ទៅលើមុខវិជ្ជាណាមួយដែលអ្នកអាចមិនសូវចេះ ហើយភ័យខ្លាចចំពោះការប្រឡងមុខវិជ្ជាមួយនោះ។

៥. យល់សប្តិឃើញមានអ្នកស្លាប់៖ បង្ហាញពីអារម្មណ៍នៃការខ្វះទស្សនវិស័យល្អៗទៅលើមនុស្សដែលអ្នកស្រឡាញ់ ហើយជួនកាលវាក៏បង្ហាញថាអ្នកត្រូវមានការផ្លាស់ប្តូរអ្វីមួយ ដោយឈប់ពឹងពាក់លើអ្នកទាំងនោះទៀតហើយ។ បើអ្នកសុបិនឃើញខ្លួនឯងស្លាប់ឬទារកស្លាប់ បានន័យថាអ្នកកំពុងតែមានការផ្លាស់ប្តូរទៅរកចំណុចចាប់ផ្តើមថ្មីមួយ ជាលក្ខណៈមនុស្សមានការយល់ដឹង មិនមែនដូចកូនក្មេងទៀតនោះទេ។

៦. ធ្លាក់ពីលើអ្វីមួយ៖ បង្ហាញពីសញ្ញាដែលទាក់ទងនឹងការព្រួយបារម្ភអំពីរឿងណាមួយ ការបាត់បង់ការគ្រប់គ្រងលើខ្លួនឯងឬអ្វីមួយ ក៏ដូចជាភាពបរាជ័យដែរ។ ៧. ខ្មោចព្រាយបិសាច៖ បង្ហាញពីអារម្មណ៍សម្ងាត់ ដែលអ្នកចង់ផ្លាស់ប្ដូរអាកប្បកិរិយាខ្លួនឯងឱ្យកាន់តែប្រសើរជាងមុន។

៨. សក់៖ បើតាមអ្នកជំនាញផ្នែកចិត្តសាស្ត្រលោក Sigmund Freud បានបញ្ជាក់ថា ការយល់សប្តិឃើញសក់គឺជាប់ពាក់ព័ន្ធនឹងបញ្ហាផ្លូវភេទ។ ការយល់សប្តិឃើញមានសក់ច្រើន បង្ហាញពីសមត្ថភាពបង្កើតកូន ហើយការកាត់សក់បង្ហាញពីអារម្មណ៍បាត់បង់ចំណង់ផ្លូវភេទ រីឯការជ្រុះសក់បង្ហាញពីភាពភ័យខ្លាចការខ្លាចមានក្បាលទំពែក។

៩. ដៃ៖ បើអ្នកយល់សប្តិឃើញថាដៃអ្នកចង នោះបង្ហាញពីអារម្មណ៍ អំពីការធ្វើរឿងមិនបានការ។ យល់សប្តិឃើញលាងដៃ បង្ហាញថាអ្នកបានធ្វើកំហុសអ្វីមួយ។ ១០. ការរៀបការ៖ បង្ហាញពីបំណងប្រាថ្នាក្នុងការរៀបការ ឬត្រូវការនរណាម្នាក់មករួមរស់ជាមួយអ្នក។

១១. លុយ៖ វាទាក់ទងនឹងផ្នែកធនធានរបស់អ្នក។ ពេលខ្លះការយល់សប្តិឃើញលុយ អាចបង្ហាញពីការផ្លាស់ប្តូរអ្វីមួយជាប់ពាក់ព័ន្ធនឹងផ្នែកហិរញ្ញវត្ថុក្នុងជីវិតរបស់អ្នក។

១២. អាក្រាតខ្លួន៖ វាបង្ហាញពីការលាតត្រដាងអាថ៌កំបាំងឬធាតុពិតនៃខ្លួនអ្នកដែលអ្នកព្យាយាមលាក់បាំង ទៅកាន់អ្នកដទៃ។ ១៣. ធ្មេញ៖ បើអ្នកយល់សប្តិឃើញបាត់បង់ឬបាក់ធ្មេញ វាបង្ហាញពីអារម្មណ៍ភ័យខ្លាចភាពចាស់ជរា ឬភាពមិនសូវទាក់ទាញចំពោះអ្នកអ្នកដទៃ។ ១៤. ជាប់អន្ទាក់៖ ជាសុបិនអាក្រក់ដែលបង្ហាញពីភាពអសមត្ថភាពក្នុងការរត់គេេចឬរកដំណោះស្រាយដ៏ត្រឹមត្រូវណាមួយ៕

ប្រែសម្រួល៖ ប៉ែត ផាន់និត

ប្រភព៖ worldofluciddreaming