Amir Khan ផ្ញើពាក្យ១ឃ្លាទៅឱ្យ Floyd បន្ទាប់ពីឈ្នះ Algieri ដោយពិន្ទុ

2015-05-30 22:20:19
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពូលអ្នកប្រដាល់អង់គ្លេស Amir Khan បានយកឈ្នះលើអ្នកប្រដាល់អាមេរិក Chris Algieri ដោយពិន្ទុ ១១៧-១១១ , ១១៧-១១១ និង១១៥-១១៣។ បន្ទាប់ពីជ័យជម្នះនេះដែរ Khan បានផ្ដាំផ្ញើពាក្យ១ឃ្លាទៅឱ្យ Floyd ផងដែរថា "ប្រកួតបន្ទាប់ខ្ញុំចង់ប្រកួតជាមួយអ្នក (I Want U Next)"។

ក្រោយប្រកួតគ្នាយ៉ាងស្វិតស្វាញអស់រយៈពេល១២ទឹក ចៅក្រុមទាំង៣បានកាត់សេចក្ដីថា Khan ជាអ្នកឈ្នះក្នុងប្រកួតនេះដោយពិន្ទុ។ ហើយបន្ទាប់ពីជ័យជម្នះនេះ អ្នកប្រដាល់កាន់សាសនាឥស្លាមរូបនេះបាននិយាយថា៖ "អ្នកគ្រប់គ្នាបានដឹងហើយ ខ្ញុំត្រូវការ Floyd ជាមនុស្សបន្ទាប់ដែលឡើងសង្វៀនជាមួយខ្ញុំ។ ខ្ញុំមិនចង់វាយជាមួយ Algieri ប៉ុន្មាននោះទេ តែដើម្បីឆ្ពោះទៅរក Floyd ខ្ញុំត្រូវតែយកឈ្នះគាត់ឱ្យបាន។ គោលដៅសំខាន់សម្រាប់ខ្ញុំទៅថ្ងៃមុខ គឺបានប្រកួតជាមួយ Floyd ក្នុងប្រកួតចុងក្រោយរបស់គេ”។

Floyd Mayweather ជាកីឡាករប្រកួតមិនដែលចាញ់របស់អាមេរិក ហើយកាលពីដើមខែនេះរូបគេក៏បានយកឈ្នះលើអ្នកខ្លាំងនៅអាស៊ី Pacman ដោយពិន្ទុផងដែរ។ ក្រោយពីប្រកួតនោះចប់ កីឡាករដែលមានរហស្សនាមថា Money រូបនេះបានប្រកាសជាសាធារណៈថារូបគេនឹងឡើងប្រកួតមួយប្រកួតទៀតនៅខែកញ្ញាខាងមុខ ហើយបន្ទាប់ពីប្រកួតនោះរូបគេនឹងចូលនិវត្តន៍តែម្ដង៕

ចុចអាន៖Khan លក់ខោខ្លី យកលុយជិត៥ម៉ឺនដុល្លារជួយក្មេងនៅប៉ាគីស្ថាន

ប្រែសម្រួល៖ មុន្នី រម្យ ប្រភព៖ mirror