អ៊ិត ស្រីពីន ទៅរកស៊ីលក់មាសនៅអាមេរិក

2015-06-03 19:00:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ខុសពីតារាផ្សេងៗទៀត តារាចម្រៀង អ៊ិត ស្រីពីន ដែលទើបឡើងមកយកកូនៗទៅរស់នៅសហរដ្ឋអាមេរិកថ្មីៗនេះ បានប្រាប់ថា នាងបានចាប់យករបររកស៊ីលក់មាសក្រោយទៅដល់អាមេរិក។

អ៊ិត ស្រីពីនទៅ បានដល់អាមេរិកតាំងពីឆ្នាំ២០១០ ដោយបាន និងកំពុងរស់នៅរដ្ឋមីនីសូតា។ តារាចម្រៀងប្រជាប្រិយរូបនេះ បញ្ជាក់ថា តាំងពីទៅដល់ដំបូង រហូតមកដល់បច្ចុប្បន្ន គឺនាងមានរបររកស៊ីជាអ្នកលក់មាស។ ចំពោះការចាប់មុខរបរប្លែក ខណៈតារាខ្មែរផ្សេងទៀតដែលច្រើនធ្វើការក្នុងកាស៊ីណូ និងខ្លះបន្តអាជីពសិល្បៈនេះ ស្រីពីន ប្រាប់ថា អត់មានហេតុផលទេ។

អ៊ីត ស្រីពីន និងណាខុន ក្នុងថ្ងៃខួបកំណើតកូនស្រី

“អត់មានហេតុផលអីទេ ខ្ញុំរកស៊ីលក់មាស គឺមាសម្ដាយក្មេក មិនមែនមាសខ្ញុំទេ(សើច)។ គាត់ប្រកបរបរនេះយូរហើយ អីចឹងខ្ញុំក៏ជួយមើលការខុសត្រូវបន្តទៅ"។ តារាចម្រៀងកូន៣រូបនេះ បន្តទៀតថា នាងមិនមែនមើលអាជីវកម្មមួយនេះតែម្នាក់ឯងទេ គឺម្ដាយក្មេករបស់នាង ក៏នៅជួយមើលទាំងអស់គ្នាដែរ ដែលពេលខ្លះនាងនៅ ពេលខ្លះម្ដាយក្មេកនៅមើល។

ក្រៅពីអាជីវកម្មលក់មាស ស្រីពីន ក៏នៅបន្តការងារសិល្បៈរបស់នាងដែរ គ្រាន់តែមិនញឹកញាប់។ ស្រីពីន ថ្លែងថា "ខ្ញុំនៅចេញច្រៀងម្ដងម្កាល ដូចជាកម្មវិធីរៃអង្គាសប្រាក់ បច្ច័យអី អីចឹងខ្ញុំអាចសុំការអនុញ្ញាតពីម្ដាយក្មេកទៅច្រៀងបាន"។។

តារាចម្រៀងវ័យ ៣៥ ឆ្នាំរូបនេះ ក៏នៅមានគម្រោងផ្ទាល់ខ្លួនមួយទៀតដែរ ដោយនាងចង់បើកអាជីវកម្មខាងផ្នែកធ្វើក្រចក និងធ្វើសក់។ "មាន...ខ្ញុំមានគម្រោងបង គឺចង់បើកជាងហាងធ្វើក្រចក សក់អីចឹងហ្អាណាស់ ព្រោះយើងមានជំនាញហ្នឹង តែរាល់ថ្ងៃរៀនអត់ទាន់ចប់ គឺនៅសល់ប្រហែលជា ១០០ម៉ោងអីទៀត តែចប់ គឺបើកហើយ"។

អ៊ិត ស្រីពីន បានបញ្ចប់អតីតភាពជាស្ត្រីមេម៉ាយកូនពីររបស់ខ្លួន ក្រោយបានជួបស្វាមីក្រោយ និងរៀបការជាមួយគ្នាកាលពីឆ្នាំ ២០០៦។ ស្រីពីន ទទួលបានចំណងដៃកូនស្រីមួយទៀតជាមួយស្វាមីក្រោយ។ តារាចម្រៀងរូបនេះ បានឡើងមកយកកូនទាំងពីររបស់ស្វាមីមុន ទៅរស់នៅជុំគ្នានៅអាមេរិកកាលពីពាក់កណ្ដាលខែមុន។

ចំពោះការឡើងមកប្រមូលកូនទៅរស់នៅអាមេរិកជាមួយគ្នានេះ ស្រីពីន ប្រាប់ថា ធ្វើតាមការបង្គាប់របស់ម្ដាយក្មេក។ "ម្ដាយក្មេកគាត់ចិត្តល្អ គាត់ថាឲ្យមកយកកូនទៅ ទាន់នៅតូចអីចឹង ឆាប់បានរៀនសូត្រហ្នឹងគេ និយាយទៅពួកគាត់ចិត្តល្អណាស់"។ ស្រីថ្លែង៕

អត្ថបទ៖ ទារិកា