រដ្ឋមន្ត្រីមុំាល្ហុង ម៉ៅ បូរ៉ា ក្លាយជាតួឯក
- 2015-06-04 21:54:12
- ចំនួនមតិ 0 | ចំនួនចែករំលែក 0
រដ្ឋមន្ត្រីមុំាល្ហុង ម៉ៅ បូរ៉ា ក្លាយជាតួឯក
ចន្លោះមិនឃើញ
បន្ទាប់ពីចេញលក់ម៉ាំល្ហុងប៉ុន្មានឆ្នាំ មានគេស្គាល់ និងចាប់អារម្មណ៍ច្រើន ឥឡូវលោក ម៉ៅ បូរ៉ា ក៏បានឈានទៅប្រឡូកសិល្បៈ ដោយបានសម្ដែងជាតួឯកនៅក្នុងបទចម្រៀងមួយចំនួនទៀតផង ដែលបទទាំងនោះសុទ្ធជាបទរបស់ផលិតកម្មធំៗ។ នេះបើតាមសាមីខ្លួន។
"អូបងរាល់ថ្ងៃហ្នឹង លក់ម៉ាំផង សម្ដែងជាកាយវិការខារ៉ាអូខេផងតើ ហើយនៅក្នុងចំណោមបទចម្រៀងទាំងនោះ មួយចំនួនខ្ញុំសម្ដែងជាតួឯកទៀត"។ បូរ៉ា ថ្លែង។ បទចម្រៀងរបស់បុរសដែលមានរហស្សនាមថា "រដ្ឋមន្ត្រីមុំាល្ហុង" រូបនេះបានថត មានដូចជា "អាដាំ" នៅក្នុងផលិតកម្មហង្សមាស "អត់ដឹងអីផង" និងបទ "បោកយកកូនប្រើ" នៅក្នុងផលិតកម្មភ្លេងរីខត ជាដើម។
ដោយឡែកផលិតកម្មផ្សេងទៀត ដែលបុរសមកពីខេត្តតាកែវរូបនេះ បានចូលរួមថតបទចម្រៀងឲ្យដែរនោះ មានដូចជា ផលិតកម្ម Bigman មានបទចម្រៀង “ដឹងថានឹកតែមិនហ៊ានលះបង់គេ” បទ ”កំពូលប្រចណ្ឌ” របស់ផលិតកម្ម Town និងបទ “បោកយកកូនប្រើ” បទភ្លេង Record ជាដើម។
មិនត្រឹមប៉ុណ្ណឹង លោក ក៏បានចូលសម្ដែងក្នុងស្ប៉តថ្នាំមួយចំនួនដែរ ដូចជាស្ប៉តពាណិជ្ជកម្មបាញ់ស្រូវដែលបានចាក់បញ្ចាំងលើកញ្ចក់ទូរទស្សន៍ My TV ហង្សមាស និងបាយ័នជាដើម។ សាមីខ្លួននៅប្រាប់ទៀតថា លោកក៍ត្រូវបានគេអញ្ជើញរូបលោកឲ្យទៅថតកុនទៀតផង ដោយក្នុងនោះ លោកបានចុះកុងត្រាជាមួយគេរួចហើយ ប៉ុន្តែយ៉ាងណា មិនបានចាំចំណងជើងថា ជារឿងអ្វីនោះទេ។
ម៉ៅ បូរ៉ា កំពុងមានការរវល់ជាមួយនឹងការលក់ម៉ាំល្ហុងក្រោយកេរ្តិ៍ឈ្មោះកាន់តែមានគេស្គាល់ច្រើន។ លោក ប្រាប់ថា ឥឡូវនេះលោកបានពង្រីកអាជីពលក់ផ្អក និងជ្រក់ស្ពៃបន្ថែមទៀត បូករួមនឹងការសម្ដែងកាយវិការខារ៉ាអូខេ និងត្រៀមថតកុនទៀត។
បូរ៉ា បន្តថា ការងារសិល្បៈ ក៏ជាផ្នែកមួយនៃការរីកចម្រើនរបស់អាជីវកម្មលក់មុំា ផ្អក និងជ្រក់ស្ពៃរបស់លោកដែរ ដោយបានធ្វើឲ្យប្រិយមិត្តកាន់តែស្គាល់ កាន់តែទុកចិត្ត។ ដូច្នេះ លោកនឹងបន្តការងារទាំងនេះបន្តទៅទៀត៕
អត្ថបទ ៖ ថា ម៉ាលីដា