កុំមើលស្រាល! រដ្ឋមន្ត្រីម៉ាំល្ហុង ម៉ៅ បូរ៉ា មហិច្ឆតាអនាគតមិនធម្មតា

2014-10-17 17:30:14
ចំនួនមតិ 0 | ចំនួនចែករំលែក 0

ចន្លោះមិនឃើញ

“ជិះកង់កញ្ចាស់ ស្លៀកពាក់ខោអាវធំ ពាក់ទ្រនាប់ជើងប៊ូ មាត់ពពាយនាយម៉ាំអើយ...ម៉ាំ! ម៉ាំអើយ...ក្លែម! រួមទាំងពាក្យសម្ដី កំប្លុកកំប្លែងបែកអូហូរស្ទឹងនោះ គ្មានអ្នកណាថា ខ្ញុំជាមនុស្សឡើយ"។ នេះជាសម្ដីរបស់រដ្ឋមន្ត្រីម៉ាំល្ហុង ម៉ៅ បូរ៉ា។

ទោះបីមានពាក្យសម្ដីមាក់ងាយ មិនសមគួរមួយចំនួនក្ដី តែពាក្យទាំងនេះកាន់តែធ្វើឱ្យបូរ៉ាខំប្រឹងប្រែងអស់កេរ្តិ៍អស់ខ្មាស រហូតក្លាយជាអ្នកលក់ម៉ាំដ៏ល្បីឈ្មោះ មួយរូបត្រឹមតែមួយពព្រិចភ្នែក។

ទន្ទឹមនឹងមុខជំនួញម៉ាំល្ហុងទទួលបានការគាំទ្រ លោក បូរ៉ា បានវាចាថា លោកមានមហិច្ឆតាធំពីរ ក្នុងពេលអនាគត។ តែមុនចូលចំណុចនេះ Sabay សូមបង្វែរអារម្មណ៍ប្រិយមិត្ត មកស្ដាប់ប្រវត្តិត្រួសៗរបស់លោកបន្តិចសិន។

សូមចុចអាន៖ ភាពយ៉ាប់យ៉ឺន ក្នុងគ្រួសារបានប្រែវាសនា ក្លាយជាអគ្គនាយកក្រុមហ៊ុន៥ ក្នុងដៃ

-ស្រុកកំណើត និង ការសិក្សា

មានស្រុកកំណើតនៅ ភូមិពេជ្រសា ឃុំពេជ្រសា ស្រុកកោះអណ្ដែត ខេត្តតាកែវ បូរ៉ា ជាកូនអ្នកលក់បាយសម្ល និង ម៉ាំ តាមបេនឡាន និង ផ្លូវរទេះភ្លើង។ លោកមានបងប្អូន៦នាក់ប្រុសបី-ស្រីបី ហើយលោកជាកូនទី១។ កុមារា បូរ៉ា បានឈប់រៀនត្រឹមថ្នាក់ទី៣ ក្រោយមួយឆ្នាំបន្ទាប់ពីម្ដាយ ជួបគ្រោះថ្នាក់ចរាចរណ៍ ក្នុងអំឡុងឆ្នាំ ២០០០-២០០១។

មកដល់ឆ្នាំ ២០០៣ យុវជននេះបានសម្រេចចិត្តចូលរៀនជួសជុលម៉ូតូ ប៉ុន្តែ រៀនបានមួយឆ្នាំប៉ុណ្ណោះក៏ឈប់ ព្រោះលោកគិតថា ពុកម៉ែក្រីក្រ គ្មានដើមទុនដើម្បីឱ្យលោកបើកកន្លែងរកស៊ីខ្លួនឯង ហើយក៏សុំម៉ែមកធ្វើការរោងចក្រនៅភ្នំពេញ។

-មកភ្នំពេញដើម្បីរកលុយ បើកកន្លែងជួសជុលម៉ូតូ

ល្បីថាធ្វើការងាររោងចក្រ បានប្រាក់ខែខ្ពស់ បូរ៉ាបានចេញពីស្រុកកំណើត មកភ្នំពេញក្នុងឆ្នាំ២០១០ ប៉ុន្តែលោកមិនត្រូវបានជ្រើសរើសជាកម្មករទេ ព្រោះរោងចក្រត្រូវការតែស្រីៗដែលចេះកាត់ដេរស្រាប់ប៉ុណ្ណោះ។

“ខ្ញុំខំមកពីស្រុកថានឹងបានការងាររោងចក្រធ្វើ ទីបំផុតអត់ដដែល ខ្ញុំក៏សុំគេធ្វើសំណង់មួយកន្លែងនៅជាយក្រុង"។

លោកបញ្ជាក់ថា ការងារសំណង់ពិបាកណាស់ ត្រូវលីសែងធ្ងន់ មានសភាពគ្រោះថ្នាក់ ចំណែកប្រាក់ខែតិចមិនអាចហូបគ្រប់គ្រាន់ លោកក៏សុំឈប់ទាំងធ្វើការទើបបានមួយអាទិត្យ។ គ្មានការងារ យុវជនអង្គុយសំកុកពិបាកចិត្តរឿងថ្លៃ ផ្ទះ ទឹក ភ្លើងនិង ការហូបចុក។

-បើកមុខរបរលក់ម៉ាំល្ហុង និង បញ្ហាប្រឈម  សំណាងដូចទេវតាតាមជួយ អ្នកខេត្តតាកែវរូបនេះ អាចរកការងារបានធ្វើក្នុងរោងចក្រដែកមួយ ក្នុងពេលភ្លាមៗនោះដែរ។ ជាធម្មតាការងារប្រើកម្លាំង មិនស្រួលដូចការងារប្រើបញ្ញាទេ ធ្វើការបានប្រាំពីរ ប្រាំបីថ្ងៃ លោកក៏ដាក់មេប្រូចសារជាថ្មី។

“ការងារសំណង់ហត់នោះហត់ ប្រាក់ខែចាយមិនគ្រប់ ខ្ញុំក៏បែកគំនិតលក់ម៉ាំល្ហុង។ ខ្ញុំទិញរបស់របរនិង Call សួរម៉ែពីរបៀបធ្វើ។ កាលនោះខ្ញុំប្រើដើមទុនអស់១៥ម៉ឺនរៀល"។

ចាប់តាំងពីគ្រានោះ សំឡេងស្រែកពពាយនាយ "ម៉ាំអើយ...ម៉ាំ!” ដ៏ទាក់ទាញរបស់បុរសជិះកង់កញ្ចាស់តឺនុយអាវធំម្នាក់នេះ ចាប់ផ្ដើមលាន់ឮក្នុងទីក្រុងភ្នំពេញ។

បុរសខ្មៅស្រអែមលើកឡើងថា ដំបូងគេថា លោកឆ្កួត កើតមិនសូវគ្រប់ទឹក គេស្អប់ខ្ពើម។ ពេលឮពាក្យនេះម្ដងៗ លោកស្ទាក់ស្ទើរចង់ឈប់លក់ ប៉ុន្តែគិតឱ្យដល់ទៅបើលោកឈប់មានតែដាច់ពោះស្លាប់។ ពេលខ្លះលោកត្រូវប្រឈមមុខជាមួយក្មេងស្ទាវនិងត្រូវពួកគេវាយយកលុយទៀតផង។

បញ្ហាមួយទៀតនោះ គឺសព្វថ្ងៃមានជនខិលខូចមួយចំនួន បានប្រើឈ្មោះរបស់លោក ដើម្បីលក់ម៉ាំល្ហុងដែរ។ បើប្រិយមិត្តចង់ទិញមាំល្ហុង សូមពិនិត្យរូបថតនិងលេខទូរសព្ទរបស់លោកឱ្យច្បាស់។ បូរ៉ាបញ្ជាក់។

-សន្សំលុយទិញអាប្រិមប្រិយ ជិះកង់លក់ម៉ាំល្ហុង១កញ្ចប់២០០៛-៣០០៛ បានមួយឆ្នាំ បូរ៉ាអាចសល់លុយសមល្មមទិញម៉ូតូតម្លៃជាង១០០ដុល្លារមួយគ្រឿងឈ្មោះ" អាប្រិមប្រិយ"។ អាប្រិមប្រិយត្រូវបូរ៉ាដោះខ្ទេចខ្ទីសល់តែគ្រោងឆ្អឹង និង តុបតែងដាក់រូបថតនិងធុងបាសយ៉ាងប្លែក។

បូរ៉ានិយាយសរសើរទាំងសើចថា រាល់ថ្ងៃបានអាប្រិមប្រិយនេះហើយ ជួយទាក់ទាញប្រជាប្រិយភាព ហើយស្រីៗមកទិញច្រើនក៏ដោយសារវាដែរ។ ទោះបូរ៉ាឡើងស៊េរីជិះម៉ូតូកង់បីមែន តែលោកមិនចោលអាប្រិមប្រិយឡើយ។

បច្ចុប្បន្នលោកធ្វើម៉ាំល្ហុងចាប់ពី១៦០ទៅ១៨០គីឡូក្រាម ហើយវេចខ្ចប់ជាកញ្ចប់ ក្នុង១កញ្ចប់តម្លៃ២០០០៛។ លោកមានគ្នា៦នាក់ ជិះលក់ទាល់តែអស់ ចំណែករឿងប្រាក់ចំណេញ អ្នកលក់ម៉ាំវ័យ២៥ឆ្នាំបង្ហើបថាបានសមល្មមអាចរស់ស្រួល។

-ចូលសិល្បៈ ឆ្នាំ២០១៣ ត្បិតជាអ្នកលក់ម៉ាំមែន ប៉ុន្តែសម្ដីសំដៅ ការតុបតែងខ្លួននិងភាពក្លាហានរបស់បូរ៉ា ធ្វើឱ្យម្ចាស់ផលិតកម្មមួយចំនួនចាប់អារម្មណ៍ ហើយបានទាក់ទងលោកសម្ដែងជាបណ្ដើរៗតាំងពីឆ្នាំ២០១៣។ លោកសម្ដែងកាយវិការក្នុងបទចម្រៀង "ដឹងថានឹកតែមិនហ៊ានលះបង់គេ" របស់ផលិតកម្ម Bigman បទ"កំពូលប្រច័ណ្ឌ" របស់ផលិតកម្ម Town បទភ្លេង Record "បោកយកកូនប្រើ" របស់ផលិតកម្មរស្មីហង្សមាស និង សម្ដែងក្នុងស្ពតថ្នាំបាញ់ស្រូវបញ្ចាំងលើទូរទស្សន៍ My TV ហង្សមាស និង បាយ័នជាដើម។

-មហិច្ឆតាអនាគត

ក្នុងពេលអនាគតបុរសខេត្តតាកែវ ចង់ក្លាយជាអ្នកសិល្បៈ និង ចង់ពង្រីកមុខរបរលក់ម៉ាំល្ហុងឱ្យកាន់តែធំ។ លោកចង់បោះម៉ូយតាមផ្សារតាមបណ្ដាខេត្ត និង ទីក្រុងដោយមិនបាច់ដើរលក់ ខណៈរឿងបើកហាងជួសជុលម៉ូតូទុកមួយឡែកសិន។

អ្នកលក់ម៉ាំសំបូរវោហារបន្តថា "ឥលូវខ្ញុំប្រកាសរកដៃគូសហការដើម្បីពង្រីកមុខជំនួញ ម៉ាំល្ហុង ផ្អក សៀង ឆៃប៉ូវឱ្យមានលក្ខណៈស្តង់ដារ។ បើបងប្អូនណាចាប់អារម្មណ៍ អាចទាក់ទងមកលេខទូរសព្ទខ្ញុំបាទ 093 97 97 96 ឬ 0979797011"។

ជាចុងក្រោយ ម៉ៅ បូរ៉ា សូមឱ្យប្រជាពលរដ្ឋខ្មែរជួយគាំទ្រម្ហូបខ្មែរ ហើយលោកសូមអរគុណ ចំពោះបងប្អូន ដែលគាំទ្រ និងលើកទឹកចិត្តដល់លោកកន្លងមក៕

សូមចុចអាន៖ ស្ទើរមិនគួរឲ្យជឿ! បង្កើតក្រុមហ៊ុនជាមួយដើមទុន ត្រឹមម៉ូតូល្អមួយគ្រឿង

សូមចុចអាន៖ លោក តាន់ ហ្សង់-ហ្រ្វង់ស័រ៖ “ មនុស្សម្នាក់ៗល្អបំផុតគឺត្រូវចេះរើបម្រះខ្លួនចេញពីគ្រប់ដំណាក់កាល”

សូមចុចអាន៖ ឧកញ៉ា គួច ម៉េងលី វេជ្ជបណ្ឌិតចិត្តធម៌ អតីតកាលជាអ្នករើសសំរាម

អត្ថបទ៖ អ៊ុំ សុភក្តិ

ប្រភព៖ Sabay Magz