នាយ ក្រូច ប្រឹងហាត់ប្រាណយកសាច់ដុំ ត្រៀមថតរឿងថ្មីរបស់ សាន់ដេ

2015-06-12 20:48:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នាយ ក្រូច បានប្រាប់ថា សព្វថ្ងៃកំពុងប្រឹងប្រែងហាត់ប្រាណយកសាច់ដុំពោះ និងទ្រូង ដើម្បីត្រៀមថតរឿងថ្មីរបស់ផលិតកម្ម សាន់ដេ សម្រាប់រដូវវស្សានេះ។

នាយបញ្ជាក់ថា៖" អឺ! បើតាមដឹងរឿងនេះ ខ្ញុំធ្វើជាអ្នកវ៉ៃខ្លាំងជាងគេនៅក្នុងព្រៃ អញ្ចឹងទាល់តែហាត់យកសាច់ដុំបន្តិចទើបបាន"។ នាយឱ្យដឹងទៀតថា ចាប់ផ្ដើមលើកអាល់ទែបានប្រមាណ២សប្ដាហ៍មកហើយ ខណៈពីមុនមក មិនធ្លាប់បានធ្វើលំហាត់ប្រាណដូចនេះទេ ដោយសារតែមមាញឹកក្នុងការងារសិល្បៈ។ ម្យ៉ាងទៀត នាយចូលចិត្តតែកីឡាបាល់ទាត់ ឬបាល់ទះតាំងពីរស់នៅឯស្រុកកំណើតមកម្ល៉េះ។

ចំណែកការហាត់ប្រាណនៅក្នុងក្លឹបដូច្នេះ ជាលើកដំបូងក្នុងជីវិតហើយរបស់នាយហើយ មុនដំណើរការថតសាច់រឿងថ្មីក្នុងនាមជាតួសំខាន់ម្នាក់។ នាយបន្តទាំងសំណើចថា៖"ឃើញគេមានសាច់ដុំពោះ៦កង់ឯណោះ តែខ្ញុំវិញមានតែ១កង់ ធំយកតែម្ដង"។ តារាកំប្លែងមានប្រភពមកពីខេត្តកំពង់ស្ពឺខាងលើ មិនបានបញ្ជាក់ពីចំណងជើងរឿងថ្មីរបស់ សាន់ដេ នោះទេ ដោយបានបញ្ជាក់ថា ចាប់អារម្មណ៍ខ្លាំងតែសាច់រឿង។ ជាមួយគ្នានោះនាយបានបញ្ជាក់ថា ផលិតកម្ម សាន់ដេ ក៏បានហៅប្អូនស្រី និងក្មួយប្រុសរួមក្រុម ដើម្បីទៅចូលរួមសម្ដែងផងដែរ។

អ្នកចាត់ការទូទៅរបស់ផលិតកម្ម សាន់ដេ ឡាយ សុខចំរើន បញ្ជាក់ថា ស្នាដៃភាពយន្តសម្រាប់ឆ្នាំ២០១៥ នឹងដំណើរការថតឆាប់ៗនេះហើយ ព្រោះកំពុងតែរៀបចំសាច់រឿងនៅឡើយ។ ទោះបីជាយ៉ាងណា លោកក៏មិនទាន់អាចបង្ហើបពីចំណងជើងរឿងថ្មីនេះដែរ ក្នុងហេតុផលថា ជារឿងផ្ទៃក្នុងរបស់ស្ថាប័ន ដោយរង់ចាំរហូតថ្ងៃធ្វើពិធីក្រុងពាលីតែម្ដង។

ប៉ុន្តែអ្នកចាត់ការទូទៅវ័យក្មេងរូបនេះបន្ថែមថា នេះជាស្នាដៃទី៦ហើយរបស់ផលិតកម្ម សាន់ដេ ខណៈស្នាដៃកន្លងមកសុទ្ធសឹងតែបានទទួលជោគជ័យទាំងអស់។ លោកបញ្ជាក់ថា៖" ធម្មតាអាជីពយើងជាអ្នកផលិត នៅតែផលិតបន្តជារៀងរហូតអញ្ចឹង និងប្រកបដោយក្ដីសង្ឃឹមជានិច្ច"។ លោកបន្តថា ការគាំទ្រកម្រិតណានោះ អាស្រ័យលើទស្សនិកជន៕

អានអត្ថបទ៖ ទ្រីមែន ក្លាយជាអ្នកនិពន្ធ និងដឹកនាំរឿងក្រោយឃើញមិត្តភក្ដិថតវីដេអូលេងក្នុងពិធីជប់លៀង អានអត្ថបទ៖ តារាសម្ដែង វ៉ាន ដាលីស ងាកមកបើកហាង