ជេរប្រមាថគ្នាតាមបណ្ដាញសង្គមជារឿងធម្មតាឬអាចជាប់ទោស?

2015-06-19 15:26:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ការជេរប្រមាថបុគ្គលម្នាក់ពីបុគ្គលម្នាក់ទៀត តាមរយៈបណ្ដាញសង្គម មិនថាការផ្ញើសារជាសំឡេង ការផ្ញើជាវីដេអូ ក៏ដោយ កំពុងតែពេញនិយម តាមរយៈការ print screen ហើយ share តៗគ្នា។

ទាក់ទងនឹង ប្រធានបទនេះ យុវតី ចន សុវណ្ណករុណា និស្សិតឆ្នាំមូលដ្ឋាននៃវិទ្យាស្ថានស៊ីតិក បានសម្ដែងការមិនពេញចិត្តថា « វាជាអំពើអគតិមួយ! មានបញ្ហាអីតិចតាំង ជេរឆ្លើយឆ្លងទៅមក »។ យុវតីផ្នែករចនាប្លង់រូបនេះ ក៏បានបន្ថែមទៀតថា បញ្ហាឬក៏ជម្លោះដែលមានហើយយកមកជេរគ្នាតាមហ្វេសប៊ុកវាមិនអាចដោះស្រាយបានទេ ដូច្នេះបើមិនពេញចិត្តត្រង់ណាគួរតែ រិះគន់បែបស្ថាបនាទើបល្អជាង។

ស្រដៀងគ្នានេះដែរ យុវជន ខាត់ ចាន់ម៉ារ៉ាឌីជានិស្សិតអក្សរសាស្ត្រជប៉ុនក៏បានរៀបរាប់ថា «ការជេរគ្នា ជាវីដេអូក្ដី ជាការ post status ក្ដី វាធ្វើឱ្យបណ្ដាញហ្វេសប៊ុកក្នុងសង្គមខ្មែរកាន់តែរញ៉េរញ៉ៃ! គេមើលមកនឹងយល់ថានេះជាបណ្ដុំអសីលធម៌»។ ទោះជាមានការយល់ឃើញបែបនេះក្ដី និស្សិតនៃសាកលវិទ្យាល័យមេគង្គកម្ពុជារូបនេះក៏បានអះអាងថា រូបគេមិនខ្វល់ចំពោះពាក្យទាំងនោះឡើយ គ្រាន់តែscroll ឱ្យផុតប៉ុណ្ណោះ ព្រោះថា បើ share ឬ ក៏ឆ្លើយឆ្លងមតិអីក៏មិនអាចជួយអ្វីបានដែរ។

ដោយមិនចាប់អារម្មណ៍ចំពោះអំពើទាំងនេះ កញ្ញាសឹង ចាន់ធឿន ជាអាជីវករលក់អាហារនៅសាលារៀនមួយកន្លែងនៃទីក្រុងភ្នំពេញបានប្រាប់ថា ក្រុមយុវជនទាំងនោះបានធ្វើឱ្យមានការច្របូកច្របល់ក្នុងបណ្ដាញសង្គម ហើយនេះប្រហែលជាការអផ្សុករបស់ពួកគេដែលមានចិត្តចង់ឈ្នះចង់ចាញ់គ្នា ក៏ប្រហែលជាថ្ងៃណាមួយពួកគេនឹងឈប់ដោយខ្លួនឯង។

ចំណែកកញ្ញា យ៉យ ម៉ាលីសវិញ ក៏មិនពេញចិត្តចំពោះអំពើទាំងនោះដែរ ។ កញ្ញាបានលើកឡើងថា«គិតទៅ វាអាក្រក់ស្ដាប់ណាស់ មិនថាស្រីមិនថាប្រុសទេ គឺអាក្រក់ស្ដាប់ដូចគ្នា!» ។ មិនតែប៉ុណ្ណោះម៉ាលីសក៏បានបន្ថែមទៀតថា ក្នុងនាមជាកូនខ្មែរ មិនគួរប្រើពាក្យជេរប្រមាថគ្នាទៅវិញទៅមកជាសាធារណៈទេ គួរតែមានសុជីវធម៌ចំពោះគ្នាទៅវិញទៅមក ម្យ៉ាងវិញទៀតគេនឹងគិតថាយុវជនខ្មែរគ្មានសុជីវធម៌ក្នុងការប្រាស្រ័យទាក់ទងគ្នា។

យុវជន លៀក ប៊ុនហេង ក៏បាននិយាយដែរថា « តាមដែលខ្ញុំយល់ វាគ្មានមូលហេតុអីដែលមនុស្សពីរនាក់ ត្រូវបង្ហោះវីដេអូ ឬ ផ្ញើសារជេរគ្នាទៅវិញទៅមកទេ! ព្រោះអីបើពួកគាត់ជាមិត្តនឹងគ្នាស្គាល់គ្នានៅខាងក្រៅ គាត់ប្រាកដជានិយាយគ្នាឱ្យដឹងរឿងនៅខាងក្រៅហើយ ចំណែកមនុស្សដែលស្គាល់គ្នាតាមហ្វេសប៊ុក ក៏គ្មានរឿងអីទៅ តបសារឬផូសវីដេអូជេរគេដែរ បើមិនពេញចិត្តម្នាក់ហ្នឹង unfriend គេចោលទៅ ឬក៏ block ក៏បាន!»។ បន្ថែមពីលើនេះដែរ ប៊ុនហេង ក៏បន្ថែមថាយុវជនខ្មែរគួរតែបញ្ឈប់ការតិះដៀលគ្នាទៅវិញទៅមក ព្រោះថាវាអាប់អោនកិត្តិយសអ្នកដែលជេរគេ និង អ្នកដែលត្រូវគេជេរ ម្យ៉ាងវិញទៀត កាលណាជនបរទេស ដែលចេះភាសាខ្មែរឃើញវាប៉ះពាល់ដល់ត្រកូលយុវវ័យខ្មែរតែម្ដង។

លោកជួ កែវ ជាសាស្ត្រាចារ្យនៃវិទ្យាល័យមួយ ក៏បានប្រាប់ផងដែរថា « កុំថាឡើយជេរគ្នាតាមហ្វេសប៊ុកសូម្បីតែជេរគេនៅនឹងមុខផ្ទាល់ ក៏វាមិនមែនជារឿងល្អដែរ យើងគួរតែរកមធ្យោបាយផ្សេងដើម្បីដោះស្រាយបញ្ហា ព្រោះការជេរវាកាន់តែមានកំហឹងខ្លាំងឡើង ហើយជេរទៅជេរម៉ោៗ ជេររហូត! វានាំឱ្យបាត់សេចក្ដីថ្លៃថ្នូរ!»។

លោក ស៊ុយ វុទ្ធី ជាមេធាវីមួយរូប បានបញ្ជាក់ប្រាប់ Sabay ថា បើរងការជេរប្រមាថពីអ្នកដទៃក្នុងបណ្ដាញសង្គមផ្សេងៗ ជនរងគ្រោះអាច ដាក់ពាក្យបណ្ដឹងបាន ពីបទបរិហារកេរ្តិ៍ដោយត្រូវមានភស្តុតាងគ្រប់គ្រាន់ដែលអាចបញ្ជាក់ថា ជននោះពិតជាបានជេរប្រមាថខ្លួនពិតមែន ហើយជនដែលបរិហារកេរ្តិ៍អ្នកដទៃនឹងត្រូវទទួលទោសទៅតាមផ្លូវច្បាប់៕

អត្ថបទ៖ គង់ ច័ន្ទវ៉ាន់ណេង