អ្នកស្លាប់ដោយសារជំងឺផ្លូវដង្ហើម MERS កើនឡើងដល់ ២៧នាក់នៅកូរ៉េខាងត្បូង

2015-06-22 15:46:37
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្លាប់ដោយសារជំងឺផ្លូវដង្ហើម MERS នៅប្រទេសកូរ៉េខាងត្បូង បានកើនឡើងរហូតដល់ ២៧នាក់ គិតត្រឹមព្រឹកថ្ងៃចន្ទនេះ ចំណែកឯនៅក្នុងប្រទេសថៃវិញ អាជ្ញាធរបានអះអាងថាមិនទាន់រកឃើញករណីឆ្លងទីពីរនៅឡើយទេ។

ក្រសួងសុខាភិបាលរបស់ប្រទេសកូរ៉េខាងត្បូង បានបញ្ជាក់នៅព្រឹកថ្ងៃចន្ទនេះថា មានមនុស្សពីរនាក់បន្ថែមទៀតបានស្លាប់ដោយសារជំងឺផ្លូវដង្ហើម MERS ដែលនាំឲ្យអ្នកបាត់បង់ជីវិតដោយសារជំងឺដ៏សាហាវនេះកើនឡើងដល់ ២៧នាក់។ ក្រៅពីនេះ ក្រសួងក៏បានអះអាងពីចំនួនអ្នកឆ្លង ៣ករណីបន្ថែមទៀត ដែលនាំឲ្យអ្នកផ្ទុកជំងឺ MERS សរុបកើនឡើងដល់ ១៧២នាក់។

អ្នកស្លាប់ដោយសារជំងឺ MERS នៅប្រទេសកូរ៉េខាងត្បូង ភាគច្រើនជាមនុស្សវ័យចំណាស់អាយុខ្ទង់ ៨០ឆ្នាំ និងមានជំងឺបន្ទាប់បន្សំពីមុនមក ដែលមិនអាចទ្រាំទ្រជាមួយជំងឺផ្លូវដង្ហើមនេះបាន។ ពេលនេះអាជ្ញាធរកូរ៉េខាងត្បូង កំពុងតាមស្វែងរកមនុស្សជាច្រើនទៀត ដែលមានជាប់ពាក់ព័ន្ធជាមួយអ្នកផ្ទុកជំងឺ MERS និងសង្ស័យថា បានឆ្លងជំងឺនេះដូចគ្នា។ ករណីរីករាលដាលក្នុងកូរ៉េខាងត្បូង គឺជាការផ្ទុះឡើងខ្លាំងបំផុតក្រៅប្រទេសអារ៉ាប៊ីសាអ៊ូឌីត ដែលជាតំបន់វាយប្រហារដោយជំងឺនេះធ្ងន់ធ្ងរជាងគេ។

ចំណែកនៅក្នុងប្រទេសថៃវិញ បន្ទាប់ពីរកឃើញអ្នកឆ្លងជំងឺ MERS ដំបូងបំផុតកាលពីសប្ដាហ៍មុន ពេលនេះពុំមានផ្ទុះឡើងករណីថ្មីឡើយ។ យ៉ាងណាក៏ដោយ អាជ្ញាធរកំពុងតាមដានសុខភាពមនុស្សជាច្រើន ដែលបានធ្វើដំណើរលើយន្តហោះជាមួយអ្នកឆ្លង និងត្រួតពិនិត្យយ៉ាងដិតដល់នៅតាមអាកាសយានដ្ឋានអន្តរជាតិនានា៕