Sevilla ដាស់តឿន Liverpool បើចង់បាន Carlos Bacca ទាល់តែចាយធំតិច
- 2015-06-22 18:05:36
- ចំនួនមតិ 0 | ចំនួនចែករំលែក 0
Sevilla ដាស់តឿន Liverpool បើចង់បាន Carlos Bacca ទាល់តែចាយធំតិច
ចន្លោះមិនឃើញ
ក្លិបជើងឯក Europa League, Sevilla បានដាស់តឿនដល់ក្លិប Liverpool ថា បើចង់បានខ្សែប្រយុទ្ធ Carlos Bacca ទាល់តែហង្សក្រហម ហ៊ានទិញផ្ដាច់កុងត្រាតម្លៃ ២១,៥លានផោន (ជាង៣៤លានដុល្លារ) ទើបអាចនាំយកកីឡាករជម្រើសជាតិកូឡុំប៊ីរូបនេះ ទៅកាន់ទឹកដី Anfield បាន។
Liverpool បានបំបែរចំណាប់អារម្មណ៍ទៅកាន់ ខ្សែប្រយុទ្ធ Bacca របស់ Sevilla ដែលស៊ុតបាន ២៨គ្រាប់ គ្រប់ពានរង្វាន់កាលពីរដូវកាលមុនវិញ បន្ទាប់ពី Aston Villa បានកំណត់តម្លៃខ្លួន Christian Benteke ដែលជាគោលដៅទី១ ខ្ពស់ជ្រុលពេក។
Tottenham និងក្លិបអ៊ីតាលី Roma ក៏ចាប់អារម្មណ៍ចង់បាន Bacca ដែលស៊ុតបញ្ចូលទី២គ្រាប់ នៅវគ្គផ្ដាច់ព្រ័ត្រ Europa League កាលពីខែមុនដែរ ហើយកីឡាកររូបនេះ មានតម្លៃខ្លួនផ្ដាច់កុងត្រា ប្រមាណ ២១,៥លានផោន។
លោក Monchi ដែលជានាយកផ្នែកកីឡាក្លិប Sevilla បានលើកឡើងថា ក្លិបមិនចង់លក់ Bacca ចេញទេ ប៉ុន្តែបើក្លិបណាចង់បាន លុះត្រាតែហ៊ានចំណាយលុយធំទិញផ្ដាច់កុងត្រា។ លោកបាននិយាយថា៖ "យើងគ្មានបំណងចង់លក់គាត់ទេ ប៉ុន្តែបើមានក្លិបណាចង់បាន Bacca ពួកគេត្រូវតែទិញផ្ដាច់កុងត្រា"។
Liverpool នឹងមិនអាចទិញ Benteke ទេ ព្រោះ Aston បានកំណត់តម្លៃខ្សែប្រយុទ្ធវ័យ២៤ឆ្នាំ ដល់ទៅ ៣២,៥លានផោន ហើយពួកគេបែរទៅចាប់អារម្មណ៍ Bacca ដែលនឹងឈានដល់វ័យ ២៩ឆ្នាំ នាខែកញ្ញាខាងមុខវិញ ខណៈដែលខ្សែប្រយុទ្ធអេស្ប៉ាញ Fernando Llorente របស់ក្លិប Juventus ជាគោលដៅបន្ទាប់ទៀត៕
ចុះប្រិយមិត្តយល់ថា Bacca អាចនឹងល្អ សម្រាប់ Liverpool ឬអត់?
-ចុចអាន៖ Carlos Bacca ៩ឆ្នាំមុនជាព្រូឡាន បច្ចុប្បន្នជាកំពូលខ្សែប្រយុទ្ធល្បីឈ្មោះ
ប្រែសម្រួល៖ វិន ជីវ័ន្ត ប្រភព៖ mirror