ស៊ិន ច័ន្ទសាយ៉ា ទទួលស្គាល់ថា កុនខ្មែរនៅមានកម្រិតមែន

2015-06-24 15:48:07
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ស៊ិន ច័ន្ទសាយ៉ា ប្រធាននាយកដ្ឋានភាពយន្ត និង ផ្សព្វផ្សាយវប្បធម៌ នៃក្រសួងវប្បធម៌ និង វិចិត្រសិល្បៈបានឆ្លើយតបចំពោះសំនួរអ្នកសារព័ត៌មានក្នុងឱកាសសន្និសីទសារព័ត៌មានរបស់ផលិតកម្មមហាហង្សថា "ភាពយន្តខ្មែរនៅមានកម្រិតនៅឡើយ"។

“ជាការពិតណាស់ភាពយន្តខ្មែរត្បិតទទួលបានការគាំទ្រច្រើនជាងបរទេសមែន ព្រោះថា ចាក់បញ្ចាំងនៅក្នុងប្រទេសខ្លួន។ តែរឿងដែលសរសេរឡើងភាគច្រើនត្រូវឲ្យវាពាក់ព័ន្ធទៅនឹងអ្នកដឹកនាំរឿងដែរ តើថា អាចមានភាពច្នៃប្រឌិតឲ្យមានភាពរស់រវើកទាក់ទាញបានអត់? ចំណុចនេះនៅមិនទាន់បានប្រសើរទេ ហើយបញ្ហាដែលយើងតែងជួបប្រទះនោះគឺរូបរាង ការតុបតែងឆាក ទាំងសូរសព្ទសំឡេង ចំណុចទាំងអស់នេះយើងនៅខ្សោយនៅឡើយ ព្រោះនៅមានកម្រិត។

ម៉្យាងវិញធនធានរបស់យើងទៀតសោតក៏មិនទាន់មានសមត្ថភាពគ្រប់គ្រាន់ដែរ ដូចនេះត្រូវទាមទារឲ្យមានការបណ្ដុះបណ្ដាលបន្ថែមទៀត។ ហើយត្រូវទទួលស្គាល់ថាទាល់តែមានការរៀនសូត្រទើបអាចការកសាងស្នាដៃនៅពេលទៅមុខមានភាពប្រសើរឡើងគ្រប់ឈុតឆាក។

ចឹងហើយបាននៅចំពោះមុខនេះ ក្រសួងវប្បធម៌ និង វិចិត្រសិល្បៈក៏ដូចជានាយកដ្ឋានសិល្បៈភាពយន្តផ្ដោតសំខាន់ទៅលើការបណ្ដុះបណ្ដាល ហើយដំបូងបំផុត គឺបណ្ដុះបណ្ដាលលើអ្នកនិពន្ធ។ ទីពីរផ្ដោតសំខាន់បំផុតទៅលើអ្នកដឹកនាំរឿង ព្រោះដើម្បីឲ្យភាពយន្តខ្មែរ អាចប្រកួតប្រជែងជាមួយប្រទេសជិតខាងបាន”។ ស៊ិន ច័ន្ទសាយ៉ា ថ្លែងមកកាន់អ្នកសារព័ត៌មាន។

ជាចុងក្រោយលោកបានសំណូមពរថា "សូមឲ្យបងប្អូនជនរួមជាតិបន្តការគាំទ្រ និង សូមឲ្យសិល្បករសិល្បៈការិនីទាំងអស់ខិតខំប្រឹងប្រែងបន្ថែមទៀតដើម្បីឲ្យខ្សែភាពយន្តរបស់យើងបានរីកចម្រើនជឿនលឿនទៅមុខទៀត"៕

អត្ថបទ៖ទ្រី រ៉ាវី