អ្នកស្លាប់ដោយជំងឺផ្លូវដង្ហើម បន្តកើនឡើងនៅកូរ៉េខាងត្បូង

2015-06-25 15:41:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងសុខាភិបាលរបស់ប្រទេសកូរ៉េខាងត្បូង បានបញ្ចេញរបាយការណ៍នៅថ្ងៃព្រហស្បតិ៍នេះថា ចំនួនអ្នកស្លាប់ដោយសារជំងឺផ្លូវដង្ហើមមជ្ឈិមបូព៌ា បានបន្តកើនឡើងពីរនាក់ទៀត ធ្វើឲ្យជនរងគ្រោះដោយសារជំងឺមរណៈនេះ ហក់ឡើងរហូតដល់ ២៩នាក់។

ក្រៅពីចំនួនអ្នកស្លាប់ ក្រសូងសុខាភិបាលក៏បានបញ្ជាក់ពីករណីឆ្លងថ្មីមួយទៀត ធ្វើឲ្យអ្នកមានជំងឺ MERS នៅក្នុងប្រទេសកូរ៉េខាងត្បូង កើនឡើងរហូតដល់ ១៨០នាក់ ដែលជាការផ្ទុះឡើងខ្លាំងបំផុតក្រៅប្រទេសអារ៉ាប៊ីសាអ៊ូឌីត។

មនុស្ស ៧៧នាក់ កំពុងស្ថិតនៅក្រោមការព្យាបាលក្នុងមន្ទីរពេទ្យ ដើម្បីតាមដានសុខភាពបន្ត នៅទប់ស្កាត់ការរីករាលដាល។ អាជ្ញាធរកូរ៉េខាងត្បូង បានបញ្ជាក់ថា អ្នកស្លាប់ភាគច្រើនគឺជាមនុស្សវ័យចំណាស់ និងធ្លាប់មានជំងឺបន្ទាប់បន្សំប្រចាំកាយពីមុនមក។

ចំណែកនៅក្នុងប្រទេសថៃវិញ មន្ត្រីពាក់ព័ន្ធបានព្យាយាមទប់ស្កាត់ការរីករាលដាលជំងឺផ្លូវដង្ហើមនេះ បន្ទាប់ពីរកឃើញករណីឆ្លងដំបូងបំផុតនៅក្នុងប្រទេសរបស់ខ្លួន។ ស្ត្រីជនជាតិអង់គ្លេសម្នាក់ ដែលអង្គុយជាប់ពីក្រោយអ្នកជំងឺលើយន្តហោះ ត្រូវដាក់ឲ្យស្ថិតក្រោមការឃ្លាំមើលដាច់ពីគេបណ្ដោះអាសន្ន។ ទោះយ៉ាងណា ប្រទេសថៃបានរាយការណ៍ថា មនុស្សទីមួយដែលឆ្លងជំងឺ MERS នោះ បានវិលមករកភាពធូរស្រាលបន្តិចហើយ៕