អ្នកឆ្លងជំងឺ MERS ទីមួយនៅថៃបានជាសះស្បើយវិញហើយ

2015-06-30 17:14:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងសុខាភិបាលរបស់ប្រទេសថៃ បានប្រកាសកាលពីថ្ងៃចន្ទម្សិលមិញថា បុរសវ័យ ៧៥ឆ្នាំដែលជាជនរងគ្រោះដំបូងគេនៅក្នុងប្រទេសថៃ បានរួចផុតពីមេរោគមរណៈនេះហើយ បន្ទាប់ពីទទួលការព្យាបាលជាច្រើនថ្ងៃរួចមក។

បុរសវ័យ ៧៥ឆ្នាំ មានផ្ទុកជំងឺផ្លូវដង្ហើម MERS ពេលធ្វើដំណើរមកពីប្រទេសមួយក្នុងតំបន់មជ្ឈិមបូព៌ាចូលប្រទេសថៃ កាលពីថ្ងៃទី១៥ ខែមិថុនា។ ក្រោយមក បុរសរងគ្រោះដែលមានជំងឺបេះដូងជាប់ខ្លួនផងនោះ ត្រូវបានដាក់ឲ្យនៅដាច់ឆ្ងាយពីគេនាវិទ្យាស្ថានជំងឺឆ្លង Bamrasbaradura ក្នុងខេត្ត Nonthaburi។ កាលពីថ្ងៃចន្ទម្សិលមិញ ក្រសួងសុខាភិបាលបានបញ្ជាក់ថា បុរសចំណាស់នោះបានរួចផុតពីគ្រោះថ្នាក់ហើយ។

“ការធ្វើតេស្តចុងក្រោយ យើងមិនបានរកឃើញមេរោគ MERS ក្នុងខ្លួនអ្នកជំងឺទេ"។ នេះបើតាមការបញ្ជាក់របស់លោក Surachet Satitramai ដែលលេខាធិការអចិន្ត្រៃយ៍ស្ដីទីនៅក្រសួងសុខាភិបាល ប្រាប់ទីភ្នាក់ងារព័ត៌មានអង់គ្លេស Reuters។

លោកបានបន្តទៀតថា ទោះបីបុរសចំណាស់នេះបានរួចផុតពីមេរោគមរណៈក្ដី ក៏ត្រូវស្ថិតនៅក្រោមការឃ្លាំមើលបន្ត ដើម្បីតាមដានពីបញ្ហាសុខភាពផ្សេងៗទៀត រាប់ទាំងជំងឺបេះដូង ដែលអាចនឹងប៉ះពាល់ដល់ការជាសះស្បើយជំងឺ MERS។

ចំពោះសាច់ញាតិបីនាក់ទៀតរបស់អ្នកជំងឺ ដែលធ្វើដំណើរជាមួយគ្នាចូលមកប្រទេសថៃ ក៏ពុំមានមេរោគ MERS ជាប់ខ្លួនដែរ។ ទោះយ៉ាងណា ក្រសួងសុខាភិបាលនៅបន្តឃ្លាំមើល និងតាមដានសុខភាពមនុស្សមួយចំនួនទៀត ដែលមានជាប់ពាក់ព័ន្ធជាមួយអ្នកជំងឺ។

នៅប្រទេសកូរ៉េខាងត្បូង ចំនួនអ្នកស្លាប់បានកើនឡើងរហូតដល់ ៣៣នាក់ហើយនៅព្រឹកនេះ ចំណែកអ្នកឆ្លងមាន ១៨៣នាក់។ ជំងឺ MERS បានឆ្លងមកដល់មនុស្សដំបូងក្នុងឆ្នាំ២០១២ នៅតំបន់មជ្ឈិមបូព៌ា និងសម្លាប់ជីវិតមនុស្សអស់ជាង ៤០០នាក់ទូទាំងពិភពលោក៕

ចុចអាន៖ ជំងឺផ្លូវដង្ហើមគ្មានថ្នាំព្យាបាល MERS រីករាលដាលដល់ថៃហើយ

ចុចអាន៖ វិធីការពារជំងឺកំណាចថ្មីនៅកូរ៉េ MERS ដែលល្បីមិនទាន់មានថ្នាំព្យាបាល

ប្រែសម្រួល៖ គង់ វិសាល ប្រភព៖ channelnewsasia