ភាពយន្តខ្នាតធំ “ព្រលឹង៧ថ្ងៃ" ត្រៀមបញ្ចាំង និងកាត់ចំណែក៥%បរិច្ចាគទៅមន្ទីរពេទ្យគន្ធបុប្ផា

2014-10-13 17:04:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តខ្នាតធំមួយរបស់ផលិតកម្ម Rich Kids Media មានចំណងជើងថា "ព្រលឹង៧ថ្ងៃ" ជាប្រភេទរឿងខ្មោចបែបកំប្លែង ត្រៀមនឹងដាក់បញ្ចាំងក្នុងពេលឆាប់ៗនេះ ក្នុងនោះថវិកាបានមកពីការលក់សំបុត្រចំនួន ៥% នឹងត្រូវកាត់ចេញបរិច្ចាគជូនទៅមន្ទីរពេទ្យគន្ធបុប្ផា។

"ខ្ញុំគិតថា វាមិនមែនជាចំនួនច្រើនទេ ប៉ុន្តែជាទឹកចិត្តរបស់ពួកយើង យើងចង់ចូលរួមចំណែកជួយកុមារៗរបស់យើងតាមរយៈមន្ទីរពេទ្យគន្ធបុប្ផា យើងចង់មានចំណែកតូចមួយក្នុងកិច្ចការមនុស្សធម៌នេះ"។ លោក ចាន់ណា រ៉ូណាន ប្រធានក្រុមតារាចម្រៀង De5inite និងជាអ្នកនិពន្ធ និងដឹកនាំរឿង "ព្រលឹង៧ថ្ងៃ" ថ្លែងបញ្ជាក់។

លោក បានសង្កត់ថា ចំណែក ៥% ភាគរយពីការលក់សំបុត្រដែលគ្រោងសម្រាប់មន្ទីរពេទ្យគន្ធបុប្ផានេះ គឺមិនពឹងផ្អែកលើថាតើ ចំណេញ ឬខាតនោះឡើយ។ "យើងដឹងតែកាត់ប៉ុណ្ណឹង ខាតក៏ដោយ ចំណេញក៏ដោយ ដូចខ្ញុំប្រាប់អីចឹង នេះជាទឹកចិត្តពួកយើង!"។

“ព្រលឹង៧ថ្ងៃ" ជាភាពយន្តខ្នាតធំដំបូងរបស់ផលិតកម្ម Rich Kids Media សហការផលិតជាមួយ ក្រុមហ៊ុន T.I.C និងនិពន្ធដោយ ចាន់ណា រ៉ូណាន។ សហការដឹកនាំថតដោយ ជ័យ រិទ្ធា និង ចាន់ណា រ៉ូណាន។ រឿងនេះ និយាយពីការដឹងខ្លួនរបស់មនុស្សដែលស្លាប់ទៅហើយក្រោយរយៈពេល៧ថ្ងៃ។

“វាមិនមានត្រឹមតែប៉ុណ្ណឹងទេ គឺមានសាច់រឿងច្រើនទៀត តែខ្ញុំសុំមិននិយាយលម្អិតនាពេលនេះ ទុកឲ្យពុកម៉ែបងប្អូនទស្សនាដោយខ្លួនឯង វាមានបង្កប់អាថ៌កំបាំង ប្រទាក់ក្រឡាច្រើន។ ខ្ញុំហ៊ាននិយាយថា រឿងនេះនឹងមិនធ្វើឲ្យពុកម៉ែបងប្អូនខកចិត្តទេ យើងធ្វើរឿងនេះសម្រិតសម្រាំងបំផុតទាំងសាច់រឿង ទាំងបច្ចេកទេស។ អីចឹងហើយខ្ញុំចង់ពុកម៉ែបងប្អូនសន្និដ្ឋានដោយខ្លួនឯងថា យើងចំណាយប៉ុន្មានសម្រាប់ធ្វើរឿងនេះ ក្រោយពីបានទស្សនាចប់"។

ខ្សែភាពយន្តខ្នាតធំ "ព្រលឹង៧ថ្ងៃ" ចាប់ផ្ដើមថតតាំងពីខែមេសា បញ្ចប់នៅខែកក្កដា។ មកទល់នឹងពេលនេះ បានកាត់តសម្រួលបច្ចេកទេសរួចរាល់ទៀត រង់ចាំតែថ្ងៃដាក់បញ្ចាំងប៉ុណ្ណោះ។ លោក ចាន់ណា រ៉ូណាន ថ្លែងថា រឿង "ព្រលឹង៧ថ្ងៃ" របស់លោកនឹងដាក់បញ្ចាំងនៅគ្រប់រោងនៅរាជធានី និងតាមបណ្ដាខេត្តមួយចំនួនទៀតមានដូចជា សៀមរាប បាត់ដំបង កំពង់ចាម និងខេត្តព្រះសីហនុ។ "បន្ទាប់ពីបញ្ចប់ការដាក់បញ្ចាំងគ្រប់គោលដៅ ថវិកា៥%យើងនឹងកាត់ជូនទៅមន្ទីរពេទ្យគន្ធបុប្ផា"៕