ត្រួសៗប្រវត្តិក្រុមកម្ពុជា នឹង ម៉ាឡេស៊ី មុនជួបគ្នានៅចុងសប្តាហ៍នេះ

2015-07-08 21:03:28
ចំនួនមតិ 0 | ចំនួនចែករំលែក 0

ចន្លោះមិនឃើញ

មុនព្រឹត្តិការណ៍ប្រកួតលក្ខណៈមិត្តភាពអន្តរជាតិ កីឡាអេឡិចត្រូនិក Esports រវាងក្រុមកម្ពុជានិងម៉ាឡេស៊ីនៅថ្ងៃអាទិត្យចុងសប្ដាហ៍នេះ ប្រិយមិត្តជាច្រើនមានការចាប់អារម្មណ៍ពីជំនួបប្រកួតដ៏ពិសេសនេះ និងក៏ចង់ដឹងពីសមាសភាពរបស់ក្រុមទាំងបួនមុនការប្រកួតមកដល់។ អីចឹង Sabay បង្ហាញពីប្រវត្តិក្រុមទាំង ៤ ខ្លះៗដើម្បីប្រិយមិត្តបានស្វែងយល់ ងាយស្រួលក្នុងការតាមដាននិងដើម្បីធ្វើឲ្យការទស្សនារបស់ប្រិយមិត្តកាន់តែជក់ចិត្តថែមទៀត។

YouWillKnow ជាក្រុមខ្លាំងលំដាប់កំពូលនៅកម្ពុជាដែលមានប្រភពមកពី Clan MD។ ក្រុមខ្លាំងកម្ពុជានេះ ធ្លាប់ទទួលបានតំណែងជើងឯកបីកម្មវិធីក្នុងស្រុករួមមាន NYC 2013, CCCKPC 2013 និងCCC 2013។ ចំណែកឯលទ្ធផលក្នុងការប្រកួតកម្មវិធីអន្តរជាតិវិញ ក្រុមនេះធ្លាប់ទទួលបានចំណាត់ថ្នាក់លេខ៣ពោលគឺទទួលបានមេដាយសំរឹទ្ធជាប់ៗគ្នា២ឆ្នាំនៅក្នុងការប្រកួត Mission Against Terror International Championship (MATIC 2014 នៅភ្នំពេញប្រទេសកម្ពុជា និង MATIC2015នៅជូហាយប្រទេសចិន)។

ក្រុម YouWillKnow

ក្រុមកម្ពុជាមួយក្រុមទៀត CriminalX ជាក្រុមដែលកំពុងទទួលបានប្រជាប្រិយភាពខ្លាំងក្នុងរយៈពេល ២ឆ្នាំចុងក្រោយនេះក្នុងកម្មវីធី Team Challenge Server ដែលជាការប្រកួតប្រជែងរវាង Clan នឹង Clan របស់សេវាកម្សាន្ត AK2 ហើយមុនក្លាយជាបេក្ខភាពទី២ក្នុងការប្រកួតមិត្តភាពនេះ CriminalXបានបំបាក់ក្រុមខ្លាំងៗចំនួន៣ទៀតនៅវគ្គជម្រុះ(Cambodia Malaysia International Friendly Qualify)ដែលសុទ្ធសឹងតែជាក្រុមខ្លាំងមកពី Team Challenge ដូចគ្នា ។

ក្រុម CriminalX

អត្ថបទ៖ រកឃើញក្រុមខ្លាំង AK ថ្មីមួយទៀតត្រៀមប្រកួតមិត្តភាពជាមួយក្រុមម៉ាឡេស៊ី

ចំណែក EDP RoG ក្រុមមកពីម៉ាឡេស៊ី ដែលក្រុមនេះមានប្រភពមកពី Clan EDP ដែលជា Clan ដ៏ធំមួយនៅប្រទេសម៉ាឡេស៊ី។ ក្រុម EDP RoG បានបង្កើតភាពភ្ញាក់ផ្អើលបន្ទាប់ពីផ្ដួលក្រុមជើងខ្លាំងជាបន្តបន្ទាប់ ជាពិសេសក្នុងការប្រកួតវគ្គផ្ដាច់ព្រ័ត្រដោយបានបំបាក់ក្រុមខ្លាំងសំបូរបទពិសោធន៍ EDP Team AK ដែលមកពី Clan ជាមួយគ្នា ដើម្បីលើកពាន MATIC Malaysia Grand Final League 2014។ក្រុមនេះបានបន្ដធ្វើព្យុះភ្លៀងមិនតិចឡើយក្នុងការប្រកួត MATIC2015 នៅខេត្តជូហាយប្រទេសចិន តែបានបញ្ចប់ត្រឹមចំណាត់ថ្នាក់លេខ៤ប៉ុណ្ណោះ ដោយចាញ់ក្រុម MD YouWillKnow របស់កម្ពុជា។

ក្រុម EDP RoG

ចំណែកក្រុមម៉ាឡេស៊ីមួយក្រុមទៀត Team Emo ក្រុមនេះក៏ស្ថិតនៅក្នុងបញ្ជីក្រុមខ្លាំងរបស់ម៉ាឡេស៊ីផងដែរពោលទទួលបានចំណាត់ថ្នាក់លេខ៣នៅឆ្នាំ២០១៣ និងចំណាត់ថ្នាក់លេខ៤នៅឆ្នាំ២០១៤ ក្នុងពានរង្វាន់ប្រចាំប្រទេសម៉ាឡេស៊ី មុនតំណាងឱ្យប្រទេសសិង្ហបុរីដើម្បីចូលរួមប្រកួតក្នុងកម្មវិធីអន្តរជាតិ MATIC។

តើក្រុមកម្ពុជាឬម៉ាឡេស៊ី ដែលអាចស្វែងរកជោគជ័យជំនួបប្រកួតមិត្តភាពអន្តរជាតិនៅចុងសប្តាហ៍នេះ?

ការប្រកួតនេះធ្វើឡើងនៅថ្ងៃអាទិត្យទី ១២ខែកក្កដាចុងសប្ដាហ៍នេះនៅ TheArena ផ្លូវមុនីវង្សជាន់ខាងលើនៃអគារ BBWorld។ សម្រាប់អ្នកគាំទ្រនិងប្រិយមិត្តក៏អាចមកទស្សនាផ្ទាល់ដោយសេរី និងអាចមានឱកាសឈ្នះរង្វាន់ជាច្រើន។ ដោយឡែកសម្រាប់ប្រិយមិត្តដែលជាប់រវល់មិនអាចមកទស្សនាផ្ទាល់ ក៏អាចទស្សនាតាមរយៈការផ្សាយបន្ដផ្ទាល់តាម Sabaytv ឬក៏តាមដានព័ត៌មានថ្មីៗភ្លាមៗស្ដីពីការប្រកួតនេះតាមរយៈ Ak Page Facebook។

អត្ថបទ៖ អ៊ៅ លីហ៊រ