កីឡាករ Jobi McAnuff ​បាន​បង្ហាញ​សមត្ថភាព​និង​ទម្រង់​លេង​ល្អ​សឹង​តែ​នឹក​ស្មាន​មិន​ដល់ បន្ទាប់​ពី​រូប​គេ​បាន​ដូរ​អាវ​ជាមួយ​ Lionel Messi ។ តើ​នេះ​មក​ពី​ឥទ្ធិពល​របស់​អាវ Messi ​ឬ​យ៉ាង​ណា?

ជាក់​ស្ដែង​ទៅ Jobi McAnuff ​ជា​កីឡាករ​លេង​នៅ​លីក​លំដាប់​ទី​៣​របស់​អង់គ្លេស ​ហើយ​រូប​គេ​ផ្ទាល់​ក៏​មិន​មែន​ជា​កីឡាករ​ពូកែ​អូស​បាល់​ស៊ុត​អី​ដែរ។ ខ្សែ​បម្រើ​រូប​នេះ​មាន​វ័យ​៣៣​ឆ្នាំ​ទៅ​ហើយ តែ​នៅ​លេង​ក្នុង​ក្រុម​ជម្រើស​ជាតិ​ចាម៉ៃកា​នៅ​ឡើយ​ទេ។ ក្នុង​ការ​ប្រកួត​ជាមួយ​ក្រុម​អាហ្សង់ទីន​នៅ​វគ្គ​សន្សំ​ពិន្ទុ​តាម​ពូល​ Copa America កីឡាករ​រូប​នេះ​បាន​​សុំ​ដូរ​អាវ​គ្នា​ជាមួយ Messi ​ដើម្បី​ទុក​ជា​អនុស្សាវរីយ​មួយ​របស់​គេ​ដែល​បាន​លេង​ជាមួយ​កំពូល​កីឡាករ​ម្នាក់។

បន្ទាប់​ពី​បាន​អាវ​ម្ចាស់​ពាន​ Ballon d'Or ​៤​សម័យ​ខាង​លើ​មក កីឡាករ​លេង​នៅ​ក្លិប ​Leyton Orient ​រូប​នេះ​ហាក់​ដូច​ជា​មាន​ទម្រង់​លេង​ល្អ ដោយ​ខំ​ហ្វឹកហាត់​និង​មាន​ទំនុក​ចិត្ត​ខ្ពស់​លើ​ខ្លួន​ឯង​ណាស់។ រហូត​ដល់​​ម្សិលមិញ​នេះ រូប​គេ​បាន​ជួយ​ក្រុម​ជម្រើស​ជាតិ​ចាម៉ៃកា​លេង​ក្នុង​ពាន​រង្វាន់ Gold Cup ​ទល់​នឹង​កូស្តារីកា ដោយ​រក​គ្រាប់​បាល់​ប្រើ​ក្បាច់ Solo ​ដូច​ទៅ​នឹង Messi ​ទៀត​ផង។

ចំណុច​ទាំង​នេះ​ហើយ បាន​ធ្វើ​ឱ្យ​មតិ​មួយ​ចំនួន​បាន​គិត​ថា ​កីឡាករ​វ័យ​ជ្រេ​ខាង​លើ​នេះ​មាន​ទម្រង់​លេង​ល្អ​ដោយសារ​តែ​បាន​អាវ​លេខ​១០​របស់ Lionel Messi ​​ទើប​អាច​ឱ្យ​រូប​គេ​ខិតខំ​ហ្វឹកហាត់។

ចុះ​ប្រិយមិត្ត​វិញ​គិត​យ៉ាង​ណា​ដែរ​ចំពោះ​រឿង​នេះ? តើ​ឥទ្ធិពល​អាវ Messi ​មាន​មែន​ឬ​យ៉ាង​ណា?

ចុចអាន៖ គ្រាន់​តែ​ស្រែក Messi Messi ​អាច​ជួយ​ជីវិត​មនុស្ស​ម្នាក់​បាន

​ប្រែ​សម្រួល៖ មុន្នី រម្យ

ប្រភព៖ mirror, premnews