សមត្ថភាពច្នៃម៉ូដខោអាវសម័យថ្មីរបស់កូនខ្មែរ

2015-07-14 22:45:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារវិស័យច្នៃម៉ូដកំពុងឈានមុខនៅប្រទេសកម្ពុជា ទើបយើងឃើញចាប់ផ្តើមមានអ្នកមានសមត្ថភាពកំពុងបញ្ចេញស្នាដៃតាមរយៈការច្នៃម៉ូដសំលៀកបំពាក់ថ្មីៗដើម្បីទទួលបានភាពទាក់ទាញ។ លោក OU Kosal គឺជាអ្នកច្នៃម៉ូដខ្មែរម្នាក់ដែលទទួលបានការគាំទ្រសង្គមផងដែរ ដោយសារស្នាដៃច្នៃប្រឌិតសំលៀកបំពាក់របស់គាត់។

១.ហេតុអ្វីបានជាសម្រេចចិត្តដាក់ឈ្មោះហាងថា Kool as U?

Kool as U គឺជាអក្សរឆ្លាស់នៃឈ្មោះរបស់ខ្ញុំជាភាសាអង់គ្លេស Ou Kosal ដូចដែលបានឃើញនៅក្នុង Logo ហាង។

លោក Ou Kosal (ពាក់អាវសមុខគេ)

២.តើអ្វីដែលជាកត្តាជំរុញដែលបងចាប់ផ្ដើមអាជីវកម្មច្នៃម៉ូដ?

ព្រោះអស់រយៈកាល៥ឆ្នាំនេះ ខ្ញុំមើលឃើញថាជីវភាពរបស់ប្រជាជនខ្មែរមានការផ្លាស់ប្ដូរយ៉ាងឆាប់រហ័ស នេះក៏ជាមូលហេតុមួយដែលខ្ញុំចាប់ផ្ដើមអាជីវកម្មមួយនេះ ហើយក៏ជាឱកាសល្អដ៏ល្អដែលខ្ញុំអាចបញ្ចេញស្នាដៃរបស់ខ្ញុំដើម្បីបំពេញតម្រូវការទីផ្សារផងដែរ។

៣.ជាទូទៅសំលៀកបំពាក់ប្រភេទណាដែលលក់ដាច់បំផុត? ខោអាវបុរស ឬស្ត្រី?

ខ្ញុំពិតជាពិបាកឆ្លើយណាស់ថាតើ មួយណាលក់ដាច់ជាងគេ ព្រោះខ្ញុំចាប់ផ្ដើមដំបូងគឺច្នៃម៉ូដខោអាវបុរស រីឯ ខោអាវស្ត្រីទើបតែចាប់ផ្ដើមច្នៃរយៈពេលមួយខែក្រោយនេះទេ។ ម៉ូដខោអាវរបស់ Kool as U គឺជាប្រភេទសំលៀកបំពាក់សម្រាប់ទៅធ្វើការ និង ដើរលំហែកាយទូទៅ។ហើយគោលការណ៍នៃការច្នៃម៉ូដរបស់ខ្ញុំគឺ គុណភាព និង សេវាកម្ម ព្រោះខ្ញុំចង់ឲ្យពិភពលោកបានឃើញពីការច្នៃម៉ូដ ខោអាវដែលមានគុណភាពខ្ពស់របស់ខ្មែរ និងអាចប្រកួតប្រជែងនៅលើឆាកអន្តរជាតិផងដែរ។

៤.តើមានកម្មវិធីប៉ុន្មានរួចមកហើយដែលបានដាក់បង្ហាញពីការច្នៃម៉ូដសំលៀកបំពាក់របស់បង?ហើយការឆ្លើយតបរបស់អតិថិជនយ៉ាងណាដែរ?

ធ្លាប់ចូលរូមបង្ហាញប្រហែល៣កម្មវិធីរួចមកហើយ ការឆ្លើយតបរបស់អតិថិជនគឺពួកគាត់ពេញចិត្តជាខ្លាំងនឹងការច្នៃម៉ូដរបស់ខ្ញុំ។

៥.តើបងគិតបែបណាដែរចំពោះវិស័យច្នៃម៉ូដនៅកម្ពុជាសព្វថ្ងៃ?

ខ្ញុំគិតថាវិស័យច្នៃម៉ូដមានសន្ទុះលឿនខ្លាំង ត្រឹមរយៈពេលប៉ុន្មានឆ្នាំមុននេះ ប៉ុន្តែយើងត្រូវខិតខំបន្ថែមទៀតដើម្បីអាចប្រកួតប្រជែងជាមួយប្រទេសជិតខាង។

៦.តើកត្តាអ្វីដែលធ្វើឲ្យការច្នៃម៉ូដរបស់បងទទួលបានជោគជ័យ?

និយាយតាមត្រង់ខ្ញុំអត់មានសញ្ញាប័ត្រផ្នែកច្នៃម៉ូដអីទេ Background របស់ខ្ញុំគឺBusiness ប៉ុន្តែដោយសារតែមហិច្ឆតានៃការស្រឡាញ់ចូលចិត្តការច្នៃម៉ូដ ធ្វើឲ្យខ្ញុំក្លាយជាមនុស្សងប់ងល់នឹងការសិក្សាស្រាវជ្រាវតាមសៀវភៅផង តាមវិបសាយផងទាក់ទងនឹងម៉ូដខោអាវឥតឈប់ឈរ។

៧. តើយុទ្ធសាស្ត្រទីផ្សាររបស់បងគឺអ្វី? ហើយគោលដៅទៅថ្ងៃអនាគតទៀតបែបណា?

គោលដៅទីផ្សារដំបូងរបស់ខ្ញុំគឺអ្នកមានជីវភាពមធ្យម ប៉ុន្តែក្រោយពីសិក្សាពីទីផ្សារ ខ្ញុំបានបន្ថែមគោលដៅមួយទៀតគឺអ្នកដែលមានជីវភាពធូរធារ ដោយមានការបែងចែកម៉ាកខោអាវជា២ប្រភេទគឺ Blue និងRed ដោយម៉ាក Blue មានតម្លៃធូរថ្លៃជាងម៉ាកRed ព្រោះម៉ាកRed ត្រូវបានធ្វើការច្នៃម៉ូដបន្ថែមច្រើនជាងម៉ាក Blue ឲ្យសមទៅនឹងតម្លៃ។ហើយមិនមែនមានតែការច្នៃម៉ូដរបស់ខ្ញុំម្នាក់ឯងទេ យើងមាននៅមានអ្នកច្នៃម៉ូដផ្សេងទៀតរបស់ហាងយើងផងដែរ។ រីឯគោលដៅនៅថ្ងៃអនាគតរបស់ខ្ញុំគឺការលក់ខោអាវដែលខ្ញុំច្នៃតាមរយៈOnline ចេញទៅក្រៅប្រទេសប៉ុន្តែដោយសារប្រព័ន្ធចរន្តផ្ទេរលុយមិនទាន់មានភាពទូលំទូលាយសម្រាប់ប្រទេសយើង ដូច្នេះខ្ញុំត្រូវរង់ចាំបន្តិចសិន ហើយពេលដែលវាបើកទូលាយវាក៏បានចូលរួមចំណែកធ្វើឲ្យអាជីវកម្មស្រុកយើងមានភាពរីកចម្រើនមួយផ្នែកទៀត។