អ្នកគាំទ្រខ្មែរស្មោះម្នាក់ទៅជួប Arsenal នៅសិង្ហបុរី ទីបំផុតបានជួបកីឡាករសំណព្វចិត្តផ្ទាល់

2015-07-17 18:28:49
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក តុង សុប្រាជ្ញ ដែលត្រូវបានគេស្គាល់ថាជាអ្នកវិភាគសង្គមដ៏ល្បីម្នាក់នៅប្រទេសកម្ពុជាបានតស៊ូនាំប្រពន្ធកូនទៅគាំទ្រក្រុមកាំភ្លើងធំ Arsenal នៅប្រទេសសិង្ហបុរី ហើយនឹងមានឱកាសជួបកីឡាករសំណព្វចិត្តរបស់ខ្លួនប្រចាំរដូវកាល២០១៥-១៦ដោយផ្ទាល់នារសៀលថ្ងៃនេះ និងជាសមាជិក Arsenal ទីមួយដែលលោកបានជួប។

លោក តុង សុប្រាជ្ញ នៅប្រទេសសិង្ហបុរី

កំពុងនៅប្រទេសសិង្ហបុរី លោក តុង សុប្រាជ្ញ បាននិយាយថា វេលាម៉ោងប្រហែលជា២រសៀលថ្ងៃនេះ លោកនឹងបានជួបសមាជិក Arsenal លេខ២៤ Hector Bellerin។ លោកប្រាប់ថា ៖«រដូវកាល២០១៥-១៦នេះ ខ្ញុំពេញចិត្ត Bellerin ព្រោះឃើញចំណុចខ្លាំងរបស់គាត់៣យ៉ាង។ ទី១ គាត់ជាកីឡាករវ័យក្មេងដែលមានល្បឿនលឿនបំផុត។ តាមព័ត៌មានអន្តរជាតិចេញថា ពេលគាត់ចាប់ផ្តើមរត់ម្តងៗលឿនណាស់គឺកំណត់ត្រាឈ្នះកំពូលអ្នករត់ប្រណាំងលើលោក Usain Bolt ទៀត តែបើរត់ពេញ៦០ឬ១០០ម៉ែត្រគឺអត់ឈ្នះ Bolt ទេ គេនិយាយតែចេញដេប៉ាដំបូងរយៈពេលខ្លី។ មួយទៀត ពេលកាំភ្លើងធំឈ្នះ Liverpool ៤-០ នៅលីក គេធ្វើបានល្អណាស់ដែលជាហេតុធ្វើឲ្យខ្ញុំស្រលាញ់គេខ្លាំង ហើយទី៣ពេល Arsenal លេងនឹង Aston Villa វគ្គផ្តាច់ព្រ័ត្រ FA Cup គឺមានបាល់ដាច់មាត់មួយ តែ Bellerin រត់ពីចម្ងាយទៅទាត់បាល់ចេញយ៉ាងល្អបំផុត»។

ការជួបរបស់អ្នកវិភាគសង្គមដ៏ល្បីនៅប្រទេសកម្ពុជាជាមួយសមាជិក Arsenal នេះអាចចាត់ទុកថា ជារឿងចៃដន្យមួយ។ នៅពេលប្រធានក្រុមជម្រើសជាតិកម្ពុជា គួច សុកុម្ភៈ ដែលជា Brand Ambassador របស់ផលិតផល Puma ទៅជួបក្រុម Arsenal នៅសិង្ហបុរី លោកក៏បានជួបនឹងប្រធានក្រុមហ៊ុន Meta Sport។ លោក កុក កាន់រតនា ជាប្រធានក្រុមហ៊ុន Meta Sport ដែលនាំចូលផ្តាច់មុខផលិតផល Puma មកកម្ពុជាបានស្នើសុំការអនុញ្ញាតពីអ្នករៀបចំកម្មវិធីឲ្យអ្នកគាំទ្រកម្ពុជាគឺលោក តុង សុប្រាជ្ញ បានចូលជួបជាមួយកីឡាករ គួច សុកុម្ភៈ ពីព្រោះគាត់ជាអ្នកគាំទ្រដ៏ស្មោះស្ម័គ្រ និងជាប្រធានក្រុមអ្នកគាំទ្រ Arsenal នៅកម្ពុជា។ ទីបំផុតអ្នករៀបចំកម្មវិធីបានអនុញ្ញាត ហើយសុបិនរបស់លោកក្លាយជាការពិត ប៉ុន្តែភរិយា និងកូនរបស់លោកមិនបានចូលរួមជាមួយទេ។

លោកបានបញ្ជាក់ថា តាមពិតទៅលោកមិនបានរំពឹងថា នឹងជួបកីឡាករណាម្នាក់ផ្ទាល់នោះទេ ពីព្រោះលោកនាំប្រពន្ធ-កូនមកទិញសំបុត្រចូលទស្សនាធម្មតាតែប៉ុណ្ណោះ ប៉ុន្តែបែរជាមានសំណាងជួបផ្ទាល់នឹងកីឡាករសំណព្វចិត្តលេខ២៤ថែមទៀត។

លោករំលឹកថា បើនិយាយពីកីឡាករសំណព្វចិត្តវិញ រដូវកាល២០១៣-១៤ លោកចេញចិត្តកីឡាករ Mesut Ozil ហើយរដូវកាល២០១៤-១៥ លោកពេញចិត្ត Sanchez។ ចូលរដូវកាល២០១៥-១៦នេះលោកចាប់អារម្មណ៍ខ្លាំងនឹង Bellerin។ នេះជាលើកទីមួយហើយដែលមានឱកាសជួបកីឡាកររបស់ក្រុមកាំភ្លើងធំ ប៉ុន្តែមិនមែនជាលើកទីមួយទេដែលលោកបានជួបកីឡាករកំពូលលើលោកនៅប្រទេសអង់គ្លេស។ ឆ្នាំ១៩៩៩ លោកបានជួបកីឡាករបារាំង David Ginola ដែលពេលនោះជាសមាជិករបស់ក្រុម Spurs។ បន្ទាប់មកលោកបានជួប Bellamy របស់ Liverpool នៅលីឡដ្ឋាន Anfield របស់ហង្សក្រហមតែម្តងក្នុងឆ្នាំ២០០៦។

លោក តុង សុប្រាជ្ញបាននាំប្រពន្ធ និងកូនឡើងយន្តហោះទៅប្រទេសសិង្ហបុរីកាលពីថ្ងៃទី១៤ ខែកក្កដាដើម្បីគាំទ្រដល់ក្រុម Arsenal ដែលធ្វើដំណើរមកប្រកួតពានមិត្តភាពនៅប្រទេសសិង្ហបរី៕