ឃុន វុត្ថា៖ ក្មេងៗកំព្រាទាំងនោះធ្វើឲ្យខ្ញុំសឹងតែស្រក់ទឹកភ្នែក បើធៀបនឹងអតីតកាលកម្សត់ខ្ញុំ

2015-07-27 18:22:34
ចំនួនមតិ 0 | ចំនួនចែករំលែក 0

ចន្លោះមិនឃើញ

"ជីវិតដែលធ្លាប់ហែលឆ្លងកាត់នឹងភាពលំបាកតាំងពីនៅតូចដល់ពេលដែលឃើញក្មេងៗកំព្រានៅអង្គការលោកតា ហ៊្វុយ ហ្សូ ខ្ញុំមានអារម្មណ៍ថានឹកអាណិតពួកគាត់ណាស់"។ ឃុន វុត្ថា ថ្លែង។

ឃុន វុត្ថា បានរំលឹកពីអតីតកាលជាកូនកំព្រាឪពុករស់តស៊ូជាមួយនឹងអ្នកម្តាយយ៉ាងវេទនា។ តារាចម្រៀងរូបនេះបន្តទៀតថាលោកខ្វះភាពកក់ក្តៅត្រឹមតែលោកឪពុកចុះទម្រាំក្មេងៗទាំងនោះកំព្រាទាំងម្តាយឪពុកដែលរស់នៅក្នុងអង្គការរបស់តារាកំប្លែងជើងចាស់ លោកតា ហ្វ៊ុយ ហ្សូ មិនដឹងជាពួកគេមានអារម្មណ៍បែបណា?

"ភាពកម្សត់ដែលខ្ញុំធ្លាប់បានហែលឆ្លងខ្ញុំយល់ថាក្មេងៗទាំងនោះច្បាស់ជាមិនបានទទួលអ្វីដែលគេហៅថាភាពកក់ក្តៅពីអ្នកមានគុណដូចក្មេងដទៃទៀតឡើយ។ ខ្លួនខ្ញុំនៅមានម្តាយប៉ុន្តែពួកគេជាក្មេងកំព្រាគ្មានទាំងម្តាយ និងឪពុក តើពួកគេទាំងនោះមានអារម្មណ៍ថាកណ្តោចកណ្តែងយ៉ាងណាទៅ?” វុត្ថា និយាយ។

អតីតបេក្ខភាព The Voice Cambodia រូបនេះបាននិយាយថា រូបលោកមិនមែនជាអ្នកមានជីវភាពធូរធារអីប៉ុន្មាននោះទេ ប៉ុន្តែលោកមានឆន្ទៈថាត្រូវធ្វើយ៉ាងណាឲ្យមានចំណែកជាអ្នកជួយដល់ក្មេងកំព្រានៅក្នុងអង្គការលោកតា ហ្វ៊ុយ ហ្សូ។

តារាចម្រៀងរូបនេះ បានពោលទៀតថា ការងារមនុស្សធម៌នេះ ជាទឹកចិត្តដ៏ពិតប្រាកដទោះមានអ្នកណាថាការធ្វើរបស់លោកជាការសម្តែងក៏ដោយទាំងនោះគឺជាការលើកឡើងរបស់ពួកគេសំខាន់អ្វីដែល លោកកំពុងតែធ្វើ គឺស្តែងចេញពីទឹកចិត្តស្រលាញ់ និងអាណិតដ៏ធំធេងដែលលោកធ្លាប់បានជួបប្រទះ។

ទន្ទឹមនឹងនោះនៅថ្ងៃខាងមុខនេះ ឃុន វុត្ថា បានប្រាប់ថា លោកជាមួយអង្គការលោកតា ហ៊្វុយ ហ្សូ គ្រោងនឹងធ្វើការលក់សំបុត្រចូលទស្សនាការសម្តែងរបស់អង្គការដើម្បីប្រមូលថវិកាជួយទៅដល់ក្មេងកំព្រា។ សកម្មភាពនោះ ក៏នឹងមានការចូលរួមពីសំណាក់តារាចម្រៀងផលិតកម្មហង្សមាសគឺលោក ឆន សុវណ្ណរាជ ផងដែរ៕

អត្ថបទ៖ ថា ម៉ាលីដា

រូបថត៖ ឃុន វុត្ថា