ខៀវ កាញារីទ្ធ ស្នើឱ្យអ្នកម៉ូតូឌុបមានមួកការពារសម្រាប់អ្នកដំណើរ

2015-07-31 17:59:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានស្នើឱ្យអ្នករត់ម៉ូតូឌុបទាំងអស់ មានមួកការពារសម្រាប់ភ្ញៀវរបស់ខ្លួន ក្នុងគោលបំណងកាត់បន្ថយអត្រាមរណៈ ដោយគ្រោះថ្នាក់ចរាចរណ៍។

ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន

រដ្ឋមន្ត្រីក្រសួងព័ត៌មានថ្លែងប្រាប់អ្នកកាសែត ក្នុងវេទិកាថ្នាក់និពន្ធនាយកសារព័ត៌មានស្ដីពី “រួមគ្នាជំរុញការពាក់មួកសុវត្ថិភាពនៅកម្ពុជា” កាលពីថ្ងៃទី ១៥ ខែកក្ដដា ថា "អ្នកជិះម៉ូតូ សំខាន់ត្រូវចេះជំរុញអ្នកជិះក្រោយ ឱ្យគាត់ពាក់មួក ដើម្បីធានាបានសុវត្ថិភាព។ យើងនឹងគិតគូរដល់អ្នកមិនមានលទ្ធភាពទិញមួក ធ្វើយ៉ាងណាយើងនឹងរកអ្វី សម្រាប់អ្នកដែលគ្មានលទ្ធភាពទិញ"។

ដោយមើលឃើញថា អ្នកកាន់ដៃចង្កូតនៅមិនទាន់យល់ដឹងពីគុណសម្បត្តិ នៃមួកការពារ និង ច្បាប់ផាកពិន័យ ឯកឧត្ដមលើកឡើងថា ពេលផាកពិន័យ គឺគេផាកលើអ្នកកាច់ចង្កូត មិនមែនអ្នកជិះខាងក្រោយទេ ដោយមិនប្រកាន់ថា អ្នកនោះឯងជាអ្នកអ្នកម៉ូតូឌុប ឬអ្នកបើកម៉ូតូធម្មតាឡើយ។

បន្ថែមលើនេះ លោកបានស្នើសុំឱ្យប្រជាពលរដ្ឋប្រកបរបររត់ម៉ូតូឌុប មានមួកសម្រាប់ខ្លួនឯងផង និងអ្នកដំណើរផង ហើយលោកក៏ស្នើសុំឱ្យស្ថាប័ន ឬ អង្គការពាក់ព័ន្ធនានារួមទាំង អង្គការ AIP Foundation ដើម្បីជួយដល់អ្នកដែលគ្មានលទ្ធភាពទិញផងដែរ។

លោក គឹម បញ្ញា

ជុំវិញបញ្ហានេះលោក គឹម បញ្ញា នាយកអង្គការមូលនិធិបង្ការរបួសអាស៊ី ប្រចាំនៅកម្ពុជា (AIP) ដែលតែងចូលរួមបំផុសចំណេះដឹងលើបញ្ហាគ្រោះថ្នាក់ចរាចរណ៍ និង តែងចូលរួមចែកមួកសុវត្ថិភាពដល់ពលរដ្ឋខ្មែរ ប្រាប់ថា បច្ចុប្បន្នអង្គការកំពុងពិភាក្សាជាមួយដៃគូនានា ដែលកំពុងអនុវត្តការងារ សុវត្ថិភាពចរាចរណ៍ ក៏ដូចជាវិស័យឯកជន ដែលមានចំណាប់អារម្មណ៍លើបញ្ហានេះផងដែរ។

លោកថាវាលំបាកបន្តិច ព្រោះថាថវិការបស់ពួកគេ រួមទាំងអង្គការមូលនិធិបង្ការរបួសអាស៊ី ត្រូវបានគ្រោងសម្រាប់សកម្មភាព និង គម្រោងពាក់ព័ន្ធ តាមការព្រមព្រៀងជាមួយម្ចាស់អំណោយ និង អ្នកឧបត្ថម្ភរួចទៅហើយ។ ចំពោះវិស័យឯកជនក៏ដូចគ្នា ភាគច្រើនថវិការបស់ពួកគេ គឺគ្រោងសម្រាប់ការងារសង្គមប្រចាំឆ្នាំនីមួយៗ ត្រូវបានប្រើប្រាស់ បែងចែកលើគម្រោង ឬ គំនិតផ្ដួចផ្ដើមនានា តាំងពីដើមឆ្នាំមកម្ល៉េះ។

ទោះជាយ៉ាងណាលោក បញ្ញា បន្ថែមថា "អង្គការនឹងអាចស្វែងរកដៃគូគាំទ្រ និង ឧបត្ថម្ភលើការងារនេះ ក្នុងពេលសមស្របណាមួយ នាពេលខាងមុខជាក់ជាមិនខាន"។

ក្នុងរបាយការណ៍ នៃអង្គការមូលនិធិបង្ការរបួសអាស៊ី ប្រចាំនៅកម្ពុជា ដែលបានមកពីរបាយការណ៍បណ្តោះអាសន្ន របស់រដ្ឋាភិបាលបង្ហាញថា នៅឆ្នាំ២០១៤ អ្នកស្លាប់ដោយគ្រោះថ្នាក់ចរាចរណ៍ មានចំនួនសរុប ២ ២២៦ នាក់ ក្នុងនោះមាន ១៦១៤ នាក់ជាអ្នកជិះម៉ូតូ។ របាយការណ៍បង្ហាញទៀតថា ចំណោមអ្នកជិះម៉ូតូ មានតែ ១២% ប៉ុណ្ណោះ ដែលបានពាក់មួកសុវត្ថិភាពការពារក្បាល។ ("មួកសុវត្ថិភាពមួយ ជួយជីវិតបានម្នាក់")