យ៉ាន់ ប៉ិច៖ «ប្ដីខ្ញុំសឹងក្លាយជាក្មេងដោយសារគ្រោះថ្នាក់ចរាចរណ៍»

2015-07-29 15:19:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយជួបគ្រោះថ្នាក់ចរាចរណ៍ ធ្វើឱ្យបុរសកូនបីមួយរូបក្លាយជាមនុស្សថ្មី។ អ្នកស្រី យ៉ាន់ ប៉ិច ប្រាប់ថា៖ «ប្ដីខ្ញុំសឹងក្លាយជាក្មេងដោយសារគ្រោះថ្នាក់ចរាចរណ៍»។

អ្នកស្រី យ៉ាន់ ប៉ិច មានស្វាមីឈ្មោះ វ៉ន វ៉ាន ហើយបច្ចុប្បន្នជាប្រជាពលរដ្ឋកំពុងរស់នៅ ភូមិទំពាំងឫស្សី ឃុំសំរោង ស្រុកព្រៃឈរ ខេត្តកំពង់ចាម។

កាលពីថ្ងៃទី ២០ ខែមេសា ឆ្នាំ២០១៥ លោក វ៉ន វ៉ាន បានជិះម៉ូតូម៉ាកគុបជ្រុងទាំងស្រវឹង និងមិនពាក់មួក ទៅបុកបង្គោលស៊ីម៉ងត៍ ជង់ចម្រឹងដែកមួយ ត្រង់តំបន់គល់ភ្នែក និងក្បាល នៅចន្លោះភូមិទំពាំងឫស្សី និងភូមិស្វាយព្រៃ ក្រោយត្រឡប់មកពីពិធីឡើងផ្ទះរបស់សាច់ញាតិ ដែលហេតុការណ៍នេះ ធ្វើឱ្យមានការភ្ញាក់ផ្អើលជាខ្លាំង។

អ្នកស្រី យ៉ាន់ ប៉ិច បញ្ជាក់ថា៖ «កាលនោះខ្ញុំអត់បានទៅកន្លែងកើតហេតុទេ ព្រោះគ្រាន់តែឮខ្ញុំទន់ដៃទន់ជើង ដួលសន្លប់តែម្ដង។ បងប្អូនថា យូរដែរទម្រាំពេទ្យដកគាត់ពីដែកនោះបាន ហើយបើនិយាយពីឈាមវិញ មិនបាច់និយាយ»។

ក្រោយមកក្រុមគ្រូពេទ្យខាងមន្ទីរពេទ្យស្គន់ បានបញ្ជូនលោក វ៉ន វ៉ាន មកមន្ទីរពេទ្យរុស្សី។ អ្នកប្រកបរបរកាត់ដេរ បន្តិចបន្តួចតាមផ្ទះយ៉ាន់ ប៉ិច រៀបរាប់ពីទុក្ខលំបាកថា គ្មានលទ្ធភាពឡើយ តែសំណាងល្អអ្នកស្រីមានប័ណ្ណក្រីក្រ ហើយមានអង្គការមួយ ជួយចេញថ្លៃវះកាត់ និង ព្យាបាលកាលគ្រានោះ តែសព្វថ្ងៃស្ត្រីកូនបីកំពុងជួបការលំបាក ព្រោះត្រូវរ៉ាប់រងបន្ទុកគ្រួសារទាំងស្រុង។

ប៉ិច ដែលក្លាយជាមេគ្រួសារបញ្ជាក់ថា ប្ដីរបស់អ្នកស្រីប្រៀបដូចជាកូនក្មេង មិនដឹងអ្វីម្នាក់អ៊ីចឹង ក្រោយត្រឡប់មកពីសម្រាកព្យាបាលពីមន្ទីរពេទ្យរុស្សីវិញ។

«ក្រហើយ ប្ដីឈឺទៀត! ហ៊ឺម...ពីមុនបានគាត់ជួយ លីស្រូវ ធ្វើការរកលុយចិញ្ចឹមគ្រួសារ។ គាត់ដូចកូនក្មេងអ៊ីចឹង ក្រោយវះកាត់។ គាត់អត់ចាំអីបានទាំងអស់ ជួនកាលអត់ស្គាល់ខ្ញុំផង។ ពេលណាយើងអត់នៅផ្ទះ គាត់ដើរទៅព្រៃក្រោម ឬទៅមាត់ស្រះតែឯង ដល់ពេលដឹងខ្លួន ទើបគាត់ដើរមកផ្ទះវិញ» អ្នកស្រីប្រាប់។

ទោះបីជាយ៉ាងណា ក្នុងរយៈពេល ២ ខែចុងក្រោយនេះ ជំងឺរបស់លោក វ៉ាន មានសភាពធូរស្រាលគ្រាន់បើច្រើន ដោយលោកចេះដឹង ស្គាល់បងប្អូន និង អាចធ្វើការបានបន្តិចបន្តួច ដូចជាដាំបាយ កាប់អុសជាដើម។

អ្នកស្រី ប៉ិច បន្ថែមថា អ្នកស្រីមានចិត្តសប្បាយរីករាយខ្លាំងណាស់ បន្ទាប់ឃើញអាការៈប្ដីធូរស្រាលឡើងវិញ ៖«បងអរមែនទែន បានគាត់ស្គាល់កូនស្គាល់ចៅណាអូន ពេលវះកាត់ហ្នឹង ពេទ្យអត់ហ៊ានធានាថា ប៉ះពាល់ ឬមិនប៉ះពាល់ក្បាលទេ តែឥលូវឃើញថាដឹងច្រើនហើយ»។

ក្នុងជំនួបជាមួយ Sabay អ្នកស្រីបានផ្ដែផ្ដាំទៅកាន់បងប្អូនខ្មែរទាំងអស់ថា សូមប្រុងប្រយ័ត្នក្នុងការធ្វើដំណើរ ហើយបើផឹកស្រាកុំបើកបរ ឬត្រូវពាក់មួកសុវត្ថិភាពឱ្យបានត្រឹមត្រូវ ដើម្បីជៀសវាងគ្រោះថ្នាក់ចរាចរណ៍ ដែលនាំខាតបង់ដល់គ្រួសារខ្លួន គ្រួសារអ្នកដទៃ និងសង្គមជាតិ។

ក្រើនរំលឹកថា បើយោងតាមរបាយកាណ៍បណ្ដោះអាសន្ន របស់រដ្ឋាភិបាល គ្រោះថ្នាក់ចរាចរណ៍ បានសម្លាប់មនុស្សជាមធ្យមជាង ៦ នាក់ និង របួសធ្ងន់ជិត ១៧ នាក់ក្នុង ១ ថ្ងៃ និង មានចំនួនអ្នកស្លាប់សរុប ២ ២២៦ នាក់កាលពីឆ្នាំ ២០១៤៕

ចុចអាន៖ ឯកឧត្ដម ខៀវ កាញារីទ្ធ បង្ហាញអនុសាសន៍ ៦ ចំណុចសំខាន់ៗ ដើម្បីកាត់បន្ថយគ្រោះថ្នាក់ចរាចរណ៍

ចុចអាន៖ នគរបាលនឹងពង្រាយកម្លាំងត្រួតពិនិត្យទ្រង់ទ្រាយធំនៅផ្លូវសំខាន់ៗចំនួន ៤

អត្ថបទ៖ អ៊ុំ សុភក្តិ