ទី​ភ្នាក់ងារ​ទេសចរ​កម្ពុជា​មួយ​ក្រុម​​រួម​ទាំង​បណ្ដាញ​សារព័ត៌មាន​ក្នុង​ស្រុក​ដែល​សរុប​មាន​គ្នា​ជាង ១៥ នាក់ បាន​ទទួល​ការ​អញ្ជើញ​ដើម្បី​ធ្វើ​ដំណើរ​ទេសចរ​សិក្សា​ស្វែង​យល់​ពី​សក្ដានុពល​ទេសចរ​របស់​ប្រទេស​កូរ៉េ។ ដំណើរ​កម្សាន្ត​ដែល​មាន​រយៈ​ពេល ៤ យប់ ៥ ថ្ងៃ​នេះ រៀបចំ​ឡើង​ដោយ​ក្រុមហ៊ុន​អាកាសចរ Asiana និង​មាន​ការ​សហការ​ពី​ទីភ្នាក់ងារ​ទេសចរ​កូរ៉េ KTO។

ក្នុង​ដំណើរ​ទេសចរ​កម្សាន្ត​នេះ ក្រុម​ទី​ភ្នាក់ងារ​ទេសចរ​កម្ពុជា​និង​អ្នក​សារព័ត៌មាន​កម្ពុជា​បាន​ធ្វើ​ដំណើរ​កម្សាន្ត​ទៅ​តំបន់​រមណីយដ្ឋាន​ទេសចរ​ល្បីៗ​នៅ​ប្រទេស​កូរ៉េ​តាំង​ពី​ទីក្រុង Seoul ដល់​ទីក្រុង Busan។

ក្រុម​ទេសចរ​បាន​ទៅ​ទស្សនា​ទីក្រុង​វប្បធម៌ Paju ដែល​មាន​ទីតាំង​ស្ថិត​នៅ​ភាគ​ខាង​ជើង​ឈៀង​ខាង​លិច​ទីក្រុង Seoul ក៏​ដូចជា​បាន​ទៅ​ទស្សនា​តំបន់​​ដ៏​រសើប DMZ ​​ដែល​ខណ្ឌ​ចែក​​ទឹកដី​រវាង​​ប្រទេស​កូរ៉េ​ខាង​ត្បូង​និង​ខាង​ជើង​​ជា​តំបន់​​ដែល​មាន​ការ​ការពារ​​និង​ប្រឈម​មុខ​ខ្លាំង​​បំផុត​ក្នុង​ពិភពលោក។ នៅ​ទីនោះ ក្រុម​អ្នក​ធ្វើ​ដំណើរ​​​បាន​​ចូល​ទៅ​​ទស្សនា​រូង​សម្ងាត់​ក្រោម​ដី​ជម្រៅ​រាប់​សិប​ម៉ែត្រ​ ក៏​ដូចជា​ទស្សនា​ស្ថានីយ​រថភ្លើង​ដែល​​ភ្ជាប់​ពី​កូរ៉េ​ខាង​ត្បូង​និង​កូរ៉េ​ខាង​ជើង និង​តំបន់​ប្រវត្តិសាស្ត្រ​មួយ​ចំនួន​ទៀត​។

បន្ទាប់​ពី​បញ្ចប់​ការ​ដើរ​កម្សាន្ត​នៅ​តំបន់​រមណីយដ្ឋាន​ប្រវត្តិសាស្ត្រ​និង​ទេសចរ​មួយ​ចំនួន​ ក្រុម​អ្នក​ធ្វើ​ដំណើរ​ក៏​បាន​ទៅ​ទស្សនា​នៅ OneMount ជា​កន្លែង​កម្សាន្ត​ដ៏​​ពេញនិយម​និង​ល្បី​បំផុត​មួយ​នៅ​លើ​ពិភពលោក ដែល​មាន​កន្លែង​ជិះ​ស្គី​លើ​ទឹកកក សួន​ទឹក​ និង​ហាង​លក់​ទំនិញ​ជា​ច្រើន។

នៅ​ថ្ងៃ​ទី​ពីរ​ក្រុម​​អ្នក​ចូលរួម​ដំណើរ​កម្សាន្ត​ក៏​បាន​ចាកចេញ​ពី​ទីក្រុង Seoul ឆ្ពោះ​ទៅ​ទីក្រុង​កំពង់ផែ Busan ដែល​ជា​ទីក្រុង​ធំ​ជាង​គេ​លំដាប់​ទី​ពីរ​របស់​កូរ៉េ​ខាង​ត្បូង តាម​រថភ្លើង​ល្បឿន​លឿន KTX។ ការ​ធ្វើ​ដំណើរ​តាម​រថភ្លើង​ដែល​បាន​ចំណាយ​ពេល​ជាង ៣ ម៉ោង ​បាន​ធ្វើ​ឲ្យ​អ្នក​ធ្វើ​ដំណើរ​​អាច​គយគន់​សម្រស់​ទេសភាព​ដ៏​ស្រស់​ត្រកាល​​ និង​ស្វែង​យល់​ពី​ជីវភាព​រស់នៅ​របស់​ពលរដ្ឋ​កូរ៉េ​នៅ​តាម​ទី​ជនបទ​ស្រុក​ស្រែ​ចម្ការ។

នៅ​ទីក្រុង Busan ក្រុម​អ្នក​​ទេសចរ​កម្ពុជា​បាន​ទៅ​កម្សាន្ត​នៅ​ឆ្នេរ Haeundae ជា​ឆ្នេរ​ដ៏​ស្រស់​ស្អាត​បំផុត​មួយ​ និង​​ទៅ​ស្វែង​យល់​ពី​ភូមិ​វប្បធម៌  Gamcheon Culture Village ដែល​មាន​ផ្ទះ​បុរាណៗ​ជាច្រើន​​ត្រូវ​បាន​សាង់សង់​នៅ​តាម​ចង្កេះ​ភ្នំ​និង​​ត្រូវ​​បាន​អភិរក្ស​ដើម្បី​បម្រើ​វិស័យ​ទេសចរ។​  ជាមួយ​គ្នា​នេះ​​ក៏​​បាន​ទស្សនា​ផ្សារ​លក់​អាហារ​សមុទ្រ​ស្រស់ៗ​នៅ Jalgachi Market និង Kukje Market និង​​​​ទស្សនា​តំបន់​ទេសចរទើប​បង្កើត​ថ្មី Oryudo Skywalk ដើម្បី​លម្ហែរ​អារម្មណ៍​​និង​បាន​​​គយគន់​មហាសមុទ្រ​ដ៏​ធំ​ល្វឹងល្វើយ ​និង​​បទពិសោធន៍​ការ​ដើរ​លើ​ស្ពាន​កញ្ចក់​​លើ​វេហាស៍​ដ៏​ព្រឺព្រួច។

នៅ​ទីក្រុង Busan អ្នក​ធ្វើ​ដំណើរ​ក៏​បាន​ទៅ​ទស្សនា​ព្រះវិហារ​ព្រះពុទ្ធសាសនា Yonggungsa ដែល​មាន​ទីតាំង​នៅ​លើ​ឆ្នេរ​ភាគ​ឦសាន​នៃ​ទីក្រុង​ Busan។ Yonggungsa ជា​ព្រះវិហារ​ព្រះពុទ្ធ​ដ៏​កម្រ​មួយ​ដែល​ត្រូវ​បាន​សាងសង់​ឡើង​នៅ​តាម​បណ្ដោយ​បន្ទាត់​ឆ្នេរសមុទ្រ ដែល​ខុស​ប្លែក​ពីព្រះវិហារ​ភាគ​ច្រើន​បំផុត​នៅ​ក្នុង​ប្រទេស​កូរ៉េ​ដែល​ត្រូវ​បាន​សាងសង់​ឡើង​នៅ​លើ​កំពូល​​ភ្នំ។

នៅ​ទីក្រុង Seoul ក្រុម​អ្នក​ធ្វើ​ដំណើរ​ក៏​បាន​ទៅ​ទស្សនា​សួន​ឧទ្យាន Namsan Park និង​ប៉ម Nansan Tower។ Namsan Park ជា​ឧទ្យាន​ដ៏​ធំ​បំផុត​នៅ​ក្នុង​ទីក្រុង Seoul ដែល​គ្រប​ដណ្តប់​តំបន់​ដ៏​ធំ​និង​មាន​ផ្លូវ​ដើរ​ដ៏​ស្រស់ស្អាត​ជាមួយ​សម្រស់​ធម្មជាតិ​ដ៏​សែន​មនោរម្យ​។ ឧទ្យាន​នេះ​មាន​កន្លែង​សម្រាប់​ទាក់ទាញ​ភ្ញៀវ​ទេសចរដូចជា​ខ្សែរថ​ខ្សែ​កាប និង​ប៉ម Namsan ដែល​​អាច​​សម្លឹង​មើល​សម្រស់​​ទីក្រុង​ Seoul ដ៏​ស្រស់​ឆើត។

ក្នុង​ដំណើរ​ទេសចរ​មក​ប្រទេស​កូរ៉េ ក្រុម​អ្នក​ចូលរួម​​ដំណើរ​កម្សាន្ត​របស់កម្ពុជា​ក៏​ត្រូវ​បាន​ជូន​ទៅ​ទស្សនា​តំបន់ Myeong Dong Down Town Street ដែល​ជា​តំបន់​ដែល​សំបូរ​ហាង​លក់​ទំនិញ​ដ៏​ពេញនិយម​នៅ​ក្រុង Seoul ដែល​មាន​លក់​របស់​របរ​​យ៉ាង​សំបូរ​បែប​ជាពិសេស​​សម្លៀកបំពាក់​និង​គ្រឿង​សម្អាង​ល្បីៗ​ទាំង​យីហោ​ក្នុង​ស្រុក​​និង​មក​​ពី​បរទេស។

ជាមួយ​គ្នា​នេះ​ដែរ ក្រុម​អ្នក​ដំណើរ​​ក៏​បាន​ទៅ​ទស្សនា​រាជវាំង Gyeong-Bok Royal Palace និង​សារមន្ទីរជាតិ National Folklore Museum ដែល​មាន​តម្កល់​ស្នាដៃ​សិល្បៈ​និង​វត្ថុ​បុរាណ​ជា​ច្រើន​របស់​ជនជាតិ​កូរ៉េ​ពី​ជំនាន់​ដើម។ កាន់​តែ​ពិសេស​នោះ ការ​បាន​ភ្លក្ស​រសជាតិ​ម្ហូប​អាហារ​បែប​ប្រពៃណី​របស់​កូរ៉េ និង​ការ​ទស្សនា​ការ​សំដែង​សិល្បៈ​កម្សាន្ត​ដ៏​រស់រវើក​ជា​ច្រើន​ទៀត៕

អត្ថបទ៖ ប៊ុណ្ណារ៉ា