ហេតុអ្វីបានជាមានអ្នកប្រើដៃស្តាំ ច្រើនជាងអ្នកប្រើដៃឆ្វេង?

2015-08-12 00:06:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តប្រហែលជាដឹងហើយថាមនុស្សភាគច្រើនបានប្រើដៃស្ដាំសម្រាប់ការងារប្រចាំថ្ងៃ ដូចជាការចាប់កាន់របស់ប្រើប្រាស់ ញ៉ាំអាហារ ឬការកត់ត្រាមេរៀនជាដើម ប៉ុន្តែក្នុងនោះក៏គេសង្កេតឃើញមានអ្នកប្រើដៃឆ្វេងនោះដែរ។ តើហេតុអ្វីបានជាមនុស្សភាគច្រើនមានទម្លាប់ប្រើដៃស្ដាំ?

អ្នកប្រើដៃស្ដាំ

តាម ទិន្នន័យស្រាវជ្រាវក្នុងសហរដ្ឋអាមេរិកបានឲ្យដឹងថា មានមនុស្សប្រហែល៧០ ទៅ៩៥ភាគរយ ទម្លាប់ប្រើដៃស្ដាំក្នុងសកម្មភាពប្រចាំថ្ងៃ ចំណែកឯមនុស្សប្រហែលពី៥ទៅ៣៥ភាគរយប៉ុណ្ណោះដែលទម្លាប់ប្រើដៃឆ្វេង។

ការស្រាវជ្រាវវិទ្យាសាស្ត្ររួមទូទៅ បានបញ្ជាក់ថា ទាក់ទងសកម្មភាពប្រចាំថ្ងៃរបស់មនុស្ស តួនាទីនៃខួរក្បាលទាំងពីរផ្នែកគឺ (ផ្នែកខាងឆ្វេង និងផ្នែកខាងស្ដាំ) ដែលជាអ្នកបញ្ជាទម្លាប់នៃការប្រើប្រាស់ដៃឆ្វេង ឬដៃស្ដាំ ដែលមានន័យថាខួរក្បាលផ្នែកខាងឆ្វេង បញ្ជាដល់ដៃខាងស្ដាំ ចំណែកខួរក្បាលផ្នែកខាងស្ដាំគឺបញ្ជាដៃខាងឆ្វេង។

បុគ្គលល្បីៗមួយចំនួនដែលប្រើដៃឆ្វេង

សម្រាប់ការស្រាវជ្រាវមួយរបស់សាកលវិទ្យាល័យ Pennsylvania សហរដ្ឋអាមេរិក ដែលដឹកនាំដោយសាស្ត្រាចារ្យ Clare Porac បានបង្ហាញថា គឺកត្តាហ្សែនបានចូលរួមចំណែកទាក់ទងនឹងទម្លាប់ប្រើស្ដាំ ច្រើនជាងដៃឆ្វេងក្នុងសកម្មភាពប្រចាំថ្ងៃ ។ ហ្សែនម៉្យាងដែលតំណាងដោយអក្សរ D ជាហ្សែនដៃស្ដាំ ដែលមាននៅក្នុងចំណោមមនុស្សភាគច្រើន ចំណែកឯហ្សែនម្យ៉ាងទៀត ដែលតំណាងដោយអក្សរ C អាចឲ្យមនុស្សប្រើដៃស្ដាំក៏បាន ឆ្វេងក៏បាននោះ មានមិនច្រើននោះទេ។ ក្រៅពីកត្តាខួរក្បាល និងហ្សែន នៅមានកត្តាមួយចំនួនទៀតគឺបរិស្ថានជុំវិញខ្លួន ដែលជំរុញឲ្យមានអ្នកប្រើដៃស្ដាំច្រើន តួយ៉ាងកាលពីថ្នាក់បឋមសិក្សា គ្រូបង្រៀនឲ្យកូនសិស្សទម្លាប់ប្រើស្តាំ ការទម្លាប់ឲ្យកូនៗប្រើដៃស្ដាំបរិភោគអាហារ រួមទាំងការរចនា ឬផលិតឧបករណ៍ប្រើប្រាស់ផ្សេងៗសម្រាប់តែអ្នកប្រើដៃស្ដាំ រាប់តាំងពីបង្កាន់ដៃទ្វារ កន្ត្រៃ កូនកណ្ដុរ (Mouse បញ្ជាកុំព្យូទ័រ) ជាដើម៕