គ្រូក្រុមម្ចាស់ជើងឯកឆ្នាំចាស់មិនហ៊ានធានាតំណែងជើងឯកជាតិ 2015 U-13

2015-08-26 16:44:35
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកគ្រូបង្វឹកក្រុមបាល់ទាត់យុវជនរតនៈក្រោមអាយុ១៣ឆ្នាំមិនហ៊ានធានាពីការពារតំណែងជើងឯកចាស់របស់ខ្លួនឡើយសម្រាប់ឆ្នាំនេះ ខណៈការប្រកួតបាល់ទាត់ជ្រើសរើសជើងឯកជាតិក្រោមអាយុ ១៣ឆ្នាំ(U-13)ឆ្នាំ២០១៥នឹងចាប់ផ្ដើមពីថ្ងៃទី២៨ ខែសីហា រហូតដល់ថ្ងៃទី៨ ខែកញ្ញា ឆ្នាំ២០១៥ នៅទីលានបាល់ទាត់មជ្ឈមណ្ឌលជាតិបាទី ខេត្តតាកែវ។

លោក ទេព្យ ឈិន គ្រូបង្វឹកក្រុមយុវជនរតនៈបានឲ្យដឹងថា កូនក្រុមរបស់លោកដែលប្រជែងបានជើងឯកកាលពីឆ្នាំមុនបានផុតអាយុអស់ហើយ ដោយឡែកឆ្នាំនេះសុទ្ធតែជាកីឡាករដែលត្រូវបានជ្រើសរើសថ្មីៗ និងមានកាយសម្បទាមិនស្មើគ្នាទៀតផង។ ឆ្នាំនេះលោកមិនរំពឹងថា អាចការពារតំណែងជើងឯកបានទេ សមត្ថភាពកូនក្រុមរបស់លោកមានគ្រប់គ្រាន់ ប៉ុន្តែអាចនឹងចាញ់ក្រុមផ្សែងត្រង់មាឌ កម្លាំង និងល្បឿន។

គ្រូបង្គោលរូបនេះប្រាប់ទៀតថា ក្រុមយុវជនរតនៈមានការបណ្ដុះបណ្ដាលច្រើនខែមកហើយ គិតចាប់ពីចូលឆ្នាំខ្មែររួចមកម្ល៉េះ ប៉ុន្តែទោះបីជាការការពារតំណែងជើងឯកមានការលំបាកក៏កូនក្រុមរបស់លោកបានតាំងចិត្តយ៉ាងខ្លាំងដើម្បីប្រកួតឲ្យអស់ពីសមត្ថភាព។ សម្រាប់ទម្រង់លេង និងបច្ចេកទេសពួកគេមានចំណុចល្អច្រើន ដូចជាការបញ្ជូនបាល់ និងការយល់ចិត្តគ្នាលើទីលាន។

គ្រូគណិតវិទ្យារូបនេះបានបន្ថែមថា មូលហេតុដែលធ្វើឲ្យលោកគិតថាពិបាកការពារតំណែងជើងឯក ពីព្រោះឆ្នាំនេះកូនក្រុមរបស់លោកមានសមត្ថភាពនៅក្រោមកីឡាកររបស់លោកកាលពីឆ្នាំមុន។ ទន្ទឹមនឹងនោះក្រុមដែលលោកគិតថាពិបាកយកឈ្នះមានច្រើន ពិសេសគឺក្រុមដែលមានទីតាំងនៅភ្នំពេញ និងក្រុមអធិរាជភ្នំពេញជាដើម។

ក្រុមយុវជនរតនៈនឹងប្រកួតដំបូងរបស់ខ្លួននាថ្ងៃទី២៨ ខែសីហា ខានស្អែកជាមួយក្រុមរស្មីក្រហមវគ្គសន្សំពិន្ទុក្នុងពូល A ។ សម្រាប់ការប្រកួតឆ្នាំនេះមានក្រុមចំនួន៣២ដែលត្រូវបានបែងចែកជា៨ពូលដែលក្នុង១ពូលមាន៤ក្រុមដែលនឹងចាប់ដំណើរការប្រកួតនៅថ្ងៃទី២៨ ខែសីហា រហូតដល់ថ្ងៃទី៨ ខែកញ្ញា ឆ្នាំ២០១៥ នៅទីលានបាល់ទាត់មជ្ឈមណ្ឌលជាតិបាទី ខេត្តតាកែវ៕