យ៉ាងគួ សៀវឡុងនី ជំនាន់ថ្មីក្លាយជាគូស្នេហ៍មែនទែនក្រោយសម្ដែងជាមួយគ្នា

2015-08-27 20:48:20
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងស្រីតៃវ៉ាន់ Michelle Chen តែងតែជាប្រធានបទនៅក្នុងបណ្ដាញសង្គមផ្សេងៗ ក្រោយសម្ដែងជាតួ សៀវ ឡុងនី ក្នុងរឿងភាគចិន "The Romance of the Condor Heroes” កាលពីចុងឆ្នាំ២០១៤។ យោងតាមការរាយការណ៍ពីសារព័ត៌មានចិនបានទម្លាយថា តារាស្រីវ័យ៣២ឆ្នាំរូបនេះ កំពុងមានទំនាក់ទំនងស្នេហាជាមួយតារាសម្ដែងប្រុស Chen Xiao ដែលដើរតួឯកប្រុស យ៉ាងគួ បន្ទាប់ពីបានសម្ដែងជាមួយគ្នា។

កាលពីដើមខែមិថុនាឆ្នាំ២០១៥នេះ Chen Xiaoបានបង្ហាញខ្លួននៅសណ្ឋាគារមួយក្នុងទីក្រុង Shanghai ធ្វើឲ្យសារព័ត៌មានគិតថា គេប្រហែលមកថតរឿងបន្តពីទីក្រុង Tainjin ស្របពេលដែល Michelle ក៏ស្នាក់នៅសណ្ឋាគារនោះដូចគ្នា។ ប៉ុន្តែគាប់ជូនថ្ងៃនោះក៏ត្រូវជាថ្ងៃខួបកំណើតរបស់ Michelle។ នេះជាចំណុចនាំឲ្យអ្នកសារព័ត៌មានគ្រប់គ្នាចាប់ផ្ដើមសង្ស័យអ្នកទាំងពីរ។

ពីរបីថ្ងៃបន្ទាប់ សារព័ត៌មានចិនបានបង្ហើបថា Michelleបានជិះយន្តហោះទៅកាន់ទីក្រុង Tainjin ដើម្បីជួប Chen។ ថ្វីបើសារព័ត៌មានមិនអាចផ្ដិតយករូបពួកគេទាំងពីរនៅជាមួយគ្នា ប៉ុន្តែពួកគេបានផ្សាយថា អ្នកទាំងពីរត្រូវបានគេមើលឃើញនៅសណ្ឋាគារតែមួយ។ ខណៈកាលពីថ្ងៃទី៥ ខែកក្កដាជាថ្ងៃខួបកំណើតរបស់ Chen Xiao តារាសម្ដែងស្រី Michelle ក៏បានហោះមកអបអរសាទរក្នុងពិធីនោះថែមទៀតផង។

កាលពីដើមខែនេះ សារព័ត៌មានបានចុះផ្សាយថា តារាសម្ដែងចិន និងតៃវ៉ាន់ទាំងពីរបាននៅសណ្ឋាគារជាមួយគ្នាម្ដងទៀតក្នុងទីក្រុង Shanghai ។

តែអ្វីដែលកាន់តែច្បាស់ពីទំនាក់ទំនងស្នេហារវាងតួ សៀវ ឡុងនី និងយ៉ាងគួ ក្រោយអ្នកគ្រប់គ្រងរបស់ Michelle បានប្រាប់សារព័ត៌មានតៃវ៉ាន់ថា៖ "ខ្ញុំសប្បាយចិត្តចំពោះ Michelle។ ខ្ញុំសូមជូនពរពួកគេឲ្យមានសុភមង្គល។ ខ្ញុំសង្ឃឹមថាមនុស្សគ្រប់គ្នានឹងសប្បាយចិត្តនិងជូនពរនាងឲ្យជួបតែសុភមង្គល" ៕