ចំណងស្នេហ៍តារាល្បីៗ ក្លាយជាប្ដីប្រពន្ធមែនទែនក្រោយសម្ដែងរឿងរួមគ្នា

2015-01-14 16:00:02
ចំនួនមតិ 0 | ចំនួនចែករំលែក 0

ចន្លោះមិនឃើញ

អនុស្សាវរីយផ្អែមល្ហែមពេលសម្ដែងក្នុងខ្សែភាពយន្ត បានធ្វើឲ្យតារាប្រុសស្រីចាប់អារម្មណ៍លើគ្នាទៅវិញទៅមក ហើយតារាខ្លះបានបង្កាត់ភ្លើងស្នេហ៍នៅខាងក្រៅឆាក រហូតដល់រៀបការជាមួយគ្នាក្លាយជាប្ដីប្រពន្ធពិតប្រាកដទៀតផង។ ថ្ងៃនេះ Sabay នឹងបង្ហាញពីគូស្នេហ៍តារាល្បីៗចំនួន ៨គូ ទាំងតារាអាស៊ី និងហូលីវូដ ដែលបានជួបគ្នាដំបូងតាមរយៈការសម្ដែងក្នុងខ្សែភាពយន្ត។ តាមដានរឿងរ៉ាវស្នេហាពួកគេខាងក្រោមនេះ៖

១. តារាអាមេរិក Brad Pitt និង Angelina Jolie ជួបគ្នាក្នុងរឿង "Mr. and Mrs. Smith”

គូស្នេហ៍ដ៏ល្បីល្បាញបំផុតក្នុងពិភពសិល្បៈហូលីវូដ មួយគូនេះ បានជួបគ្នាដំបូងកាលពីឆ្នាំ២០០៤ នៅពេលសម្ដែងរឿង “Mr. and Mrs. Smith” ស្របពេលដែល Brad Pitt នៅជាស្វាមីរបស់តារាសម្ដែង Jennifer Aniston នៅឡើយ។ មួយឆ្នាំក្រោយមក Brad Pitt ក៏បានលែងលះប្រពន្ធដើមរបស់ខ្លួន និងបានសាងចំណងស្នេហ៍ជាមួយ Angelina Jolie រហូតដល់ខែសីហា ឆ្នាំ២០១៤ ទើបរៀបការជាមួយគ្នា។

២. តារាអាមេរិក Ben Affleck និង Jennifer Garner ជួបគ្នាក្នុងរឿង "Daredevil”

នៅឆ្នាំ២០០២ ពួកគេបានសម្ដែងជាតួឯករួមគ្នាក្នុងខ្សែភាពយន្តវីរបុរស "Daredevil” ហើយនៅឆ្នាំ២០០៤ ពួកគេក៏បានក្លាយជាគូស្នេហ៍។ Affleck បានសុំមិត្តស្រីរបស់ខ្លួនរៀបការចំថ្ងៃខួបកំណើតទី៣៣របស់នាង។ ពួកគេបានរៀបការជាមួយគ្នានៅថ្ងៃទី២៩ ខែមិថុនា ឆ្នាំ២០០៥ នៅពេល Garner កំពុងមានផ្ទៃពោះ ៤ខែ។ មកដល់បច្ចុប្បន្នពួកគេមានកូន៣នាក់ជាមួយគ្នា។

៣. តារាអាមេរិក Chris Pratt និង Anna Faris

Pratt បានជួប Anna Faris នៅពេលសម្ដែងរឿង "Take Me Home Tonight” ជាមួយគ្នាកាលពីឆ្នាំ២០០៧ ប៉ុន្តែកាលនោះ Pratt មិនបានសម្ដែងជាតួឯកជាមួយភរិយាឡើយ។ ពីរឆ្នាំក្រោយមកពួកគេបានភ្ជាប់ពាក្យ ហើយក៏រៀបការជាមួយគ្នានៅថ្ងៃទី៩ ខែកក្កដា ឆ្នាំ២០០៩។ នៅឆ្នាំ២០១២ ពួកគេទទួលបានកូនប្រុសម្នាក់ឈ្មោះ Jack។

៤. តារាសិង្ហបុរី Fann Wong និង Christopher Lee ជួបគ្នាក្នុងរឿង "Star Search: First Encounter”

ពួកគេគឺជាដៃគូសម្ដែងជាមួយគ្នាដ៏ល្បីល្បាញនៅប្រទេសសិង្ហបុរី តាំងពីឆ្នាំ១៩៩៥ ដែលក្នុងនោះរឿងដែលធ្វើឲ្យពួកគេល្បីល្បាញខ្លាំងគឺរឿង "វីរបុរសបុរសឥន្ទ្រីទេព" (យ៉ាងគួរ និងសៀវឡុងនី)។ នៅឆ្នាំ២០០៥ តារាទាំងពីរដួងបានប្រកាសអំពីចំណងស្នេហ៍ជាសាធារណៈ ក្រោយពីមានពាក្យចចាមអារ៉ាមជាច្រើនតាំងពីឆ្នាំ២០០២។ ពួកគេបានរៀបអាពាហ៍ពិពាហ៍ជាមួយគ្នាកាលពីថ្ងៃទី៩ ខែឧសភា ឆ្នាំ២០០៩ ហើយនៅខែសីហា ឆ្នាំ២០១៤ Fann Wong ក៏សម្រាលបានកូនប្រុសម្នាក់។

៥. តារាសិង្ហបុរី Qi Yuwu និង Joanne Peh ជួបគ្នាក្នុងរឿង "Beautiful Connection”

Joannae Peh បានស្គាល់ Qi Yuwu តាំងពីសម្ដែងរឿង "Beautiful Connection” កាលពីឆ្នាំ២០០២ ដែលជារឿងភាគដំបូងរបស់នាង។ ប៉ុន្តែពួកគេទើបតែចាប់ផ្ដើមទំនាក់ទំនងស្នេហាកាលពីខែសីហា ឆ្នាំ២០១៣ប៉ុណ្ណោះ ហើយក៏បានរៀបការជាមួយគ្នា នៅថ្ងៃទី៩ ខែសីហា ឆ្នាំ២០១៤។ ពួកគេធ្លាប់សម្ដែងក្នុងរឿងភាគរួមគ្នាចំនួន៦រឿងទៀត រួមទាំងរឿង "C.L.I.F” និងរឿង "ជីវិតនារីនូយ៉ា"។

៦. តារាកូរ៉េខាងត្បូង Lee Bo Young និង Ji Sung ជួបគ្នាក្នុងរឿង "Save the Last Dance for Me”

គូស្នេហ៍តារាសម្ដែងកូរ៉េខាងត្បូង Lee Bo Young និង Ji Sung បានជួបគ្នាដំបូងពេលសម្ដែងរឿង "Save the Last Dance for Me” ជាមួយគ្នាកាលពីឆ្នាំ២០០៤។ ពួកគេបានប្រកាសចំណងស្នេហ៍ជាសាធារណនៅឆ្នាំ២០០៧ ហើយក៏បានរៀបការនឹងគ្នានៅឆ្នាំ២០១៣ ដែលនៅឆ្នាំនោះ Lee Bo Young ត្រូវបានបោះឆ្នោតជាតារាស្រីឆ្នើមប្រចាំឆ្នាំនៅកូរ៉េខាងត្បូង។

៧. តារាហ្វីលីពីន Marian Rivera និង Dingdong Dantes ជួបគ្នាក្នុងរឿង "ម៉ារីម៉ា"

ភាពយន្តភាគម៉ារីម៉ា កាលពីឆ្នាំ២០០៧ មិនត្រឹមតែធ្វើឲ្យកេរ្តិ៍ឈ្មោះតារាសម្ដែង Marian Rivera ល្បីខ្លាំងនោះទេ ប៉ុន្តែរឿងនេះបានធ្វើឲ្យនាងបានជួបនឹងស្វាមី Dingdong Dantes ផងដែរ ដែលសម្ដែងជាតួប្រុស សូជីអូ។ ក្រោយពីបានសម្ដែងរឿងជាមួយគ្នាមួយចំនួនទៀត អ្នកទាំងពីរក៏បានក្លាយជាគូស្នេហ៍នៅឆ្នាំ២០១០ ហើយក៏បន្តចំណងស្នេហ៍រហូតដល់ថ្ងៃទី៣០ ខែធ្នូ ឆ្នាំ២០១៤ ទើបរៀបការជាមួយគ្នា។

៨. តារាឥណ្ឌា Sushant Singh Rajput និងAnkita Lokhande ជួបគ្នាក្នុងរឿង "ជីវិតស្ត្រីមេផ្ទះ"

គូស្នេហ៍តារាល្បីឥណ្ឌា Sushant និង Ankita បានជួបគ្នាពេលសម្ដែងរឿងភាគ "Pavitra Rishta” (ជីវិតស្ត្រីមេផ្ទះ) កាលពីឆ្នាំ២០០៩ ហើយក៏បានក្លាយជាគូស្នេហ៍ភ្លាមៗ។ Suhant បានសុំមិត្តស្រីរបស់ខ្លួនរៀបការ តាមរយៈទូរទស្សន៍ជាតិ កាលពីខែកុម្ភៈ ឆ្នាំ២០១១។ បើទោះជាអ្នកទាំងពីរមិនទាន់រៀបការជាមួយគ្នា ប៉ុន្តែពួកគេបានរស់នៅក្រោមដំបូលតែមួយរយៈពេល ៣ឆ្នាំមកហើយ ហើយ Sushant បានបញ្ជាក់ថាអាពាហ៍ពិពាហ៍របស់ពួកគេនឹងកើតឡើងក្នុងពេលឆាប់ៗនេះ ៕

ចុចអាន៖តារាស្រីល្បីៗ ៩ដួង មានគូស្នេហ៍ជាប្រុសក្មេង អាយុខុសគ្នាឆ្ងាយ

ចុចអាន៖តារាចិនល្បីៗ ៦រូប ដែលមានប្រពន្ធជាកំពូលអ្នកមាន

ដោយ៖ វ៉ាន់ថន