តោះ! រៀនប្រើអក្សរយូនីកូដ តាមកម្មវិធីរៀនវាយអក្សរខ្មែរយូនីកូដ

2015-09-04 15:29:57
ចំនួនមតិ 0 | ចំនួនចែករំលែក 0

ចន្លោះមិនឃើញ

រៀនវាយអក្សរខ្មែរយូនីកូដ ជាកម្មវិធីដ៏មានសារប្រយោជន៍មួយសម្រាប់អ្នកមិនទាន់ចេះប្រើប្រាស់អក្សរយូនីកូដ អាចសិក្សាស្វែងយល់និងរៀនវាយអក្សរយូនីកូដឲ្យបានកាន់តែប្រសើរ។

ទេព សុវិចិត្រ យុវជនវ័យក្មេងជាអ្នកអភិវឌ្ឍកម្មវិធីរៀនវាយអក្សរខ្មែរយូនីកូដនេះ។ វិចិត្របានប្រាប់ Sabay ថា ការអភិវឌ្ឍកម្មវិធីរៀនវាយអក្សរខ្មែរយូនីកូដ ធ្វើឡើងក្នុងគោលបំណងផ្ដល់មធ្យោបាយដ៏ងាយស្រួល សម្រាប់អ្នកដែលចង់ចេះវាយអក្សរខ្មែរតាមបែបយូនីកូដដែលកម្មវិធីនេះនឹងបង្រៀនអ្នកប្រើប្រាស់ក្នុងការរៀនវាយអក្សរខ្មែរតាមយូនីកូដបានកាន់តែប្រសើរ។

បើតាមអ្នកអភិវឌ្ឍកម្មវិធីវ័យក្មេងរូបនេះបញ្ជាក់ថា កម្មវិធីរៀនវាយអក្សរខ្មែរយូនីកូដគឺយកលំនាំតាមកម្មវិធីរៀនវាយអក្សរខ្មែរយូនីកូដរបស់គម្រោងខ្មែរអូអេស ដែលប្រើនៅលើ Windows។ កម្មវិធីនេះបានយកឯកសារមេរៀន និងមូលដ្ឋានគ្រឹះមួយចំនួនពីកម្មវិធីដើមរបស់គម្រោងខ្មែរអូអេស។

កម្មវិធីរៀនវាយអក្សរខ្មែរយូនីកូដរបស់យុវជនរូបនេះ អាចប្រើបាននៅលើប្រព័ន្ធប្រតិបត្តិការ Windows, Linux។ ដោយឡែកនៅលើ Mac OS កំពុងស្ថិតនៅក្នុងដំណាក់តេស្តសាកល្បងនៅឡើយ។

របៀបប្រើប្រាស់

អ្នកចាំបាច់ត្រូវប្រើក្ដារចុច NiDA Standard (កំណែ១.០)។
ពេលអ្នកបើកកម្មវិធីនេះដំបូង សូមចុច «ជ្រើសរើសមេរៀន» ដែលស្ថិតក្រោមប្រអប់សេចក្ដីណែនាំ បន្ទាប់មកចុចចាប់ផ្ដើម។
ប្ដូរក្ដារចុចទៅជាខ្មែរ នៅពេលចាប់ផ្ដើមវាយ។
កម្មវិធីនេះមិនរក្សាទុកការរៀនរបស់អ្នកនោះទេ ដូច្នេះវាមិនចាំថាអ្នកវាយដល់មេរៀនណានោះទេ នៅពេលអ្នកចាកចេញពីទីនេះ។

តោះ! រៀនសាកល្បងកម្មវិធីរៀនវាយអក្សរខ្មែរយូនីកូដដើម្បីដឹងថាអ្នកមានសមត្ថភាពប្រើអក្សរយូនីកូដល្អកម្រិតណា? ចុចទីនោះដើម្បីចូលប្រើកម្មវិធី រៀនវាយអក្សរខ្មែរយូនីកូដ

អត្ថបទ៖ ប៊ុណ្ណារ៉ា