2016 AFC U-16 ៖ កម្ពុជា ប៉ះថៃ ល្ងាចនេះ ខណៈម្ចាស់ផ្ទះសិង្ហបុរី ជួបកូរ៉េខាងជើង

2015-09-04 17:53:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជម្រើសជាតិកម្ពុជាអាយុក្រោម ១៦ឆ្នាំ(U-16) នឹងប៉ះក្រុមខ្លាំងថៃនាម៉ោង១៧ម៉ោងនៅសិង្ហបុរី (ម៉ោង៤ល្ងាចនៅកម្ពុជា) ខណៈម្ចាស់ផ្ទះ U-16 សិង្ហបុរីជួបកូរ៉េខាងជើងនាម៉ោង២០:០០ ដែលទាំងពីរគូប្រកួតនៅកីឡដ្ឋាន Jalan Basar Stadium ប្រទេសសិង្ហបុរី សម្រាប់ការប្រកួតពានរង្វាន់ 2016 AFC U-16 Championship វគ្គជម្រុះក្នុងពូលH។

ក្រុមកីឡាករជម្រើសជាតិ U-16 កម្ពុជា

លោក Iki Yusuke គ្រូបង្គោល U-16 កម្ពុជាធ្លាប់បានលើកឡើងកាលពីពេលកន្លងទៅថា ក្រុមដែលលោកព្រួយបារម្ភធំបំផុតគឺកូរ៉េខាងជើងដែលកម្ពុជាបានចាញ់កាលប្រកួតទី១។ ចំណែកដៃគូថ្ងៃនេះ U-16 ថៃទោះជាទើបតែទទួលបានជើងឯកក្នុងពានរង្វាន់ 2015 AFF U-16 Championship ដែលកម្ពុជាធ្វើជាម្ចាស់ផ្ទះនោះក៏ពិតមែន ប៉ុន្តែកម្ពុជាក៏បានសិក្សាពីទម្រង់លេង របៀបប្រយុទ្ធខ្លះៗ ដែរជាហេតុធ្វើឲ្យ U-16 កម្ពុជាមិនសូវមានការព្រួយបារម្ភខ្លាំងនោះទេ។

U-16 កម្ពុជាបានចាញ់យ៉ាងចាស់ដៃក្រោមថ្វីជើងក្រុមខ្លាំងកូរ៉េខាងជើងរហូតដល់ទៅ៧-០។ ចំណែក U-16 ថៃវិញទទួលបាន៣ ពិន្ទុពីម្ចាស់ផ្ទះសិង្ហបុរីក្រោយយកឈ្នះ៥-០។ វគ្គជម្រុះនៃពានរង្វាន់ 2016 AFC U-16 Championship បានចាប់ផ្ដើមដំណើរការប្រកួតពីថ្ងៃទី២ រហូតដល់ថ្ងៃទី២០ ខែកញ្ញា ឆ្នាំ២០១៥។ មានប្រទេសចំនួន ៤៥បែងចែកជា ១១ពូលដោយប្រកួតប្រជែងយកក្រុមចំនួន ១៦ ទៅប្រកួតវគ្គ ១៦ ក្រុមចុងក្រោយនៅប្រទេសឥណ្ឌាដែលនឹងដំណើរការប្រកួតចាប់ពីថ្ងៃទី១៥ ខែកញ្ញា ដល់ថ្ងៃទី២ ខែតុលា ឆ្នាំ២០១៦៕

ក្រុមកីឡាករជម្រើសជាតិ U-16 ថៃ

ក្រុមកីឡាករ U-16 សិង្ហបុរី

ក្រុម U-16 កូរ៉េខាងជើង (រូបថត៖ Google)

តារាងកម្មវិធីប្រកួតថ្ងៃនេះAFC U-16
កាលបរិច្ឆេទ	ក្រុម	ប្រកួត	ក្រុម	ម៉ោង	ទីលាន
៤/០៩/១៥	U-16 កម្ពុជា	Vs	U-16 ថៃ	៥:០០	Jalan Basar Stadium
៤/០៩/១៥	U-16 សិង្ហបុរី	Vs	U-16 កូរ៉េខាងជើង	៨:០០	Jalan Basar Stadium