មិនធម្មតា កញ្ញា ហុង សុភា នាំ យុវជនប៉ៃលិនឡើងវគ្គ៤ក្រុមជើងឯកថ្នាក់ជាតិ U-13
- 2015-09-04 23:57:18
- ចំនួនមតិ 0 | ចំនួនចែករំលែក 0
មិនធម្មតា កញ្ញា ហុង សុភា នាំ យុវជនប៉ៃលិនឡើងវគ្គ៤ក្រុមជើងឯកថ្នាក់ជាតិ U-13
ចន្លោះមិនឃើញ
ពិតជាមិនធម្មតាយុវតី ហុង សុភា គ្រូបង្វឹកក្រុមយុវជនខេត្តប៉ៃលិនបានបន្តនាំក្រុមរបស់កញ្ញាឡើងដល់វគ្គ ៤ក្រុមចុងក្រោយ នៃការប្រកួតជ្រើសរើសជើងជាតិអាយុក្រោម១៣ឆ្នាំ បន្ទាប់ពីយកឈ្នះយុវជនអធិរាជភ្នំស្វាយ ៨-១ ក្នុងវគ្គ៨ក្រុមចុងក្រោយកាលពីល្ងាចថ្ងៃទី៣ ខែកញ្ញា ឆ្នាំ២០១៥ នៅទីលានបាល់ទាត់មជ្ឈមណ្ឌលជាតិបាទីខេត្តតាកែវ។
ក្រុមយុវជនត្បូងប៉ៃលិន(រូបថតផ្ដល់ឲ្យ)
កញ្ញា ហុង សុភា បានឲ្យដឹងថា ភាពជោគជ័យក្នុងវគ្គ៨ក្រុមចុងក្រោយបានកើតមានឡើងដោយសារការលេងប្រកបដោយស្មារតីប្រុងប្រយ័ត្ន និងការយល់ចិត្តគ្នាលើទីលានរបស់ក្រុមត្បូងប៉ៃលិន។ ដោយឡែកថ្ងៃជួបក្រុមខ្លាំងយុវជនខេត្តពោធិ៍សាត់វគ្គពាក់កណ្តាលផ្តាច់ព្រ័ត្រនារសៀលថ្ងៃសៅរ៍ស្អែកនេះ ក្រុមខេត្តប៉ៃលិនរបស់នាងត្រូវតែប្រុងប្រយ័ត្នឲ្យបានកាន់តែខ្ពស់ នៅតំបន់ការពារ និងប្រឹងប្រែងឲ្យអស់ពីសមត្ថភាព ជាពិសេសព្យាយាមលេងឲ្យបានស៊ីចង្វាក់គ្នាល្អបំផុត។
អ្នកគ្រូស្រស់ស្អាតរូបនេះប្រាប់ទៀតថា ក្រុមខេត្តពោធិ៍សាត់មានកម្រិតបច្ចេកទេសល្អទាំងព្រមមិនថា កាយសម្បទា ល្បឿន និងបច្ចេកទេសក្នុងការលេងលើទីលាន។ ជួបក្រុមខ្លាំងបែបនេះកញ្ញាមិនហ៊ានសង្ឃឹមខ្ពស់ក្នុងការប្រជែងឡើងទៅវគ្គផ្ដាច់ព្រ័ត្រឡើយគឺត្រឹម៦០% ប៉ុណ្ណោះ ប៉ុន្តែទោះបីជាយ៉ាងណាការលេងលើទីលានកូនក្រុមទាំងអស់ត្រូវតែមានទំនុកចិត្តលើខ្លួនឯងឲ្យបានខ្ពស់៕
តារាងកម្មវិធីប្រកួតវគ្គពាក់កណ្ដាលផ្ដាច់ព្រ័ត្រ |
|||||
កាលបរិច្ឆេទ |
ក្រុម |
ប្រកួត |
ក្រុម |
ម៉ោង |
ទីលាន |
០៥/០៩/១៥ |
យុវជនរតនៈ |
Vs |
សៀមរាបអង្គរ |
២:៣០ |
មជ្ឈមណ្ឌលជាតិបាទី |
ខេត្តពោធិ៍សាត់ |
Vs |
ត្បូងប៉ៃលិន |
៤:០០ |
លទ្ធផលក្នុងវគ្គ ៨ក្រុមចុងក្រោយ៖
យុវជនរតនៈ ២-០ មន្ទីរ អយក ខេត្តប៉ៃលិន ខេត្តពោធិ៍សាត់ ៣-០ យុវជន ឧត្ដរ សៀមរាបអង្គរ ៨-០ មន្ទីរ អយក ខេត្តតាកែវ អធិរាជភ្នំស្វាយ ១-៨ ត្បូងប៉ៃលិន
អត្ថបទ៖ស្រី សុវណ្ណដារ៉ា