ម៉ោង៣ល្ងាចនេះកាត់សេចក្ដីថាតើសៀមរាបអង្គរឬត្បូងប៉ៃលិនជាជើងឯកពានU-13ថ្នាក់ជាតិ?

2015-09-07 15:44:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់យុវជនក្រោមអាយុ១៣ឆ្នាំរបស់ក្រុមយុវជនត្បូងប៉ៃលិន ត្រូវជួបក្រុមសៀមរាបអង្គរ ក្នុងវគ្គផ្ដាច់ព្រ័ត្រ នៅវេលាម៉ោង ៣ រសៀលថ្ងៃច័ន្ទ ទី ៧ ខែ កញ្ញា ឆ្នាំ ២០១៥ នេះក្នុងពានរង្វាន់បាល់ទាត់ជម្រើសជើងឯកយុវជនក្រោមអាយុ១៣ឆ្នាំ ប្រចាំឆ្នាំ ២០១៥ ដែលរៀបចំឡើងនៅទីលានមជ្ឈមណ្ឌលនិងសាលាបាល់ទាត់ជាតិបាទី ក្នុងខេត្តតាកែវ។

សកម្មភាពប្រកួតនាពេលកន្លងទៅក្នុងពាន U-13ថ្នាក់ជាតិ

មុនឡើងមកដល់វគ្គផ្ដាច់ព្រ័ត្រនេះ ក្រុមសៀមរាបអង្គរបានយកឈ្នះក្រុមយុវជនរតនៈដែលជាក្រុមជើងឯកឆ្នាំចាស់ ២ ទល់ ១ កាលពីថ្ងៃសៅរិ៍ ទី ៥ ខែ កញ្ញា កន្លងទៅក្នុងវគ្គពាក់កណ្ដាលផ្ដាច់ព្រ័ត្រ ស្របពេលក្រុមត្បូងប៉ៃលិន ឈ្នះក្រុមអាវុធហត្ថខេត្តពោធិ៍សាត់ ដោយលទ្ធផល ២ ទល់ ១ លើទីលានជាមួយគ្នា។ ក្រៅពីគូប្រកួតវគ្គផ្ដាច់ព្រ័ត្រនេះគណៈកម្មាការរៀបចំការប្រកួតក៏តម្រូវឱ្យក្រុមចាញ់នៅវគ្គពាក់កណ្ដាលផ្ដាច់ព្រ័ត្រអាវុធហត្ថខេត្តពោធិ៍សាត់ក្រុមយុវជនរតនៈ ប្រកួតដណ្ដើមចំណាត់ថ្នាក់លេខ៣ នៅថ្ងៃជាមួយគ្នានោះដែរ។

ពានរង្វាន់យុវជនក្រោមអាយុ១៣ឆ្នាំ ប្រចាំឆ្នាំ២០១៥នេះរៀបចំឡើងដោយសហព័ន្ធកីឡាបាល់ទាត់កម្ពុជា មានក្រុមចូលរួមចំនួន ៣២ ក្រុមមកពីខេត្ត/ក្រុងទូទាំងប្រទេស ចែកជា ៨ ពូល ដោយចាប់ផ្ដើមប្រកួតពីថ្ងៃទី ២៨ ខែ សីហា ដល់ ថ្ងៃទី ៨ ខែ កញ្ញា ឆ្នាំ ២០១៥ នៅលើទីលានទាំង ៤ ក្នុងបរិវេណមជ្ឈមណ្ឌលនិងសាលាបាល់ទាត់ជាតិបាទី ក្នុងខេត្តតាកែវ។ ក្រុមលេខ១ និង លេខ ២ តាមពូលនីមួយៗ មានឈ្មោះឡើងទៅលេងវគ្គ ១/៨ ផ្ដាច់ព្រ័ត្រ ហើយក្រុមឈ្នះបន្តឡើងទៅលេងវគ្គ ១/៤ ក្រុមចុងក្រោយ រួមទាំងវគ្គពាក់កណ្ដាកផ្ដាច់ព្រ័ត្រ និង វគ្គផ្ដាច់ព្រ័ត្រ៕ អត្ថបទ៖ ម៉ឺន រស្មី

រូបថត៖ FFC