លំ សុក្រឹត ត្រៀមចេញបទ Original ១វ៉ុលម្នាក់ឯង

2015-09-07 17:38:43
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងហោចណាស់មានបទចម្រៀង៥បទ ដែល លោក លំ សុក្រឹត អះអាងថា ជាបទ Original របស់ខ្លួនផ្ទាល់ គ្រោងចេញលក់នៅលើទីផ្សារក្នុងពេលឆាប់នេះ ដើម្បីបំបែកភាពស្ងប់ស្ងាត់។

តាមការបញ្ជាក់ពីលោក លំ សុក្រឹត ប្រាប់ Sabay ព្រឹកនេះ បទទាំង៥បទបានថតចប់រួចរាល់អស់ហើយ ដោយគ្រោងចេញជា CD mini album សម្រាប់លោកផ្ទាល់តែម្ដង។"កន្លងមកខ្ញុំអត់ដែលមានបទ១វ៉ុលតែឯងទេ បទរបស់ខ្ញុំមានគ្រប់រសជាតិទាំងអស់ តែសុំលាក់សិន" អតីតតារាចម្រៀងរបស់ផលិតកម្ម Rock ថ្លែង។

លោក លំ សុក្រឹត បានលើកឡើងថា បទចម្រៀងដែលគ្រោងចេញលក់នេះ គឺជាស្នាដៃរបស់លោកផ្ទាល់ សហការជាមួយផលិតកម្ម ដោយលោកបានចំណាយពេលផលិតជាច្រើនខែមកហើយ។

មូលហេតុដែលនាំឲ្យតារាចម្រៀងមានកំណើតមកពីខេត្តកំពង់ធំ ងាកមកផលិតបទចម្រៀង Original នេះ ក៏ព្រោះតែលោកគិតថា បច្ចុប្បន្នបទប្រភេទនេះមានគាំទ្រខ្លាំងពីស្រទាប់យុវវ័យ ក៏ដូចជាអ្នកស្ដាប់ ជាមួយគ្នានោះលោកក៏ចង់បង្ហាញពីសមត្ថភាពខ្លួនឯងផងដែរ។

ក្រោយពី CD mini album Original របស់ខ្លួនចេញលក់ជាផ្លូវការ តារារូបនេះសង្ឃឹមយ៉ាងមុតមាំថា បទចម្រៀងទាំងនោះ នឹងអាចបំបែកភាពស្ងប់ស្ងាត់របស់លោកកន្លងមកជាក់ជាមិនខាន។

លោក លំ សុក្រឹត បានផ្ដើមសិល្បៈជាតារាចម្រៀង ក្នុងផលិតកម្ម Rock ជាមួយគ្នានេះដែរលោក ក៏ធ្លាប់ថតខ្សែភាពយន្តម្ដងម្កាលផងដែរ។ ក្រោយពីផលិតកម្ម Rock ផ្អាកផលិតបទចម្រៀង លោកបានមកចូលផលិតកម្មដាយមិន។ ក្រៅពីការច្រៀងក្នុងផលិតកម្ម បច្ចុប្បន្នលោកគឺជា តារាចម្រៀងប្រចាំនៅភោជនីយដ្ឋានមួយនៅ ទឹកដីខណ្ឌទួលគោក ៕

អត្ថបទ៖ ខុត សីហា