ភាពយន្ត Power Rangers វគ្គថ្មីនឹងចាប់ផ្ដើមថតនៅដើមឆ្នាំក្រោយ

2015-09-15 20:42:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តនៅចាំមនុស្សយន្តគ្រប់ពណ៌ Power Rangers ដែរឬទេ? មានដំណឹងល្អសម្រាប់អ្នកទាំងអស់គ្នាដែលធ្លាប់ជាអ្នកគាំទ្ររបស់រឿងនេះ ដោយក្រោយរយៈពេលចេញផ្សាយបាន២០ឆ្នាំ ភាពយន្តដែលធ្លាប់កំដរអារម្មណ៍របស់កុមារជាច្រើននោះនឹងត្រលប់មកវិញដោយនឹងចាប់ផ្ដើមថតនៅថ្ងៃទី ១៨ខែ មករាឆ្នាំក្រោយនិងគ្រោងបញ្ចប់នៅថ្ងៃទី ១២ ខែមេសា។

ត្រលប់ទៅខែមេសាក្នុងឆ្នាំនេះវិញ ក្រុមហ៊ុន Lionsgate បានលើកថ្ងៃបញ្ចាំងរឿង Power Rangers ថ្មីនេះ ពីថ្ងៃទី ២២ខែកក្កដា ឆ្នាំ ២០១៦ ទៅថ្ងៃទី១៧ ខែមករា ឆ្នាំ ២០១៧ វិញដោយមិនបានប្រាប់ហេតុផលជាក់លាក់អ្វីនោះទេ។ ចាប់ពីពេលនោះមកគ្មានដំណឹងអ្វីពីរឿងនេះត្រូវបានបង្ហើបនោះឡើយ។ ស្រាប់តែពេលថ្មីៗសហព័ន្ធអ្នកដឹកនាំសម្ដែងរឿងប្រទេសកាណាដា បានប្រកាសរឿងដែលត្រូវផលិតក្នុងខែមករាឆ្នាំក្រោយដោយក្នុងនោះរឿង "Power Rangers” របស់ អ្នកដឹកនាំសម្ដែង Dean Israelite ក៏មានឈ្មោះក្នុងតារាងនោះដែរ។

ពាក្យចចាមអារ៉ាមបានលេចឡើងថា Power Rangers ភាគថ្មីនេះនឹងនិយាយពីតួអង្គ ៥ ដដែលនោះគឺ Jason, Zack, Kimberly, Billy និង Trini ប៉ុន្តែបុគ្គលិកលក្ខណៈរបស់តួអង្គទាំងនេះនឹងត្រូវផ្លាស់ប្ដូរទាំងស្រុង។ គួរបញ្ជាក់ផងដែរថារឿង Power Ranger ដែលមានឈ្មោះពេញថា "Mighty Morphin Power Rangers” គឺជាប្រភេទរឿងភាពយន្តរបស់កុមារដែលចាប់ចាក់បញ្ចាំងដំបូងនៅក្នុងឆ្នាំ ១៩៩៣ ដល់ឆ្នាំ ១៩៩៥ នៅក្នុងរដូវកាលទី១ និងទទួលបានប្រជាប្រិយភាពយ៉ាងខ្លាំងពីបណ្ដាប្រទេសជាច្រើននៅលើពិភពលោកក្នុងនោះរួមមានប្រទេសកម្ពុជាផងដែរ៕