តើសិស្សនិទ្ទេស A យកថវិកា ពីរលានរៀលនោះ ទៅធ្វើអ្វីខ្លះ?
- 2015-09-17 13:30:18
- ចំនួនមតិ 0 | ចំនួនចែករំលែក 0
តើសិស្សនិទ្ទេស A យកថវិកា ពីរលានរៀលនោះ ទៅធ្វើអ្វីខ្លះ?
ចន្លោះមិនឃើញ
កាលពីថ្ងៃទី ១៤ កញ្ញា សម្ដេចនាយករដ្ឋមន្ត្រីហ៊ុន សែន បានជួបសំណេះសំណាល សិស្សនិទ្ទេស A ទាំង ១០៨ នាក់ នៅវិមានសន្តិភាព និងបានផ្ដល់រង្វាន់លើកទឹកចិត្តដល់ពួកគេ ដោយក្នុងម្នាក់ៗ ទទួលបាន Samsung Galaxy Tab មួយគ្រឿង កាក់ប្រាក់មួយ សៀវភៅអនុស្សាវរីយ៍ និង ទឹកប្រាក់សុទ្ធ ២ លានរៀល។
ចង់ដឹងថាតើ ពួកគេចំណាយថវិកាទាំងនោះយ៉ាងណាខ្លះ?
លីសុក្រិត គុលិកា ជាសិស្សនិទ្ទេស A មកពីវិទ្យាល័យជាស៊ីម សាមគ្គី បានប្រាប់ Sabay ឱ្យដឹងថា រូបគេយកលុយទាំងនេះ ប្រគល់ជូនឪពុកម្ដាយ ជាអ្នកសម្រេចចិត្ត។ លិកា បានបន្តទៀតថា ថវិកាទាំងនេះ ច្រើនណាស់រូបគេមិនដឹងថា យកទៅធ្វើអ្វីឡើយ ម្យ៉ាងវិញទៀត ឪពុកម្ដាយក៏បានប្រគល់លុយខ្លះរួចទៅហើយ សម្រាប់លិកាជប់លៀងជាមួយមិត្តភ័ក្ដិ។ «ខ្ញុំចង់ឱ្យគាត់ យកលុយហ្នឹងសម្រាប់ បង់សាលាឱ្យប្អូន សម្រាប់ខ្ញុំអត់មានត្រូវការអីទេ ព្រោះដឹងតែបានអាហារូបករណ៍ហើយ!»។ គុលិកា បានបញ្ជាក់។
( យុវជន លី សុក្រិតគុលិកា)
ចំណែកស៊ាន ពេជ្ររ៉ា សិស្សនិទ្ទេស A មកពីវិទ្យាល័យ ពួក ខេត្តសៀមរាបវិញ មានគម្រោងចង់ទិញសំលៀកបំពាក់ជូន លោកឪពុកអ្នកម្ដាយ និង ជូនថវិកាខ្លះដល់ពួកគាត់ សម្រាប់រដូវបុណ្យភ្ជុំដែលកំពុងតែខិតមកដល់។ មូលហេតុដែល ពេជ្ររ៉ា សម្រេចចិត្តទិញ សំលៀកបំពាក់ឱ្យពួកគាត់ព្រោះ ពេជ្ររ៉ាយល់ថា ពួកគាត់នឹងបាន ឃើញអាវដែលកូនប្រុសទិញឱ្យគ្រប់ពេលដែលពាក់។ ចំណែកថវិកាដែលនៅសល់ ពេជ្ររ៉ាគ្រោង ចំណាយលើការសិក្សាស្នាក់នៅភ្នំពេញ ចៀសវាងការសុំជំនួយពីអ្នកផ្ទះនៅ ខេត្តសៀមរាប។ «នេះជាលើកទីមួយហើយដែល ខ្ញុំបានជួយបន្ធូរ បន្ទុកឪពុកម្ដាយលើការចាយវាយ!»។ ស៊ាន ពេជ្ររ៉ា បានបន្ថែម។
ងាកមក លឹម រស្មី វិញប្រាប់ថា ថវិកាទាំងនោះនឹងចំណាយទៅលើការសិក្សា សាកលវិទ្យាល័យ ព្រោះមិនទាន់ដឹងថា បានជាប់អាហារូបករណ៍ឬ អត់ទេ ដូច្នេះ ត្រូវយោងខ្លួនឯងជាមុនសិន ម្យ៉ាងវិញទៀត ប្អូនៗ របស់រស្មីបានជាប់អាហារូបករណ៍ទៅសិក្សានៅ សិង្ហបុរីអស់ហើយ នៅតែរូបគេប៉ុណ្ណោះ ដែលត្រូវការចំណាយលុយ។
បន្ថែមពីលើនេះ សិស្សមកពីវិទ្យាល័យសន្ធរម៉ុករូបនេះ ក៏មានគំនិតចង់ចំណាយលើការ ជួសជុលផ្ទះដែរ ។
( យុវជន លឹម រស្មី)
ហ៊ុន សុវណ្ណដេត សិស្សនិទ្ទេស A ម្នាក់ទៀតដែលមកពីវិទ្យាល័យជាស៊ីម សាមគ្គី បានប្រាប់ថា ក្នុងនាមជាបងប្រុសគេ ដេតចង់ចំណាយលុយនោះ ជួយឪពុកម្ដាយ ដើម្បីទិញម៉ូតូឱ្យប្អូនស្រីជិះទៅរៀន។ មូលហេតុដែល អ្នកភ្នំពេញរូបនេះ សម្រេចចិត្ត ធ្វើដូច្នេះ ពីព្រោះតែរូបគេយល់ថា លោកឪពុក-អ្នកម្ដាយបាន ខិតខំរកលុយ ដើម្បីផ្គត់ផ្គង់ ជីវភាពរស់នៅ និង ការសិក្សារបស់ដេត តាំងពីដើមមក។ នេះជាលើកទីមួយ ដែល សុវណ្ណដេត បានប្រាក់រង្វាន់ដល់ទៅ ពីរលានរៀល សម្រាប់ជូនឪពុក-ម្ដាយ៕
អត្ថបទ៖ ណេង ណេង
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
