កីឡាករនីហ្សេរីយ៉ាសរសើរភាពស្និទ្ធស្នាលរបស់ប្រជាជនកម្ពុជា
- 2015-09-17 18:53:45
- ចំនួនមតិ 0 | ចំនួនចែករំលែក 0
កីឡាករនីហ្សេរីយ៉ាសរសើរភាពស្និទ្ធស្នាលរបស់ប្រជាជនកម្ពុជា
ចន្លោះមិនឃើញ
កីឡាករសញ្ជាតិនីហ្សេរីយ៉ា Esoh Paul Omogba ទើបចុះកុងត្រាលេងឲ្យក្លិបបឹងកេតអង្គរកាលពីដើមឆ្នាំ២០១៥នេះ បន្ទាប់ពីបង្ហាញខ្លួននៅទឹកដីថៃរយៈពេលបីឆ្នាំរួចមក។ ក្រោយរស់នៅលើទឹកដីកម្ពុជាជិតមួយឆ្នាំ កីឡាកររូបនេះបានពោលសរសើរពីភាពស្និទ្ធស្នាលរបស់ប្រជាជនខ្មែរ ដែលធ្វើឲ្យរូបគេអាចសម្របខ្លួនបានយ៉ាងឆាប់រហ័ស។
កីឡាករ Esoh Paul Omogba បានចំណាយពេលបីឆ្នាំក្នុងនាមជាខ្សែបម្រើនៅក្លិបពីររបស់ប្រទេសថៃ គឺ Udon Thani និងSamut Sakhon ដែលបច្ចុប្បន្នស្ថិតក្នុងលីកលំដាប់ទីបី។ ដើមឆ្នាំ២០១៥ កីឡាករសញ្ជាតិនីហ្សេរីយ៉ារូបនេះ បានចុះកិច្ចសន្យាមួយឆ្នាំជាមួយក្លិបបឹងកេតអង្គរ ដោយបំពេញតួនាទីជាខ្សែបម្រើស្លាប ហើយបច្ចុប្បន្នស៊ុតបញ្ចូលទីបាន ៦គ្រាប់។
Esoh បានប្រាប់ Sabay ថា ពេលចូលមកដល់ទឹកដីកម្ពុជាដំបូង លោកមានអារម្មណ៍ពិបាកបន្តិច ដោយសារស្ថានភាពខុសគ្នាពីប្រទេសថៃ។ ទោះយ៉ាងណា កីឡាករវ័យ ២១ឆ្នាំរូបនេះបានព្យាយាមសម្របខ្លួន និងស្វែងយល់ពីវប្បធម៌របស់ប្រជាជនកម្ពុជា ហើយបច្ចុប្បន្នអាចទម្លាប់បានព្រោះភាពស្និទ្ធស្នាលរបស់ប្រជាជនខ្មែរ។ Esoh បានសាកល្បងទទួលទានអាហារខ្មែរ ហើយសរសើរថាមានឱជារសឆ្ងាញ់ និងចូលចិត្ត។
ចំណែកកន្លែងស្នាក់អាស្រ័យវិញក៏គ្មានបញ្ហាដែរ ព្រោះ Esoh បានរស់នៅជិតសមាជិកក្នុងក្រុម។ អ្វីដែលធ្វើឲ្យកីឡាកររូបនេះស្រលាញ់កម្ពុជាគឺ ភាពស្និទ្ធស្នាលដែលប្រជាជនខ្មែរមាន។ Esoh បាននិយាយថា៖ "ប្រជាជនខ្មែរប្រកបដោយភាពស្និទ្ធស្នាល ពួកគេចូលចិត្តរាប់អានជាគ្រួសារ ហើយយើងចូលចិត្តធ្វើអ្វីជាមួយគ្នា យើងរស់នៅដោយសន្តិភាពជាមួយគ្នា"។
ចំពោះវិស័យកីឡាបាល់ទាត់នៅកម្ពុជា Esoh បានមើលឃើញថាមានការរីកចម្រើនច្រើន ហើយប្រហែល ១ឆ្នាំ ឬពីរឆ្នាំទៀត អាចប្រៀបធៀបទៅនឹងប្រទេសថៃបាន។ បច្ចុប្បន្នកីឡាបាល់ទាត់នៅក្នុងប្រទេសទាំងពីរហាក់មានគម្លាតគ្នាឆ្ងាយបន្តិច ប៉ុន្តែកីឡាករសញ្ជាតិនីហ្សេរីយ៉ារូបនេះនៅតែចង់បន្តកុងត្រាជាមួយក្លិបបាល់ទាត់បឹងកេតអង្គរលើទឹកដីកម្ពុជា។
កីឡាករដែលចាប់ផ្ដើមលេងបាល់តាំងពីអាយុ ៧ឆ្នាំរូបនេះ ចង់ចាប់យកឱកាសក្នុងលីកបាល់ទាត់កម្ពុជា ដើម្បីពង្រឹងសមត្ថភាពសម្រេចក្ដីស្រមៃក្នុងការបង្ហាញខ្លួននៅអឺរ៉ុប។ បំណងប្រាថ្នាដ៏ធំបំផុតរបស់កីឡាករ Esoh គឺចង់លេងក្នុងក្របខ័ណ្ឌ Champions League និងបញ្ចប់អាជីពនៅទ្វីបអឺរ៉ុបតែម្ដង៕
ទស្សនាវីដេអូដែលជាចំណាប់អារម្មណ៍របស់ Esoh Paul Omogba អំពីប្រជាពលរដ្ឋខ្មែរ៖
អត្ថបទ៖ គង់ វិសាល