ខ្ញុំចង់ទៅកូរ៉េ ព្រោះប្រាក់ខែច្រើន

2015-09-18 22:51:42
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នភាសាកូរ៉េត្រូវបានពលរដ្ឋខ្មែរខំសិក្សាយ៉ាងផុសផុល ដោយឡែកពីរ-បីឆ្នាំចុងក្រោយនេះពលរដ្ឋក្នុងស្រុកឈូក ខេត្តកំពត បានរៀនភាសាកូរ៉េយ៉ាងច្រើន ជាពិសេសយុវជន។ ថ្ងៃនេះ Sabay សូមនាំប្រិយមិត្តទាំងអស់គ្នាទៅស្តាប់មតិរបស់សិស្សដែលកំពុងរៀនភាសាកូរ៉េថា អ្វីទៅជាមូលហេតុដែលនាំឲ្យពួកគេសម្រេចចិត្តរៀនភាសាកូរ៉េ។

ជា រតនា មកពីស្រុកត្រាំកក់ ខេត្តតាកែវ បច្ចុប្បន្នជាសិស្សម្នាក់កំពុងរៀនភាសាកូរ៉េនៅសាលាមិត្តភាព ដែលមានទីតាំងនៅទល់មុខទាចៀន ស្រុកឈូក ខេត្តកំពត។ យុវជន អាយុ១៩ រូបនេះបានប្រាប់ថា គេសម្រេចចិត្តរៀនភាសាកូរ៉េ ក៏ដោយសារតែការងារនៅប្រទេសកូរ៉េមានប្រាក់ខែខ្ពស់ ជាក់ស្តែងបងប្រុសបង្កើតរបស់រតនា ដែលធ្លាប់បានរៀនភាសាកូរ៉េនៅទីនេះ ហើយឥឡូវគាត់បានចេញទៅធ្វើការនៅប្រទេសកូរ៉េ កាលពី ខែ កក្កដា ឆ្នាំ២០១៥ ថ្មីៗនេះ ដែលគាត់ទទួលបានប្រាក់ខែជាង ១.០០០ដុល្លារ អាមេរិក ក្នុងមួយខែ។

“បើប្រៀបធៀបការងារនៅស្រុកខ្មែររៀនចប់បរិញ្ញាបត្រ ៤ឆ្នាំពេលទៅធ្វើការឲ្យគេ បាន ប្រាក់ខែ២០០$ ទៅ ៣០០$ បើច្រើនប្រហែលជា៥០០$ ។ នេះបើតាមការសង្កេតជាក់ស្តែង របស់ខ្ញុំ មូលហេតុនេះដែលធ្វើឲ្យខ្ញុំរៀនភាសាកូរ៉េ” ។ រតនា និយាយ។

លីណា គឺជា សិស្សម្នាក់ទៀតដែលកំពុងតែសិក្សាភាសាកូរ៉េនៅសាលាភាសាកូរ៉េមិត្តភាពដែរ បាននិយាយថា នាងបានឃើញអ្នកនៅក្នុងភូមិរបស់នាងមករៀននៅទីនេះបានប្រឡងជាប់ និងមួយចំនួនទៀតបានចេញទៅធ្វើការនៅប្រទេសកូរ៉េមានប្រាក់ខែខ្ពស់ ទើបនាងសម្រេចចិត្តផ្អាកអាជីពជាជាងកាត់ដេររបស់នាងមួយរយៈសិន ហើយងាកមករៀនភាសាកូរ៉េ។

លីណា បង្ហាញនៅភាពជឿជាក់ថា នាងមានសង្ឃឹមច្រើនក្នុងការប្រឡងនៅថ្ងៃមុខ បើតាមសន្ទុះនៃ ការសិក្សាសព្វថ្ងៃ ព្រោះនាងខិតខំរៀនខ្ជាប់់ខ្ជួន ព្រមទាំងការយកចិត្តទុកដាក់ពីលោកគ្រូ ដែលបានបង្រៀនដិតដល់ មានបទពិសោធច្រើនឆ្នាំក្នុងការបង្រៀន។

សកម្មភាពសិស្សកំពុងរៀនភាសាកូរ៉េនៅសាលាមិត្តភាព

លោក ចេងធី ជានាយកសាលាកូរ៉េមិត្តភាពបានប្រាប់ថា កាលពីប្រឡងវគ្គ ១២ (ខែមិថុនា ២០១៥) សាលាលោកជាប់បាន ៧៩% ។ គ្រាន់តែប្រឡងចប់ភ្លាមមានសិស្សមកចុះឈ្មោះរៀនភ្លាម មកទល់ពេលនេះសាលាគាត់មានសិស្សប្រមាណជា ៣០០ នាក់។ លោកបន្ថែមថា បច្ចុប្បន្នសាលាមានផ្តល់កន្លែងស្នាក់នៅដល់សិស្សដែលមកពីឆ្ងាយដោយមិនគិតថ្លៃ ហើយសាលាមានទទួលសិស្សថ្មីជារៀងរាល់ថ្ងៃ។

ងាកទៅ ហ៊ុន ណៃ ដែលខិតខំតស៊ូសុំម៉ូតូគេជិះមករៀនភាសាកូរ៉េនៅសាលាឯកជនញូប្រាយ បានប្រាប់ថា គាត់សម្រេចចិត្តមករៀនភាសាកូរ៉េ ក៏ព្រោះតែរៀនបានត្រឹមថ្នាក់ទី៩ មិនអាចរកការងារដែលមានប្រាក់ខែច្រើនទេ តែបើទៅធ្វើការនៅកូរ៉េ មិនចាំបាច់រៀនបានខ្ពស់ទេ ក៏អាចទទួលបានប្រាក់ខែច្រើនដែរ ។ បុរសដែលមកពីភូមិដូនយ៉យ ឃុំដូនយ៉យ ស្រុកឈូក ខេត្តកំពតរូបនេះលើកឡើងថា បំណាច់ធ្វើជាកម្មករដូចគ្នា គាត់សុខចិត្តធ្វើជាកម្មករនៅកូរ៉េល្អជាង ព្រោះប្រាក់ខែស្មើអ្នករៀនបានខ្ពស់នៅខ្មែរ។

មានទីលំនៅភូមិបឹង ឃុំបឹងនិមល ស្រុកឈូក ខេត្តកំពត កញ្ញា នាក់ គឹមសួ ទើបតែរៀនភាសាកូរ៉េបានជាងមួយខែប៉ុណ្ណោះ នៅសាលាឯកជនញូប្រាយដែរ។ គឹមសួ ប្រាប់ថា នាងបានឈប់រៀនតាំងពីថ្នាក់ទី ៧ ដោយសារជីវភាពគ្រួសារ ហើយនៅផ្ទះជួយធ្វើការ ។

ដោយពេលថ្មីៗនេះ បងជីដូនមួយ របស់គឹមសួបានទៅធ្វើការខាងឧស្សាហកម្មនៅប្រទេសកូរ៉េ គាត់បានប្រាក់ខែ ១២០០ ដុល្លារក្នុងមួយខែ ហើយក៏អ្នកភូមិជាមួយគ្នាច្រើននាក់ ដែលបានទៅកូរ៉េហើយ គ្រួសារគេមានជីវភាពធូរធា។ ដូច្នេះ អ្នកភូមិបឹងដែលមានអាយុ ១៨ឆ្នាំរូបនេះក៏សម្រេចចិត្តមករៀនភាសាកូរ៉េនេះ តែម្តង។ “តាមអ្នកមុនៗដែលបានទៅប្រាប់ថាភាគច្រើនឧស្សាហកម្មគេច្រើនតែយកប្រុសៗ ចំណែកស្រីឲ្យដាក់ខាងកសិកម្មឆាប់បានទៅ ហើយគេយកពិន្ទុតិច គ្រាន់តែត្រូវធ្វើការនៅហាលក្តៅ”។

លោក ឈិន ភាន ជានាយកសាលាឯកជនញូប្រាយដែលមានទីតាំងខាងកើតការិយាល័យអប់រំយុវជន និង កីឡាស្រុកឈូក បានប្រាប់ថា សិស្សរបស់លោកបានប្រលងជាប់ ៦០% កាលពីប្រឡងវគ្គ១២។ បច្ចុប្បន្នលោកមានសិស្សជិត១០០នាក់កំពុងសិក្សាភាសាកូរ៉េនៅក្នុងសាលារបស់លោក។