ព្រឹទ្ធាចារ្យ ជ័យ ប៊ុនឈឿ សុំជំនួយនៅកាល់មែត្រ ក្រោយគ្រូពេទ្យប្រាប់ថា មានសង្ឃឹមខ្ពស់

2015-09-22 17:32:50
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាកណ្ដាលដ៏មានប្រជាប្រិយភាពលោកតា ជ័យ ប៊ុនឈឿ ប្រកាសសុំជំនួយដើម្បីព្យាបាលជំងឺមហារីកនៅមន្ទីរពេទ្យកាល់ម៉ែត្រ ក្រោយជួបគ្រូពេទ្យប្រាប់ថា នៅមានសង្ឃឹមជាសះស្បើយខ្ពស់ ប៉ុន្តែត្រូវចំណាយពេលព្យាបាលយូរ។

លោក ជ័យ ប៊ុនឈឿ ធ្វើជាអាជ្ញាកណ្ដាលកន្លងទៅ

អ្នកស្រី ឈឿ សុធារី កូនទី២របស់លោកព្រឹទ្ធាចារ្យ ជ័យ ប៊ុនឈឿ បានឲ្យដឹងថា ពេលនេះឪពុករបស់អ្នកស្រីកំពុងសម្រាកនៅផ្ទះដោយរង់ចាំថ្ងៃណាត់ជួបរបស់លោកគ្រូពេទ្យនៅមន្ទីរពេទ្យកាល់ម៉ែត្រ។ ក្រោយពេលបានទៅជួបគ្រូពេទ្យកាលពីពេលកន្លងទៅ គ្រូពេទ្យបានប្រាប់អ្នកស្រីនិងក្រុមគ្រួសារថា ស្ថានភាពជំងឺរបស់លោកព្រឹទ្ធាចារ្យនៅអាចព្យាបាលបាន និងសង្ឃឹមជាសះស្បើយខ្ពស់។

អ្នកស្រីបន្តថា ការព្យាបាលអាចប្រើរយៈពេលយូរ ហើយប្រាក់អស់ប្រហែល៣ពាន់ដុល្លារអាមេរិក។ ក្នុង ២១ ថ្ងៃម្ដងត្រូវចាក់ថ្នាំជាតិគីមីសម្លាប់មេរោគមហារីក សម្រាប់តម្លៃចាក់ថ្នាំជាតិគីមីម្ដងចន្លោះពី ៥០០ទៅ ៦០០ដុល្លារអាមេរិក។ ទន្ទឹមនឹងនោះគ្រូពេទ្យបញ្ជាក់ប្រាប់អ្នកស្រីថា ការចាក់បញ្ចូលជាតិគីមីនេះនឹងធ្វើឡើងចំនួន៤ដង ជំងឺនឹងជាសះស្បើយ។

កូនស្រីលោកព្រឹទ្ធាចារ្យរូបនេះបន្ថែមថា គ្រួសាររបស់អ្នកស្រីទាំងអស់ពិតជាអរគុណយ៉ាងខ្លាំងដល់ម្ចាស់ជំនួយដែលបានជួយពេលកន្លងមក ប៉ុន្តែពេលនេះអ្នកស្រីក៏សូមឲ្យបងប្អូនប្រជាពលរដ្ឋ មេត្តាជួយឧបត្ថម្ភបន្តទៀត ដោយសារស្ថានភាពជំងឺនៅមានសង្ឃឹមជាសះស្បើយ។ ដំបូងឡើយលោកព្រឹទ្ធាចារ្យ ជ័យ ប៊ុនឈឿ នឹងត្រូវបញ្ជូនទៅក្រៅប្រទេស (ថៃ ឬរៀតណាម) ប៉ុន្តែដោយសារក្រុមគ្រួសារគ្មានលទ្ធភាព ហើយជំនួយមិនគ្រប់គ្រាន់ទើបក្រុមគ្រូសារសម្រេចនៅព្យាបាលនៅស្រុកខ្មែរ។ ប្រសិនបើបងប្អូនណាចង់ជួយឧបត្ថម្ភអាចទាក់ទងតាម រយៈលេខទូរសព្ទអ្នកស្រីផ្ទាល់ដែលមានលេខ ០១២ ៨១៥៨២៥៕

អត្ថបទ៖ ស្រី សុវណ្ណដារ៉ា