ស្គាល់ហាងនំប៉័ងបាយ័ន មានដឹងប្រវត្តិរបស់ហាងឬនៅ?

2015-09-25 16:00:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ឈ្មោះហាងនំប៉័ងបាយ័នត្រូវបានមហាជនស្គាល់ជាទូទៅ អស់រយៈពេលជិត ២០ ឆ្នាំមកហើយ។ មិនមែនមានតែនៅប្រជុំជនក្នុងទីក្រុងភ្នំពេញប៉ុណ្ណោះទេ អ្នកនៅតាមបណ្ដាខេត្តស្ទើរទូទាំងប្រទេសសុទ្ធតែបានភ្លក់រសជាតិដ៏ឈ្ងុយឆ្ងាញ់ដោយការជាវតាមសាខាច្រកចេញទៅតាមបណ្ដាខេត្តយកទៅផ្ញើបងប្អូនពេលត្រឡប់ទៅខេត្តម្តងៗ។ Sabay បានជួបជាមួយអ្នកគ្រប់គ្រងទូទៅរបស់ហាងនំប៉័ងមួយនេះដើម្បីសាកសួរពីប្រវត្តិត្រួសៗរបស់ហាងតាំងពីចាប់ផ្ដើមដំបូងមកដល់បច្ចុប្បន្ន។

អ្នកគ្រប់គ្រងទូទៅហាងនំប៉័ងបាយ័ន កញ្ញា ប៊ូយជីងនិយាយថា ហាងនំប៉័ងបាយ័នសាខាទី ១ នៅផ្លូវកម្ពុជាក្រោម ក្រោយផ្សារទំនើប BS ចាប់បដិសន្ធិនៅក្នុងឆ្នាំ ១៩៩៨។ បង្កើតដំបូង ហាងនំមួយនេះទទួលនំពីហាងដទៃបោះបន្តប៉ុណ្ណោះ។ តែដោយមានក្ដីស្រឡាញ់ និងមើលឃើញតម្រូវការខ្ពស់ ម្ចាស់ហាងបានទៅសិក្សាស្វែងយល់ពីការផលិតនំប៉័ងឲ្យកាន់តែល្អបន្ថែមទៀតនៅក្រៅប្រទេស ហើយត្រឡប់មកផលិតនំប៉័ងដោយខ្លួនឯងតែម្ដង។ ហាងបាននាំចូលឡស្វ័យប្រវត្តិពីប្រទេសស្វីសមកដំបូងគេមកកម្ពុជា។

ឆ្នាំ ២០០០ ពួកគេបានផលិតចេញនំប៉័ងប៊ឺដំបូងគេ ហើយរសជាតិដ៏ឈ្ងុយឆ្ងាញ់នៃនំនេះហើយដែលធ្វើឲ្យប្រជាប្រិយភាពហាងល្បីខ្លាំងដោយអ្នកទិញបាននិយាយតៗគ្នារហូតជ្រួតជ្រាបដល់មហាជនគ្រប់ស្រទាប់។ ភាពល្បីល្បាញរបស់នំប៉័ងប៊ឺនេះធ្វើឲ្យមហាជនហៅឈ្មោះនំប៉័ងប៊ឺទូទៅថា នំប៉័ងបាយ័នៗ។

ការគាំទ្រខ្លាំងពីប្រជាជនកម្ពុជាធ្វើឲ្យហាងរីកលូតលាស់ពីមួយថ្ងៃទៅមួយថ្ងៃពីមួយសាខាក្នុងឆ្នាំ ១៩៩៨ ដល់ ១១ សាខានៅពេលបច្ចុប្បន្ន។ ពេលវេលាផ្លាស់ប្ដូរ ចំណង់ចំណូលចិត្តនៃការញ៉ាំរបស់ប្រជាជនកម្ពុជាក៏ផ្លាស់ប្ដូរដែរ ហេតុនេះហាងនំប៉័ងបាយ័នក៏មិននៅមួយកន្លែងដែរ។ ហាងនំដែលគ្រប់គ្រងដោយគ្រួសារខ្មែរបានពង្រីកការផលិតរបស់ខ្លួនជាលំដាប់។

នៅឆ្នាំ ២០០៨ ពួកគេបានផលិតរសជាតិនំកាន់តែច្រើន និងសម្បូរបែប។ ក្រៅពីការផលិតនំប៉័ង ដើម ហាងបានពង្រីកសង្វាក់ផលិតកម្មរបស់ខ្លួនដែលមាននំផ្អែមគ្រប់មុខ នំបែបអឺរ៉ុប នំខួបកំណើត នំអាពាហ៍ពិពាហ៍ ដល់នំសែនព្រះខែនិងនំជាច្រើនមុខទៀត។ ក្រៅពីនំដែលបានរៀបរាប់នេះ នៅហាងផ្ទាល់គឺមាននំដ៏សម្បូរបែបជាច្រើនមុខទៀត ដែលអតិថិជនអាចជ្រើសរើសតាមការចូលចិត្ត។

កញ្ញា ប៊ូយជីង ឲ្យដឹងដែរថា វត្ថុធាតុដើមមួយចំនួនគឺជាផលិតផលក្នុងស្រុក។ កញ្ញាបានពន្យល់ពីមូលហេតុនៃការជ្រើសរើសយកវត្ថុធាតុដើមក្នុងស្រុកថា «យើងសម្រេចយកវត្ថុធាតុដើមទាំងនោះគឺដោយសារវាមានរសជាតិដើម និងក្លិនឈ្ងុយខុសពីវត្ថុធាតុដើមនាំចូល និងមួយទៀតវារួមចំណែកគាំទ្រដល់ផលិតផលក្នុងស្រុកផង»។

ដើម្បីឆ្លើយតបនឹងការផ្លាស់ប្ដូរនៃទំនោររបស់អតិថិជន ស្របពេលដែលភាពជឿនលឿនកាន់តែវិវឌ្ឍ ហាងនំប៉័ងបាយ័នសាខាពេទ្យចិនជាហាងទី ១ ដែលបានកែប្រែឲ្យកាន់តែទំនើបដោយក្រៅពីផ្ដល់ផលិតផលនំប៉័ងក៏មានសេវាកម្មជាហាងកាហ្វេឲ្យអង្គុយជជែកកម្សាន្តបានដូចហាងកាហ្វេទំនើបទូទៅដោយក្នុងនោះអ្នកចូលញ៉ាំអាចញ៉ាំផ្លែឈើក្រឡុក នំបែបអឺរ៉ុបថ្មីៗ នំខួបស្ករ (Fondant), Cup Cake និងកាហ្វេច្រើនប្រភេទតាមការជ្រើសរើស។

កញ្ញា ប៊ូយជីងចង់ថ្លែងអំណរគុណដល់អតិថិជនថា «សូមអរគុណចំពោះការគាំទ្ររបស់អតិថិជនរហូតមក។ បើគ្មានការគាំទ្រពីអតិថិជន យើងក៏មិនអាចបន្តបើកសាខាជាបន្តបន្ទាប់ច្រើនដូច្នេះដែរ។ យើងខ្ញុំសូមជូនពរឲ្យអតិថិជនទាំងអស់មានសុខភាពល្អ និងបន្តគាំទ្រផលិតផលយើងបន្តទៀត»៕