លោកតាអាយុ១០៥ឆ្នាំ ជាប់កំណត់ត្រាអ្នករត់ល្បឿន អាយុច្រើនជាងគេលើលោក

2015-09-25 21:43:47
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកតាជនជាតិជប៉ុនម្នាក់ទទួលកំណត់ត្រាពិភពលោកជាអ្នករត់ល្បឿន ចម្ងាយ១០០ម៉ែត្រ ចាស់ជាងគេលើពិភពលោក។ នេះបើតាមស្ថាប័នឯកត្តកម្មពិភពលោក Guinness World Record។

លោកតា Hidekichi Miyazaki បានបំបែកកំណត់ត្រាមួយថ្ងៃក្រោយខួបកំណើតវ័យ១០៥ឆ្នាំរបស់គាត់។ កាលពីថ្ងៃព្រហស្បតិ៍ម្សិលមិញលោកតាHidekichi បានចូលរួមជាមួយអ្នកប្រកួតដទៃទៀតដែលមានអាយុលើសពី៨០ឆ្នាំក្នុងកម្មវិធីរត់ប្រណាំងមួយ ឈ្មោះ Kyoto Masters Autumn Competition ក្នុងក្រុងក្យូតូ ភាគខាងលិចប្រទេសជប៉ុន។

ជាលទ្ធផលលោកតាធ្វើបានថេរវេលា ៤២,២២វិនាទីក្នុងចម្ងាយ១០០ម៉ែត្រ។ ថេរវេលានេះគឺយឺតជាងកំណត់ត្រាពិភពលោករត់លឿនជាងគេដោយកីឡាករជើងឯកអូឡាំពិក ជនជាតិចាម៉ៃកា Usain Bolt ចំនួន៣២,៦៤ វិនាទី។ យ៉ាងណាក្ដីបើគិតក្នុងមនុស្សចាស់អាយុស្របាលគ្នា គឺលោកតា Hidekichi ធ្វើបានលឿនជាងគេ រហូតបានកំណត់ត្រាពិភពលោកជាអ្នករត់ចម្ងាយ១០០ម៉ែត្រអាយុច្រើនជាងគេលើលោក ពីស្ថាប័ន Guinness World Record។

កំណត់ខាងលើបានទទួលកាលពីថ្ងៃព្រហស្បតិ៍ បីថ្ងៃក្រោយបន្ទាប់ពីកំណត់ត្រារបស់លោកតាជនជាតិអាមេរិកវ័យ១០០ឆ្នាំឈ្មោះ Don Pellmann ដែលបានបំបែកកំណត់ត្រាពិភពលោក១០០ម៉ែត្រ រត់ផ្លោះរបារ៕