ពលរដ្ឋភ្នំពេញនិយាយពីការប្រារព្ធបុណ្យសែនព្រះខែនៅយប់នេះ

2015-09-27 22:15:17
ចំនួនមតិ 0 | ចំនួនចែករំលែក 0

ចន្លោះមិនឃើញ

យប់នេះជាថ្ងៃធំនៃពិធីបុណ្យសែនព្រះខែ។ ពលរដ្ឋខ្មែរសែស្រឡាយចិនក៏ដូចជាប្រជាជនខ្មែរមួយចំនួនដែលផ្សងចង់បានក្ដីសុខសម្រាប់ក្រុមគ្រួសារ បានត្រៀមរួចរាល់ហើយសម្រាប់រៀបចំអបអរពិធីដ៏រីករាយ ក្រោមពន្លឺចន្ទដ៏ភ្លឺថ្លានៅយប់នេះ។ ឥលូវ យើងស្ដាប់អ្នកទីក្រុងភ្នំពេញនិយាយពីសកម្មភាពរបស់ពួកគេនៅយប់នេះ។

ពលរដ្ឋមមាញឹកទិញនំនែកត្រៀមពិធីបុណ្យសែនព្រះខែ

កញ្ញា ឈុន សុភក្ត្រ បុគ្គលិកក្រុមហ៊ុនឯកជននិយាយថា កញ្ញានឹងរៀបចំសំណែនតិចតួចដើម្បីអបអរពិធីបុណ្យនេះ។ «និយាយទៅខ្ញុំមកពីខេត្ត ហើយក៏អត់ជាប់សាច់ឈាមចិនអីដែរ។ តែប៉ុន្មានឆ្នាំមករៀនរហូតដល់មានការងារធ្វើនៅភ្នំពេញនេះ ខ្ញុំចេះតែធ្វើតិចតួចអីចឹងទៅបង ព្រោះវាអត់មានខុសទាស់អីទេ វាជួយឲ្យយើងបានក្ដីសុខដែរ»។

ងាកមកមគ្គទេសក៍ទេសចរណ៍ភាសាចិនដែលបម្រើការងារនៅខេត្តសៀមរាប លោក តាំង ឡេងវិញរៀបរាប់ថា លោកនឹងត្រឡប់មកជួបជុំអបអរជាមួយគ្រួសារនៅភ្នំពេញ។ លោកបញ្ជាក់ដូច្នេះ «ដោយសារខ្ញុំមានសែស្រឡាយចិន ណាមួយធ្វើការនៅខេត្តឆ្ងាយពីផ្ទះអត់សូវមានពេលនៅជាមួយគ្រួសារ ខ្ញុំនឹងត្រឡប់ទៅសែនជាមួយប៉ាម៉ាក់នៅភ្នំពេញវិញ។ ប៉ាម៉ាក់ខ្ញុំគាត់ទិញនំ និងគ្រឿងគ្រៅធ្វើម្ហូបសម្រាប់សែនអស់ហើយ»។

«ចំថ្ងៃអាទិត្យអញ្ចឹងល្អដែរ។ តែមិនដឹងទៅណាឲ្យច្បាស់ទេ ប្រហែលទៅកោះពេជ្រហៅមិត្តភ័ក្ដិជួបជុំតិចតួច [សើច...]»។ ជាការលើកឡើងរបស់លោក ប៊ុន រិទ្ធី បម្រើការនៅធនាគារឯកជនមួយ។ លោកបន្តថា «[មិត្តភ័ក្ដិ] អត់សូវដែលបានជួបជុំគ្នាអីទេ [តាំងពីរៀនចប់មក] ដល់អីចឹង មានតែធ្វើអីញ៉ាំជុំគ្នាបានបានជួប»។

អាជីវករផ្សារអូរឫស្សីកញ្ញា លីស៊ានថា នាងនឹងនៅផ្ទះជួបជុំជាមួយគ្រួសារ។ «ថ្ងៃនេះខ្ញុំនៅលក់ជំនួស ម៉ាក់គាត់ទៅផ្ទះ រៀបចំសម្អាត និងធ្វើម្ហូបសែនតិចតួច [...]។ ប្រហែលអត់ខុសរាល់ឆ្នាំទេបង ប្រហែលនៅផ្ទះញ៉ាំនំសែន [ព្រះខែ] ជាមួយអ្នកផ្ទះ និងផ្ញើសារអីតិចតួចទៅពួកម៉ាកជិតដិតប៉ុន្មាននាក់ហ្នឹង!»។

ចុះអ្នកវិញ មានបានទិញនំសែនឬនៅ? ចុះមានគម្រោងធ្វើអ្វីដែរយប់ចន្ទពេញបូរមីនេះ?