គេងស្រមុក ទាក់ទងបញ្ហាសុខភាពអ្វីខ្លះ?

2015-09-29 15:10:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេលគេងលក់ មានអ្នកគេងដោយស្ងប់ស្ងៀម ឯអ្នកខ្លះទៀតគេងស្រមុក ឮសូរពេញបន្ទប់។ ហេតុអ្វីបានជាដូច្នេះ? តាមការស្រាវជ្រាវជាច្រើន បានបង្ហាញថាការគេងស្រមុក មានទាក់ទងនឹងបញ្ហាសុខភាពមួយចំនួន។

ក្រុមអ្នកស្រាវជ្រាវមកពីមន្ទីរពេទ្យ Henry Ford Detroit បានស្រាវជ្រាវលើឥទ្ធិពលនៃការគេងស្រមុក ហើយបានបង្ហាញថាវាជាប់ទាក់ទងនឹងសម្ពាធសរសៃឈាមបេះដូង។ ពួកគេបានពិនិត្យលើទិន្នន័យរបស់អ្នកជំងឺចំនួន៩១៣នាក់ ដែលមានអាយុចាប់ពី១៨ ដល់៥០ឆ្នាំ និងបានតាមដានលើសរសៃឈាមដោយប្រព័ន្ធ Ultrasound។

ជាលទ្ធផលបានបង្ហាញថាអ្នកដែលគេងស្រមុក មានកម្រិតនៃសរសៃឈាមតូចចង្អៀតជាងអ្នកមិនគេងសម្រុក។ នេះជាហេតុបណ្ដាលឲ្យមានដឹកនាំឈាមទៅកាន់ខួរក្បាលមិនបានល្អ ហើយមានបញ្ហាស្ទះដង្ហើមពេលគេង។ ដូចនេះវាជាសញ្ញាគួរប្រុងប្រយ័ត្នមួយដោយសារភាគច្រើន កើតមានលើអ្នកធាត់ដុះពោះ អ្នកជក់បារី អ្នកមានជំងឺទឹកនោមផ្អែម អ្នកមានសម្ពាធឈាម និងកូឡេស្តេរ៉ូលខ្ពស់។

យោងតាមវេបសាយ Helpguide មានករណីខ្លះក៏បណ្ដាលឲ្យគេងស្រមុកដែរ គឺដោយសារអាយុច្រើន សាច់ដុំផ្នែកបំពង់ករួមតូចក៏ធ្វើគេងស្រមុកលាន់សូរឮៗ។ ចំណែកបញ្ហាមួយទៀតគឺទម្លាប់នៃការគេងរាប (ពុំមានកល់ខ្នើយ) ជាហេតុធ្វើឲ្យបំពង់ខ្យល់ដកដង្ហើមពិបាក និងស្ទះដង្ហើមក៏ធ្វើឲ្យគេងស្រមុកដែរ។

ដើម្បីបង្ការហានិភ័យមួយចំនួនទាក់ទងនឹងបញ្ហាសុខភាពដូចជាការគេងស្រមុកនេះ លោកបណ្ឌិតអាម៉េរិកាំង Michael J. Breus អ្នកប្រឹក្សាផ្នែកសុខភាពដំណេក និងជាអ្នកព្យាបាលជំងឺផ្នែកចិត្តវិទ្យាបានណែនាំដូចខាងក្រោម៖

រក្សាទម្ងន់ខ្លួនកុំឲ្យធាត់ហួស៖

គេងស្រមុកអាចកើតឡើងដោយសារធាត់ពេក ដូចនេះការរក្សាទម្ងន់កុំឲ្យធាត់ហួស គឺជាការប្រសើរ។ ការរក្សាទម្ងន់នោះគឺធ្វើតាមរបបអាហារត្រឹមត្រូវ ហាត់ប្រាណទៀងទាត់ជាដើម។

- កាត់បន្ថយការញ៉ាំគ្រឿងស្រវឹង៖

ស្រា ឬគ្រឿងស្រវឹងផ្សេងៗ គឺទាក់ទងនឹងបញ្ហាសាច់ដុំផ្នែកបំពង់ក និងបញ្ហាដង្ហើមស្រមុកកើតមានឡើង។ ដូចនេះការកាត់បន្ថយការញ៉ាំជាតិស្រវឹង ជាពិសេសមុនពេលចូលគេងបីម៉ោង អាចជួយកាត់បន្ថយហានិភ័យខាងលើបានខ្លះ។

- កុំជក់បារី៖

ជក់បារីបណ្ដាលឲ្យប៉ះពាល់ដល់ផ្លូវដង្ហើម និងបង្កើនហានិភ័យនៃការគេងស្រមុក។ កាត់បន្ថយការជក់បារី នឹងធ្វើឲ្យការទទួលដំណេកបានប្រសើរជាងមុននិងបន្ថយការគេងស្រមុក។ - ពិគ្រោះជាមួយគ្រូពេទ្យ៖

ជួបជាមួយគ្រូពេទ្យវាជារឿងសំខាន់ និងកាន់តែច្បាស់អំពីស្ថានភាពសុខភាពរបស់អ្នក នៅពេលអ្នកដឹងថាអ្នកមានទម្លាប់គេងស្រមុក។ តាមរយៈការពិគ្រោះជាមួយគ្រូពេទ្យ អ្នកអាចទទួលបានដំបូន្មានល្អៗ និងប្រាប់ពីអាការៈរបស់អ្នក៕

ចុចអាន៖ ស្ត្រីគេងច្រើន មានចំណង់ផ្លូវភេទខ្ពស់

ចុចអាន៖ ពេលគេងមិនលក់ ដាច់ខាតកុំធ្វើរឿង៩យ៉ាងនេះ

ប្រែសម្រួល៖ មាន រតនា ប្រភព៖ psychologytoday, helpguide