តា ហ៊្វុយសូ មិនសូវបារម្ភរឿងបិទទ្វាអង្គការដូចមុនទៀតហើយ

2015-10-01 13:11:26
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតតារាកំប្លែង ហ៊្វុយសូ បញ្ជាក់នៅព្រឹកនេះថា មិនសូវខ្វាយខ្វល់រឿងបិទទ្វាអង្គការកុមារក្រីក្ររបស់លោកទៀតទេ ព្រោះបច្ចុប្បន្នមានសប្បុរសជនមួយចំនួនចេញមុខជួយ ខណៈក្រសួងមន្ទីរមួយចំនួនក៏បានដឹងពីការលំបាក និងបង្ហាញជំហរបន្តជ្រោមជ្រែងផងដែរ។

“ឥឡូវលែងសូវភ័យទៀតហើយ។ បើពីមុនវិញខ្ញុំភ័យណាស់ក្មួយហើយ ជាពិសេសពេលជិតដាច់ខែម្ដងៗ គេមកទារថ្លៃទឹកផងថ្លៃភ្លើងផង ងាកទៅអង្ករក៏អស់រកអ្វីមកដាំបាយឱ្យក្មេងហូបមិនបាន"។តា ហ៊្វុយសូ រៀបរាប់មកកាន់ Sabayដូច្នេះ។

ទោះបីជាយ៉ាងណាលោកបន្តថា បច្ចុប្បន្នកាកបាទក្រហមកម្ពុជាបានឧបត្ថម្ភជាអង្ករប្រចាំខែ សម្រាប់ដាំបាយផ្គត់ផ្គង់ដល់ក្មេងក្រីក្រសរុបជិត ៣០ នាក់ ដែលមកទទួលយកការបណ្ដុះបណ្ដាលជំនាញសិល្បៈគ្រប់ទម្រង់ពីអង្គការរបស់លោក។ ថ្មីៗនេះសាលាក្រុងភ្នំពេញក៏បានជួសជុលកន្លែងស្នាក់សម្រាប់ក្មេងៗក្រីក្រកំពុងស្នាក់នៅក្នុងអង្គការ ដែលមួយចំនួនមកពីសហគមន៍បឹងកក់តែម្ដង។

តា ហ៊្វុយសូ បានបន្តម្យ៉ាងទៀតថា បច្ចុប្បន្នក៏មានក្មេងមួយចំនួនមានសមត្ថភាពរកចំណូលបានខ្លះដែរសម្រាប់បង់ទឹកភ្លើងរួមមានការប្រគំតន្ត្រីលើទូកទេសចរណ៍តាមដងទន្លេមេគង្គ ឬនៅតាមផ្សាររាត្រីជាដើម។ យ៉ាងណាមិញតារាកំប្លែងរូបនេះបញ្ជាក់ទៀតថា ប្រសិនបើខែណារកចំណូលមិនបានសោះ ហើយគ្មានលទ្ធភាព ទើបលោកដាច់ចិត្តទៅជួបសុំជំនួយផ្ទាល់ពីរដ្ឋមន្ត្រីក្រសួងព័ត៌មានដោយភ្ជាប់ជាមួយវិក្កយបត្រទឹកភ្លើងផង។

តារាកំប្លែងរូបនេះអះអាងថា ចង់ឃើញក្មេងៗទាំងអស់មានកន្លែងឈរជើងត្រឹមត្រូវ ពោលគឺអាចយកជំនាញសិល្បៈ ដែលប្ដីប្រពន្ធលោកបានបង្ហាត់បង្រៀនកន្លងមក យកទៅចិញ្ចឹមជីវិតបានសម្រាប់អនាគតរបស់ពួកគេ។ លោកតាហត់នឿយ និងចង់សម្រាក ព្រោះវ័យកាន់តែចាស់ គ្មានកម្លាំងកាយដូចពីមុនទេ មានតែកម្លាំងកាយប៉ុណ្ណោះ។

ប្រសិនបើសប្បុរសជនមានបំណងជួយដល់ក្មេងៗកំពុងរស់នៅ និងរៀនសូត្រក្នុងអង្គការខាងលើអាចទាក់ទងតា ហ៊្វុយសូ ផ្ទាល់តាមរយៈលេខទូរសព្ទ ០១២ ៨៤០ ៤៤១៕