នាយ ឆើត រៀបរាប់ពីជីវិតដែលប្រឈមនឹងសេចក្ដីស្លាប់ទាំងអួលដើមក

2015-10-05 17:07:41
ចំនួនមតិ 0 | ចំនួនចែករំលែក 0

ចន្លោះមិនឃើញ

នាយ ឆើត បានពោលរៀបរាប់ទាំងអួលដើមក ពីជីវិតដែលជួបការលំបាកមានព្រឹកខ្វះល្ងាច ជាពិសេសប្រឈមនឹងសេចក្ដីស្លាប់ ព្រោះតែជាតិសុរា ចូលក្នុងខ្លួនរាល់ថ្ងៃគ្មានថ្ងៃលស់។ នេះបើតាមការរៀបរាប់របស់ នាយ ឆើត ក្នុងកម្មវិធី "តុបំភ្លឺ" ថ្មីៗនេះ។

ពៅ គីសាន់ ក្នុងកម្មវិធី "តុបំភ្លឺ" របស់ MyTV

“រាល់ថ្ងៃបងធ្វើការនៅ ផ្ទះមាន់ស្រែមួយកន្លែង ជាមេការ ហើយប្រឈមមុខនឹងសេចក្ដីស្លាប់ណាស់ ផឹកស្រារាល់ថ្ងៃ ដើម្បីលុយធីបយកមកចិញ្ចឹមប្រពន្ធកូន... បើគិតតែប្រាក់ខែ បានត្រឹមរួចថ្លៃផ្ទះជួលប៉ុណ្ណោះប៉ុន្តែបានភ្ញៀវដែលគេស្រលាញ់រាប់អាន គេហៅមកកំដរផឹកស្រា ហើយហុច 10$ 20$ គ្រាន់បានរួចថ្លៃម្ហូបខ្លះៗដែរ" ។នាយឆើត ថ្លែង។

តារានិយមសម្ដែងជាតួចិត្តអាក្រក់ ថ្លែងពីជីវិតលើវិថីសិល្បៈមួយនេះថា មិនបានជួយលោកឲ្យមានជីវភាពប្រសើរនោះឡើយ។ បើនិយាយពីឈ្មោះ លោកប្រាប់ថាទៅដល់ទីណាក៏គេស្អប់ដែរ ប៉ុន្តែប្រិយមិត្តមិនបានដឹងពីចិត្តពិតប្រាកដរបស់លោកឡើយ។

" មិត្តខ្ញុំគេថា ខ្ញុំប្រឡូកសិល្បៈយូរហើយ ម៉េចមិនមានដូចគេ...ពិបាកដែរ ការថតរឿងរបស់ខ្ញុំ ធម្មតាបើគេបាន 1តម្លឹង ខ្ញុំបានត្រឹម 5ជី បើគេបាន 5ជី ខ្ញុំបាន ប៉ុន្មានហ៊ុនតែប៉ុណ្ណោះ។ ហើយបើខ្ញុំសុំតវ៉ាគេ គេច្បាស់ជាជួលអ្នកផ្សេង ចឹងខ្ញុំមិនអាចតវ៉ាបានទេ រាល់ថ្ងៃជីវភាពខ្ញុំបានត្រឹមតែម៉ារស់ៗ"។ នាយ ឆើត បន្ថែម។

ពៅ គីសាន់ ហៅ នាយ ឆើត មិនអាចប្រកបរបរសិល្បៈតែមួយមុខឡើយ ក្នុងនាមជាមេគ្រួសារដែលមាន ម្តាយ បងប្អូន និងកូន នៅក្នុងបន្ទុក ។ នាយ ប្រាប់ថា ត្រូវរ៉ាប់រងជាច្រើនទាំងថ្លៃផ្ទះជួលផង ទឹកភ្លើង ម្ហូបអាហារ។ មុននឹងក្លាយជាមេការ នាយប្រាប់ថាធ្លាប់ ឆ្លៀតទៅរត់ម៉ូតូឌុប ធ្លាក់ស៊ីក្លូ លក់ទឹកត្រី បើកឡានឲ្យគេ... ជាដើម។

ទោះបីជាជីវិតមិនបានធូរធារដូចគេ នាយឆើត នៅតែសប្បាយចិត្តពេលដែលឃើញកូនៗលោកទាំងអស់ដើរដោយគន្លងធម៌ មិនសេពនឹងគ្រឿងញៀន ផ្តេសផ្តាស ហើយចេះគិតគូរដល់នាយ។ លោកប្រាប់ថា ស្លាប់ទៅបិទភ្នែកជិតហើយ ៕

អត្ថបទ៖ ថា ម៉ាលីដា