ចូលរួមត្រេកអរទាំងអស់គ្នា តារាកម្ពុជា ជាប់ពាន១ទៀតហើយនៅហុងកុង

2014-10-18 16:09:41
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក យិត មាសឧស្សាហ៏ ហៅ Edwin តារាម៉ូដែលរបស់ប្រទេសកម្ពុជា ដែលត្រូវបានបញ្ជូនទៅចូលរួមប្រកួតក្នុងកម្មវិធី "Mr Asia Contest” ពិភពលោកនៅទីក្រុងហុងកុង កាលពីចុងខែកញ្ញា ឆ្នាំ ២០១៤នោះ ពេលនេះដឹងលទ្ធផលហើយ ដោយលោកទទួលបានរង្វាន់ជាតារាញញឹមស្រស់ជាងគេ “ Mr. Smiley Award in Mister Asia Contest 2014 ”។

បើតាមការឲ្យដឹងពីលោក ម៉ែន និមលរតន៍ ប្រធានក្រុមបង្ហាញម៉ូដ Sun Super Model Cambodia បានឲ្យដឹងថា ការប្រកួត"Mr Asia Contest” បានបញ្ចប់ហើយ កាលពីថ្ងៃទី១៧ តុលា ម្សិលមិញនេះ ដោយកម្មវិធីបានចាប់ផ្ដើមតាំងពីថ្ងៃ ទី២២ ខែកញ្ញា ឆ្នាំ ២០១៤។

ជាលទ្ធផល គឺលោក Edwin របស់កម្ពុជាយើង ទទួលបានរង្វាន់ជា តារាញញឹមស្រល់ជាងគេ “ Mr. Smiley Award in Mister Asia Contest 2014”។ ចំណែកប្រទេសដែលជាប់លេខ១ និង លេខ២ បានទៅលើប្រទេសចិន និង លេខ ៣ បានទៅលើប្រទេស ភូមា។

កាលពីពេលថ្មីនេះ កញ្ញា នូ ទឹមស្រីនៀត ទើបឈ្នះជយលាភីផ្នែកប្រជាប្រិយ (Miss Popular Vote Award) ក្នុងកម្មវិធី Miss Grand International ពីប្រទេសថៃ ដោយទទួលបានពានរង្វាន់មួយ រួមជាមួយប្រាក់រង្វាន់អមជយលាភីផង។ សម្រាប់លោក ម៉ែន និមលរតន៍ បានលើកឡើងថា នេះជាមោទនភាពថ្មីមួយទៀតរបស់ ប្រទេសកម្ពុជា ក៏ដូចជាក្រុមម៉ូដែលរបស់លោក ព្រោះតាមរយៈកម្មវិធីមួយនេះ បានធ្វើឲ្យពិភពលោកកាន់តែស្គាល់ប្រទេសកម្ពុជាមួយកម្រិតថែមទៀត។

កម្មវិធី “Mister Asia Contest ” ធ្វើឡើងដើម្បីលើកស្ទួយវិស័យសិល្បៈនៅ តំបន់អាស៊ី។ ជាគោសការណ៍ប្រទេសមួយ អាចបញ្ជូនបេក្ខជនតែម្នាក់ប៉ុណ្ណោះ ទៅចូលរួមប្រកួត "Mr Asia Contest” កម្រិតពិភពលោក តាមរយៈការប្រកួតជ្រើសរើសក្នុងប្រទេសរបស់ខ្លួន ប៉ុន្តែដោយឆ្នាំនេះប្រទេសមួយចំនួនអវត្តមាន អ្នករៀបចំបានអនុញ្ញាត្តឲ្យប្រទេសខ្លះអាចបញ្ជូនតារាលើសពី ម្នាក់ទៅចូលរួមបាន ។ សម្រាប់ប្រទេសកម្ពុជា នេះជាឆ្នាំទី១ហើយដែលបានចូលប្រកួត។ "Mr Asia Contest 2014 ” ពិភពលោក ឆ្នាំនេះ បានធ្វើនៅទីក្រុងហុងកុង និងចិន ដោយបានចាប់ផ្ដើមពីថ្ងៃ ទី២២ ខែកញ្ញា ឆ្នាំ ២០១៤ ដល់ថ្ងៃទី១៧ តុលា ឆ្នាំ ២០១៤ ក្នុងនោះប្រទេសដែលចូលរួម មានចំនួន១០ប្រទេស ។

លោក Edwin ត្រូវបានទៅចូលរួមប្រកួតតាមរយៈ FX Entertainment សហការជាមួយ Hamsa Entertainment Cambodia ។ លោកនឹងត្រឡប់មកប្រទេសកម្ពុជាវិញនៅថ្ងៃទី១៩ តុលា ឆ្នាំ ២០១៤ នេះ៕

អានអត្ថបទ៖ ៤បទនេះ សាច់ភ្លេងដូចគ្នា តើមួយណាពីរោះជាង? អានអត្ថបទ៖តារាខ្មែរ-កូរ៉េ ប៉ះគ្នារំជួលអារម្មណ៍យុវវ័យយប់មិញ! អានអត្ថបទ៖ប្រជុំតារាល្បីៗ កម្ពុជា-កូរ៉េ ស្តាតអូឡាំពិកថ្ងៃ ១៦ តុលាខានស្អែក!

អត្ថបទ៖ ខុត សីហា