តា ហ៊្វុយសូ រួមជាមួយនិស្សិត១ក្រុម យកអំណោយជូនមន្ទីរពេទ្យគន្ធបុប្ផា

2015-10-23 21:39:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ទឹកប្រាក់ចំនួន២លានរៀលត្រូវបានលោក ហ៊្វុយសូ រួមជាមួយនិស្សិតមួយក្រុមបានយកជូនមន្ទីរពេទ្យគន្ធបុប្ផា កាលពីព្រឹកមិញ។

ទឹកប្រាក់ខាងលើ ជាផ្នែកមួយបានមកពីការប្រគំតន្ត្រីសប្បុរសធម៌នៃក្ដីសង្ឃឹម ដែលរៀបចំដោយក្រុមនិស្សិតស្ម័គ្រចិត្តមួយក្រុមកាលពីដើមខែតុលាកន្លងទៅនៅវិទ្យាស្ថានបច្ចេកវិទ្យាកម្ពុជា ដើម្បីស្វែងរកប្រាក់មកជួយដល់ សមាគមចលនាវប្បធម៌ជាតិដើម្បីកុមារកំព្រាក្រីក្រ ហៅកាត់ថា NACOPCA របស់លោកតា ហ៊្វុយសូ។ នេះបើតាមការបញ្ជាក់ ពីលោក សួន តារា ហៅ Rai O ដែលជាអ្នកសម្របសម្រួល។

លោកសួន តារា បានប្រាប់ថា ទឹកប្រាក់ប្រមូលបានពីការប្រគំតន្ត្រីសប្បុរសធម៌នៃក្ដីសង្ឃឹមកាលពីពេលកន្លងទៅ មានរហូតដល់ទៅជិត៥ពាន់ដុល្លារ ដោយបានបែងចែកទិញសម្ភារសិក្សា ក៏ដូចរបស់របរប្រើប្រាស់ប្រចាំថ្ងៃ ជូនដល់អង្គការ តា ហ៊្វុយសូ និងមួយចំណែកទៀត ជូនទៅមន្ទីរពេទ្យគន្ធបុប្ផា ។ ក្នុងនោះដែរទឹកប្រាក់ដែលសល់ពី ការចំណាយមានចំនួន ៩ ៤៩២ ៦០០រៀល និង ១ ៨៩៩ ដុល្លារ សម្រាប់តម្កល់ជូនអង្គការ តា ហ៊្វុយសូ ផងដែរ។

មូលហេតុដែលនាំឲ្យក្រុមនិស្សិតមួយក្រុមខាងលើ ប្រមូលគ្នារៀបចំការប្រគំតន្ត្រីសប្បុរសធម៌ជួយដល់ អង្គការ តា ហ៊្វុយសូ និង ឈានដល់បានមកចែករំលែកដល់មន្ទីរពេទ្យបុប្ផានេះ ត្រូវបានលោក សួន តារា បញ្ជាក់ប្រាប់ថា ដោយសារតែក្រុមរបស់លោកបានឃើញ ពីអង្គការមួយនេះ កំពុងជួបការខ្វះខាតខ្លាំង ។

តំណាងក្រុមនិស្សិតរូបនេះបានឲ្យដឹងបន្ថែមទៀតថា ការប្រគំតន្ត្រីសប្បុរសធម៌កន្លងទៅមានតារាចម្រៀងជាច្រើនចូលរួមក្នុងនោះមានដូចជា លោក ឆន សុវណ្ណារាជ, កញ្ញា លាង សុផាឡែន,លោក ប៊ុត សីហា, លោក ឈុន វត្ថា កញ្ញា សាមុត ស្រីកា លោក វ៉ាន់ ផល្លី កញ្ញា កែវ សុបញ្ញា លោក ដា សក្កដា កញ្ញា នីគី នីគី និង សិល្បករ សិល្បៈការិនីជាច្រើនរូបទៀត។ ជាមួយគ្នានោះក៏មាន ការសម្ដែងទម្រង់សិល្បៈរបាំបុរាណ ប្រពៃណីនិងល្ខោនបាសាក់ ការសម្ដែងក្បាច់គុនបុរាណខ្មែរ ល្បែងកម្សាន្ត និង សកម្មភាពផ្សេងៗទៀត ជាច្រើនផងដែរ ។ ក្រុមសិល្បករសិល្បៈការិនី អ្នកទាំងអស់ បានស្ម័គ្រចិត្តចូលរួម ដោយមិនគិតប្រាក់ឡើយ។

លោកតា ហ្វុយសូ បានលើកឡើងថា មួលហេតុដែលនាំឲ្យលោកសម្រេចយកប្រាក់មួយចំណែកមកជូនមន្ទីរពេទ្យគន្ធបុប្ផាដែលកំពុងតែខ្វះខាតមួយនេះ ក៏ព្រោះតែលោកចង់ចែករំលែកសេចក្ដីស្រលាញ់ ដល់មន្ទីរពេទ្យមួយនេះ ដោយបំណងមួយនេះលោកគិតជាយូរមកហើយ។ តារាកំប្លែងរូបនេះថ្លែងបន្តថា ទោះបីជាទឹកប្រាក់នេះ វាមានចំនួនតិចតួចក្ដី ប៉ុន្តែលោកចង់បង្ហាញថា អង្គការរបស់លោកក៏ដូចជាក្មេងៗក្នុងអង្គការទាំងអស់ មានទឹកចិត្តចង់ជួយដល់មន្ទីរពេទ្យសប្បុរសធម៌មួយនេះ ក្នុងនាមជាខ្មែរដូចគ្នា ។

លោក ស៊ូ សាវ៉ាង ហៅតា ហ៊្វុយសូ បានបោះបង់ការងារសិល្បៈដែលធ្លាប់តែមានមុខលើឆាកតន្ត្រី មកបង្កើតអង្គការ NACOPCA ឡើងនៅឆ្នាំ២០០០ ដោយអង្គការមួយនេះទទួលយកតែកុមារកំព្រា ឬកុមារដែលក្រីក្រគ្មានលទ្ធភាពទៅសាលារៀន ក្នុងចន្លោះពី អាយុ៦ឆ្នាំ រហូតដល់ទៅ១៨ឆ្នាំ មកបង្រៀនសិល្បៈរបាំគ្រប់ប្រភេទ ដូចជាតារាសម្ដែងខារ៉ាអូខេ ពិធីករ បង្រៀនភាសា អង់គ្លេស និង ចំណេះដឹងទូទៅជាដើម។

ដំបូងឡើយអង្គការរបស់លោក មានអង្គការអន្តរជាតិមួយផ្ដល់ជំនួយ ប៉ុន្តែក្រោយពីផ្ដល់បានត្រឹម២ឆ្នាំ ក៏ដាច់ទៅវិញ។ បច្ចុប្បន្នមិនមានជំនួយណាក្រៅពីសប្បុរសជនក្នុងស្រុកនោះឡើយ ។ ចំណូលធំដែលបានមកប្រចាំខែ គឺការដើរសម្ដែងសិល្បៈនៅក្នុងកម្មវិធីផ្សេង ក្នុងនោះក្រុមសិល្បៈអង្គការរបស់លោក បានសម្ដែងជាប្រចាំនៅផ្សាររាត្រី ជារៀងរាល់សប្ដាហ៍ ដោយទទួលបាន៤០០ដុល្លារក្នុងមួយខែ តែលោកត្រូវចំណាយខ្ទង់៨០០ដុល្លារ ក្នុងមួយខែ លើការហូបចុង ទឹកភ្លើង និង មធ្យោបាយធ្វើដំណើរទៅសាលារៀនជាដើម។

កន្លងមក NACOPCA ធ្លាប់បានជួបវិបត្តិហិរញ្ញវត្ថុជាខ្លាំង ដោយមានពេលខ្លះ តា ហ៊្វុយសូ ធ្លាប់បានយកប្លង់ផ្ទះ ដាក់ធានាគារ ដើម្បីយកប្រាក់មកបង់ថ្លៃទឹកភ្លើងក៏មាន។ ថ្មីៗនេះបន្ទាប់ពីបណ្ដាញសារព័ត៌មានមានក្នុងស្រុកចេញផ្សាយពី ការខ្វះខាត់ជាបន្តបន្ទាប់មក អង្គការរបស់លោក មានសប្បុរសជន ថ្នាក់ដឹកនាំ សិស្សនិស្សិត និងសិល្បករ សិល្បការិនី នាំគ្នាមកបន្តជួយជ្រោមជ្រែងជាបន្តបន្ទាប់ បច្ចុប្បន្នលែងជួបបញ្ហាដូចមុនទៀតហើយ៕