ស៊ីម៉ាក់ សម្រេចកសាងកីឡដ្ឋានផ្ទាល់ខ្លួនក្នុងឆ្នាំក្រោយនៅកំពង់ឆ្នាំង
- 2015-10-27 14:04:40
- ចំនួនមតិ 0 | ចំនួនចែករំលែក 0
ស៊ីម៉ាក់ សម្រេចកសាងកីឡដ្ឋានផ្ទាល់ខ្លួនក្នុងឆ្នាំក្រោយនៅកំពង់ឆ្នាំង
ចន្លោះមិនឃើញ
ក្លិបបាល់ទាត់មជ្ឈមណ្ឌលកម្ចាត់មីនកម្ពុជា( ស៊ីម៉ាក់) នឹងមានកីឡដ្ឋានផ្ទាល់ខ្លួននារដូវកាល ២០១៦ ដែលគ្រោងធ្វើក្នុងបរិវេណហ្វឹកហាត់របស់ពួកគេនៅខេត្តកំពង់ឆ្នាំង និងដាក់ឈ្មោះថា កីឡដ្ឋានក្លិបបាល់ទាត់កម្ចាត់មីនកម្ពុជា។
ក្រុមបាល់ទាត់កម្ចាត់មីនកម្ពុជា(ស៊ីម៉ាក់) រូបថត៖ ស៊ីម៉ាក់
ឯកឧត្ដម មួន វាសនា អគ្គលេខាធិការក្លិបបាល់ទាត់ស៊ីម៉ាក់បានឲ្យដឹងថា លោក ហេង រតនា ប្រធានក្លិបបាល់ទាត់ស៊ីម៉ាក់បានជួបពិភាក្សាគ្នារួចរាល់ជាមួយដៃគូក្រុមហ៊ុនជប៉ុន ដែលជួយឧបត្ថម្ភក្នុងការសាងសង់កីឡដ្ឋាន ព្រមទាំងគ្រោងចុះត្រូវពិនិត្យទីតាំងនាខែធ្នូ ឆ្នាំ២០១៥ខាងមុខនេះ។ ស្ថិតក្នុងផែនការ នឹងដាក់ឈ្មោះទីលានបាល់ទាត់ថ្មីនេះថា កីឡដ្ឋានក្លិបបាល់ទាត់មជ្ឈមណ្ឌលកម្ចាត់មីនកម្ពុជា(ស៊ីម៉ាក់)។
អគ្គលេខាធិការរូបនេះបន្តថា ក្លិបបានស្នើដល់ម្ចាស់ជំនួយសុំសាងសង់កីឡដ្ឋានស្មៅធម្មជាតិ ប៉ុន្តែដៃគូអ្នកឧបត្ថម្ភមិនទាន់ផ្ដល់ចម្លើយនៅឡើយ ហើយក៏មិនទាន់ប្រាប់ពីចំនួនទឹកប្រាក់ក្នុងការជួយនេះដែរ។ ស្ថិតក្នុងគម្រោងក្លិប នឹងសាងសង់កីឡដ្ឋានផ្ទាល់ខ្លួនឲ្យបានរួចរាល់ មុនការប្រកួតលីកកំពូលរបស់កម្ពុជាចាប់ផ្ដើមរដូវកាល២០១៦។
ក្លិបបាល់ទាត់ស៊ីម៉ាក់អាចបន្តលេងនៅលីកកំពូលរបស់កម្ពុជារដូវកាល ២០១៦ ក្រោយប្រកួតកាត់សេចក្ដីយកឈ្នះក្រុមគីរីវង់សុខសែនជ័យ ៣-១ នៅពហុកីឡដ្ឋានជាតិកាលពីពេលកន្លងទៅ។ ចប់រដូវកាល២០១៥ ក្លិបនេះឈរនៅលេខរៀងទី៩ ក្នុងតារាងមាន១៧ពិន្ទុឆ្លងកាត់ការប្រកួតពីរជើងមាន ២២ប្រកួត៕
អត្ថបទ៖ស្រី សុវណ្ណដារ៉ា