គ្រូកម្ពុជាគិតសំខាន់ជម្រុះ World Cup ឯគ្រូប្រ៊ុយណេគិតសំខាន់ពាន Suzuki Cup 2016
- 2015-11-03 17:55:58
- ចំនួនមតិ 0 | ចំនួនចែករំលែក 0
គ្រូកម្ពុជាគិតសំខាន់ជម្រុះ World Cup ឯគ្រូប្រ៊ុយណេគិតសំខាន់ពាន Suzuki Cup 2016
ចន្លោះមិនឃើញ
គ្រូបង្វឹកក្រុមជម្រើសជាតិកម្ពុជាទំនងជាប្រើប្រាស់កីឡាករសំខាន់ៗច្រើនសម្រាប់ការប្រកួតយប់នេះដើម្បីត្រៀមខ្លួនជម្រុះបាល់ទាត់ពិភពលោកនាពេលខាងមុខ ប៉ុន្តែគ្រូបង្វឹកបាល់ទាត់ជម្រើសជាតិប៊្រុយណេទំនងជាប្រើប្រាស់កីឡាករវ័យក្មេងច្រើនដើម្បីត្រៀមខ្លួនពាន Suzuki Cup នៅឆ្នាំ២០១៦។ នេះជាការឲ្យដឹងពីគ្រូទាំងពីរមុនពេលក្រុមរបស់ខ្លួនប៉ះគ្នាវេលាម៉ោង៦:៣០នាទីល្ងាចនេះសម្រាប់ការប្រកួតមិត្តភាពអន្តរជាតិ។
លោក Mike Wong គ្រូបង្វឹកប៊្រុយណេ
នៅសន្និសីទកាលពីព្រឹកមិញ លោក Mike Wong ជនជាតិសិង្ហបុរីបាននិយាយថា ក្រុមរបស់លោកបានត្រៀមខ្លួនជាច្រើនមកសម្រាប់ការប្រកួតមិត្តភាពកន្លងមក និងបានកោះហៅកីឡាករវ័យក្មេងជាច្រើនចូលជម្រើសជាតិសម្រាប់ត្រៀមប្រកួតក្នុងព្រឹត្តិការណ៍Suzuki Cup ឆ្នាំ២០១៦។
លោកថា ៖«ការប្រកួតល្ងាចនេះ ខ្ញុំមិនគិតសំខាន់លើឈ្នះឬចាញ់ទេ តែអ្វីដែលសំខាន់គឺស្វែងរកគុណភាពលេងឲ្យបានល្អ។ បើយើងសំណាងបានឈ្នះ តែបើលេងមិនល្អក៏មិនកើតដែរ សំខាន់គឺលេងឲ្យបានល្អ»។ លោកគិតថា ក្រុមកម្ពុជាមានកម្រិតគុណភាពល្អជាងដោយសារចំណាត់ថ្នាក់បាល់ទាត់ពិភពលោក FIFA ខ្ពស់ជាងប៊្រុយណេ ហើយប្រកួតចុងក្រោយជាមួយសិង្ហបុរី ក្រុមកម្ពុជាធ្វើបានល្អណាស់។
ចំណែកលោកគ្រូបង្វឹកជម្រើសជាតិកម្ពុជា Lee Tae Hoon បានលើកឡើងថា លោកបានកោះហៅកីឡាករវ័យក្មេងច្រើនចូលរូមជម្រើសជាតិកម្ពុជាដើម្បីមើលពីចក្ខុវិស័យវែងឆ្ងាយសម្រាប់ព្រឹត្តិការណ៍សំខាន់ៗនៅពេលខាងមុខ។ ទោះយ៉ាងណាសម្រាប់ការប្រកួតល្ងាចនេះលោកទំនងជាប្រើប្រាស់កីឡាករសំខាន់ៗជួរមុខច្រើន។
លោក Lee Tae Hoon គ្រូបង្វឹកជម្រើសជាតិកម្ពុជា
លោកថា ៖«ការប្រកួតល្ងាចនេះ ខ្ញុំគិតជាសំខាន់ដល់ការប្រកួតជម្រុះ World Cup នាពេលខាងមុខ អីចឹងខ្ញុំនឹងដាក់កីឡាករសំខាន់ៗឲ្យលេងបានច្រើន»។ លោកមិនបានបញ្ជក់ថាតើសមាជិកមកពីក្រុមបឹងកេតអង្គរចូលលេងឬយ៉ាងណានោះទេ ប៉ុន្តែលើកឡើងថា ពួកគេត្រូវការពារសម្រាកដោយសារទើបមកពីប្រកួតពាន Toyota Mekong Club Championship នៅប្រទេសឡាវ។
ក្រុមបាល់ទាត់ជម្រើសជាតិកម្ពុជានឹងបើកទ្វារពហុកីឡដ្ឋានជាតិទទួលស្វាគមន៍ក្រុមភ្ញៀវប៊្រុយណេវេលាម៉ោង៦:៣០នាទីល្ងាចនេះដែលមានផ្សាយផ្ទាល់ដោយទូរទស្សន៍ BTV។
សូមបញ្ជាក់ដល់អ្នកគាំទ្របាល់ទាត់ជម្រើសជាតិកម្ពុជាថា វេលាម៉ោង៤រសៀលថ្ងៃនេះ នឹងមានពិធីដង្ហែក្រុមបាល់ទាត់ជម្រើសជាតិកម្ពុជាដែលមានក្រុមឆៃយុំា ពីសណ្ឋាគារ Rose Emerald ឆ្ពោះទៅពហុកីឡដ្ឋានជាតិ៕
អត្ថបទ៖ ជាន ចាន់រ៉ា