គ្រូប្រ៊ុយណេសរសើរកម្ពុជាលេងល្អ តែមានចំណុចខ្វះខាតមួយកន្លែង
- 2015-11-04 18:27:49
- ចំនួនមតិ 0 | ចំនួនចែករំលែក 0
គ្រូប្រ៊ុយណេសរសើរកម្ពុជាលេងល្អ តែមានចំណុចខ្វះខាតមួយកន្លែង
ចន្លោះមិនឃើញ
លោក Mike Wong គ្រូបង្វឹកក្រុមជម្រើសជាតិប្រ៊ុយណេ បាននិយាយសរសើរការសហការគ្នារបស់កីឡាករកម្ពុជាក្នុងការប្រកួតកាលពីល្ងាចម្សិលមិញនេះ ប៉ុន្តែទន្ទឹមនឹងចំណុចល្អនេះដែរ លោកក៏បានឃើញភាពអវិជ្ជមានមួយដែរគឺតំបន់ការពាររបស់កម្ពុជានៅមិនទាន់ល្អនៅឡើយទេ។
ក្រុមបាល់ទាត់ជម្រើសជាតិកម្ពុជាបានយកឈ្នះក្រុមប្រ៊ុយណេដោយលទ្ធផល ៦-១ ក្នុងការប្រកួតមិត្តភាពកម្ដៅសាច់ដុំនៅពហុកីឡដ្ឋានជាតិអូឡាំពិក ដោយកីឡាករ ប្រាក់ មុន្នីឧត្តម ២គ្រាប់ , កែវ សុខផេង ២គ្រាប់ , វ៉ា សុខថន រកបាន១គ្រាប់និងស៊ើយ វិសាលមួយគ្រាប់។ ខណៈដែល១គ្រាប់របស់ប្រ៊ុយណេ ធ្វើបានដោយកីឡាករ Bin Ali Rahman ។
ក្នុងសន្និសីទកាសែតក្រោយចប់ការប្រកួត លោក Mike Wong បានបង្ហាញអារម្មណ៍និងអ្វីដែលលោកបានឃើញចំពោះទម្រង់លេងរបស់កម្ពុជាថា៖ “កម្ពុជាលេងល្អ បញ្ជូនបាល់ឱ្យគ្នាច្បាស់ៗ។ ពួកគេបានត្រៀមខ្លួនរួចជាស្រេចសម្រាប់ការប្រកួតនេះ។ ចំណុចដែលខ្ញុំឃើញខ្វះខាតគឺត្រង់តំបន់ការពារ។ ដូចដែលយើងឃើញហើយថា មួយគ្រាប់ដំបូងរបស់ប្រ៊ុយណេគឺបានមកពីការធ្វេសប្រហែសរបស់ខ្សែការពារកម្ពុជាប៉ុណ្ណោះ”។
កីឡាករកម្ពុជា
ចំពោះលទ្ធផលចាញ់កម្ពុជាចាស់ដៃនេះដែរ គ្រូបង្វឹកខាងលើបាននិយាយដែរថាលោកមិនសូវជាបារម្ភនោះទេ ដោយសារតែការប្រកួតនេះជាប្រកួតមិត្តភាព ណាមួយក្រុមប្រ៊ុយណេផ្ដោតសំខាន់ទៅលើការជ្រើសរើសកីឡាករក្មេងៗ ដើម្បីត្រៀមយកទៅហ្វឹកហាត់បន្ថែម រង់ចាំប្រកួតពានរង្វាន់នៅប៉ុន្មានឆ្នាំខាងមុខទៀតប៉ុណ្ណោះ។ ក្រុមបាល់ទាត់ជម្រើសជាតិប្រ៊ុយណេទើបតែរីកចម្រើនត្រឹមរយៈពេល២ឆ្នាំចុងក្រោយនេះទេ ដូច្នេះចាញ់ឬឈ្នះគឺជាបទពិសោធន៍សម្រាប់កីឡាករទាំងអស់៕
អត្ថបទ៖ មុន្នី រម្យ