បទសម្ភាសន៍ពិសេសជាមួយលោកទេព រិនដារ៉ូ

2015-11-10 17:10:54
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ទេព រិនដារ៉ូ តារាសម្ដែងជើងចាស់ដែលមិនមានពលរដ្ឋខ្មែរណាមិនស្គាល់ឈ្មោះបានស្ម័គ្រចូលមកបើកទំព័របទសម្ភាសន៍ពិសេសរបស់ Sabay ដោយឆ្លើយតបនឹងសំនួរមួយចំនួនរបស់ខ្ញុំដែលសាកសួរជំនួសមិត្តអ្នកអាន។

នៅចំពោះមុខខ្ញុំ តារារូបនេះមិនបានប្រែប្រួលរូបសម្រស់ជាដុំកំភួនទេបើធៀបទៅ នឹងរូបភាពលើផ្ទាំងសំពត់សកាលពីជាង១០ឆ្នាំមុន។ ចាស លោកទេពរិនដារ៉ូប្រលូកជាមួយអាជីពសម្ដែងជាង២០ឆ្នាំហើយ។ រយៈពេលដ៏វែងនេះ ជីវិតការងារ និងភាពផ្ទាល់ខ្លួនរបស់គាត់ ត្រូវបានបណ្ដាញព័ត៌មាននានាបរិយាយជាញឹកញាប់ស្របទៅតាម ការចង់ដឹងជាទូទៅរបស់អ្នកគាំទ្រ ប៉ុន្តែនៅក្នុងបទសម្ភាសន៍ពិសេសនៅពេលនេះ ខ្ញុំសន្យាថា នឹងមានចំណុច សំខាន់មួយចំនួនដែលអ្នកអានមិនបានដឹងពីមុនមក។

Sabay៖ ជម្រាបសួរបង! អរគុណណាស់ដែលបងស្ម័គ្រចូលមកកាន់បទសម្ភាសន៍ពិសេស! ទេព រិនដារ៉ូ៖ បាទអរគុណធារី! ខ្ញុំរីករាយក្នុងនាមជាសិល្បករម្នាក់ អ្វីដែលអាចចែករំលែកខ្ញុំនឹងធ្វើ!

Sabay៖ ចាស បទសម្ភាសន៍នៅពេលនេះចែកចេញជា ៣ ប្រធានបទសំខាន់គឺ ពិសោធន៍អាជីព ជីវិតផ្ទាល់ខ្លួន និងទស្សនៈក្នុងនាមជាសិល្បករមួយរូប។

រូបថតៈប៉ែន ប៊ុនថាល់

ពិសោធន៍ អាជីព

Sabay៖ គេដឹងជាទូទៅថា អាជីពសិល្បៈ ពិសេសសិល្បៈសម្ដែងមិនមែនទទួលផលច្រើនដូចប្រទេសជឿនលឿនឯទៀត ទេ តែ ហេតុអ្វីបានជាបងរ៉ូប្រឡូក និង វិស័យនេះបានយូរជាងគេ?

ទេព រិនដារ៉ូ៖ ខ្ញុំទទួលស្គាល់ថាយើង រកចំណូលបានតិច ធៀបជាមួយសិល្បករប្រទេសគេ តែនិយាយស្មោះសម្រាប់ខ្ញុំ ខ្ញុំមានជីវភាពធូរស្រាលអាចនិយាយថា គ្រាន់បើជាងមុនដោយសារតែ សិល្បៈនេះហើយ សម្រាប់ខ្ញុំសិល្បៈគឺមានតម្លៃ ជាអាជីពដែលខ្ញុំមិនគិតថាបោះបង់ចោលទេ!

Sabay៖ ទោះយ៉ាងណា រហូតដល់ពេលនេះភាពយន្ត និង វីដេអូ ខ្មែរនៅតែមិនទទួលបានការគាំទ្រពិតប្រាកដនៅឡើយចុះនៅក្នុងការងារសម្ដែង និមួយៗបងធ្លាប់មានចំណុច ណាមួយមិនពេញចិត្តចំពោះផលិតផលដែលចេញមកដែរទេ?

ទេព រិនដារ៉ូ៖ គឺមានច្រើនរាប់មិនអស់ទេ! សិតសក់មិនសមអាវក៏មាន អាវមិនសមសាច់រឿងក៏មាន ប៉ារូលមិនទំនងក៏មាន និយាយទៅមានច្រើនជាញឹកញាប់ដែលខ្ញុំត្រូវធ្វើទាំងមិនពេញចិត្ត។ ខ្ញុំមិនដែលនិយាយទេតែពេលនេះបង្ហើបប្រាប់ចុះ គឺមានរឿងខ្លះ ឈុតខ្លះខ្ញុំអត់ហ៊ានមើលតែម្ដងគឺរឹងខ្លួនពេក។

Sabay៖ នេះបងសំដៅជំនាន់ទសវត្សរ៍៩០រឺបច្ចុប្បន្នកាល? ទេព រិនដារ៉ូ៖ និយាយត្រង់គឺទាំងពីរ!

Sabay៖ ឈុតឆាកទាំងនោះចេញមក ប្រាកដវាយប្រហារដល់កេរ្តិ៍ឈ្មោះរបស់បង ហេតុអ្វីបានជាបងអនុញ្ញាតអោយ ចេញកើតបើយើងមិនពេញចិត្តផង? ទេព រិនដារ៉ូ៖ ថ្ងៃណាមួយខ្ញុំនិងយក កុងត្រារបស់សិល្បករយើងបង្ហាញធារីម្ដង!តាមពិតយើងគ្មានសិទ្ធិអីទាំងអស់នៅក្នុងនោះតួនាទី យើងគឺសម្ដែង!ឯ អ្នកនិពន្ធគេមានសិទ្ធិរៀបចំគ្រប់យ៉ាង!អ្នកដឹកនាំរឿងគឺតម្រូវតាមបទនិពន្ធមានខ្លះគេ ទទួលយកយោបល់យើងក៏មាន។តែ ខ្លះគឺ គេធ្វើតាមគោលដៅរបស់ គេនេះជាចំណុចពិបាកមួយ! សួរថាហេតុអ្វីបានយើងព្រមស៊ីញេ ព្រោះនោះជាកុងត្រាទូទៅក្នុងសង្គមសិល្បៈ ខ្មែរទៅហើយ ខ្ញុំចង់និយាយថា គេក៏អញ្ចឹងយើងក៏អញ្ចឹង ខ្ញុំចង់និយាយថា នៅកន្លែងមួយ បើគ្រប់គ្នាគេទៅអស់ហើយ យើងមិន អាចចចេសអី តែម្នាក់ឯងបានទេ ! ទោះបីយ៉ាងណាយើងឃើញមានអ្នកដឹកនាំរឿងខ្មែរខ្លះដែល គាត់មានជំនាញ ពិតៗដូចជានៅខ្មែរមេគង្គ នៅមណ្ឌលព័ត៌មានស្ត្រីកម្ពុជា និងអគ្គនាយកដ្ឋានទូរទស្សន៍…ពួកគាត់មានជំនាញ បើក ចិត្តនិងធ្វើការតាមស្តង់ដារមួយ មែន។ល។

Sabay៖ បងអាចរក ឃើញទេថាអ្វីទៅជាចំណុចខ្លាំងដែលបងអាចឈរជើងរឹងមាំបានរហូត ដល់ពេលនេះនៅពេលដែលតារា រួមជំនាន់ប្ដូរអាជីពសឹងតែទាំងស្រុងទៅហើយ?

ទេព រិនដារ៉ូ៖ សំខាន់គឺខ្ញុំតស៊ូ!ធារីត្រូវដឹងថា អ្នកខ្លះគេមិនចង់ចំណាយពេលច្រើនជាមួយការងារ នេះទៀតដោយសារគេយល់ថានឿយណាយ ធុញទ្រាន់នឹងការមិនឈានទៅមុខរបស់អាជីពនេះនៅក្នុងប្រទេស យើង។ចំណែកខ្ញុំ ខ្ញុំធ្លាប់តស៊ូតាំងពីគ្រួសារមិនគាំទ្រ ខ្ញុំមិនចង់ចោល ដោយសារនិស្ស័យជាមនុស្សធ្វើអ្វីធ្វើ ប្រាកដ ហើយអ្នកនៅក្នុងវិស័យ ហ្នឹងទាំងអស់ភាគច្រើនដឹងខ្ញុំពីចំណុចហ្នឹង ទើបគាត់ចេះតែបន្តធ្វើការជាមួយម៉ោរហូត។

Sabay៖ ប៉ុន្តែភាពនៅលីវរបស់បងអាចជាបច្ច័យមួយដែរទេ? ទេព រិនដារ៉ូ៖ ហ្នឹងក៏អាចថាបាន!តែសំខាន់ខ្ញុំយល់ថាខ្លួនឯងជាមនុស្សបត់បែនតាមសម័យទាន់និងមានគោលដៅអាជីពច្បាស់ !

រូបថតៈប៉ែន ប៊ុនថាល់

ជីវិតផ្ទាល់ខ្លួន Sabay៖ និយាយដល់រឿងនៅលីវ ទោះបី បងប្រាប់បណ្ដាញព័ត៌មានជារឿយៗថាបង ឆ្អែតឆ្អន់ដោយសារប្រវត្តិជីវិតអាពាហ៍ពិពាហ៍បរាជ័យប៉ុន្តែខ្ញុំនៅតែ យល់ថាមនុស្សម្នាក់ដែលមានស្នេហាមិនគាប់ចិត្តម្ដងមិនមែនមានន័យថា ត្រូវបោះបង់ចោលជារៀង រហូតទេមែនទេបង?

ទេព រិនដារ៉ូ៖ (សើច)តាមពិតវាអញ្ចឹងមែន!តែខ្ញុំមានហេតុផលច្រើនដែលធ្វើអោយនឿយណាយមិនចង់ អោយកសាងគ្រួសារមួយបាន។ ដូចជាដឹងស្រាប់ហើយខ្ញុំមានប្អូនមានក្មួយ ក្នុងបន្ទុក ច្រើនឆ្នាំមកនេះខ្ញុំ ទុកពួកគេជាគ្រួសាររបស់ខ្ញុំ ដូចជាអ្វីដែលគ្រប់គ្រាន់សម្រាប់ជីវិតខ្ញុំហើយ។

Sabay៖ អាចរំលឹកបានទេថាអាពាហ៍ពិពាហ៍បង បរាជ័យដោយសារអ្វី? ទេព រិនដារ៉ូ៖ ប្រហែលជាដោយសារខ្ញុំរៀបការតាមការរៀបចំរបស់ចាស់ៗក៏មិន ដឹង !

Sabay៖ ចុះបងធ្លាប់មានស្នេហាដែរទេ? ទេព រិនដារ៉ូ៖…គឺ..មាន!កាលពីក្មេងៗ អាយុប្រហែល១៩ឆ្នាំ មានស្រលាញ់គេវ័យស្រករគ្នា រៀនជាមួយគ្នា ធ្លាប់ដើរលេងនឹងមានអនុស្សាវរីយ៍រំភើបអីតាមបែបយុវវ័យដែរ តែគេឥឡូវប្រហែលជាមានគូរ មានគ្រួសារអីដែរ ហើយ លែងជួបគ្នាយូរហើយ!

Sabay៖ ចុះហេតុអ្វីបងបែកគ្នា?ម្ដាយបងលោកមិនពេញ ចិត្តរឺមួយយ៉ាងណាដែរ? ទេព រិនដារ៉ូ៖ មិនមែនទាំងអស់!គឺខ្ញុំចេញទៅរៀននៅរុស្សីរឿងក៏ចប់។

Sabay៖ ម៉េចក៏បងចាត់ទុកថានោះជាស្នេហាបាន បើបងអាចបំភ្លេចបានងាយស្រួលអញ្ចឹង? ទេព រិនដារ៉ូ៖ មិនមែនងាយស្រួលប៉ុន្មានទេ ពិបាកគួរសម ខ្ញុំធ្លាប់ស្រក់ទឹកភ្នែក ហើយឈឺចាប់មិនអន់ដែរទម្រាំកាត់ចិត្តបាន។តែខ្ញុំថាអ៊ីចេះ!ស្នេហាជំនាន់ខ្ញុំ មិនមែនដូចយុវវ័យសម័យនេះទេ គឺយើងស្មោះត្រង់ចិត្តនិងចិត្ត គោរពឪពុកម្ដាយណាស់មិនដែលហ៊ានរំលងទេប្រពៃណីហើយក៏អត់មានទូរសព្ទ ទូរសារអីទំនាក់ទំនងគ្នាងាយស្រួលអញ្ចឹងដែរ ខ្ញុំមានចិត្តលើគេ គេក៏មានចិត្តលើយើង តែមិនដែលហ៊ាននិយាយថាស្រលាញ់គ្នាត្រង់ទេ ហ៊ានដើរលេងជាមួយគ្នាខ្លះគឺទៅជាក្រុមមានពួកម៉ាកបង្អាប់ទៅបង្អាប់មក។

Sabay៖ នោះជារឿងយូរហើយ !តែនៅក្រោយអាពាហ៍ពិពាហ៍ វិញ បងនៅលីវម្ដងទៀត គឺនៅ លីវរយៈពេលវែង តែក៏ មិនមែនមានន័យថាអត់មានស្នេហា ដែរមែនទេបងក្នុងអំឡុងពេលនោះ? ទេព រិនដារ៉ូ៖ (សើច)គឺមាន ខ្លះមែនមិនបដិសេធទេ តែវាអត់ចេញជាលទ្ធផលអី បានខ្ជិលរំលឹកនិយាយរួមមានលក្ខខ័ណ្ឌខ្លះដែលខ្ញុំគិតថាមិន អាចកសាងជីវិតគ្រួសារបានអញ្ចឹងក៏បែកគ្នាវិញទៅ!

Sabay៖ តែបុរសដែលក្ររៀបការនៅ ក្នុងសង្គម ខ្មែរបច្ចុប្បន្នភាគច្រើនត្រូវគេគិតថាជាប្រភេទមនុស្ស ខុសធម្មជាតិដូចជាបែរទៅស្រលាញ់ភេទដូចគ្នាអីជាដើម បងធ្លាប់គិតពីប្រការនេះដែរទេ? ទេព រិនដារ៉ូ៖ មិនត្រឹមតែគិតទេធារី !ខ្ញុំធ្លាប់ត្រូវ គេសួរពីរឿងហ្នឹងតែម្ដង….និយាយតាមត្រង់មានមនុស្សចូលចិត្តបែបណឹងគាត់មករក យើងតាម៉ងសួរចិត្តយើងអីអញ្ចឹងទៅ!

Sabay៖ គួរអោយចាប់អារម្មណ៍មែន! ចុះបងតបយ៉ាងណាវិញ? ទេព រិនដារ៉ូ៖ អ្នកខ្លះចេះតែគេចគាត់ទៅ ពេលខ្លះធ្វើដូចមិនដឹងខ្លួន តែអ្នកខ្លះត្រូវប្រឈមមុខខានមិនបានក៏ត្រូវសុំទោស និយាយជាមួយគាត់ត្រង់ៗថាយើងមិនមែន តែគេថាមិនជឿយើង គេថាគេច្បាស់ជាងយើងសាមីខ្លួនទៅទៀតក៏មាន បាទគឺមានច្រើនដែរករណីហ្នឹង។

Sabay៖ បងរ៉ូចាប់អារម្មណ៍ យ៉ាងណាចំពោះហេតុការណ៍បែបហ្នឹង ? ទេព រិនដារ៉ូ៖ មានតែហួសចិត្តនិងអស់សំណើច!តែខ្លួនយើង យើងដឹងច្បាស់ អត់អី ដែរចេះតែធ្វើធម្មតាទៅ!

Sabay៖ ជាតារាល្បីម្នាក់ បងធ្លាប់ទទួលគំនាបរឿង ស្នេហាពីស្ត្រីមានឥទ្ធិពលណាម្នាក់ទេ? ទេព រិនដារ៉ូ៖ មិនមែន អត់ទេ! តែអាច ថាជាសំណាង ខ្ញុំគុណបុណ្យឪពុកម្ដាយ ខ្ញុំជម្រាបគាត់ត្រង់ ថាខ្ញុំមិនចេះធ្វើស្រលាញ់ក្លែងក្លាយទេ គាត់ក៏យល់ហើយ ក៏អត់អីវិញ !

Sabay៖ និយាយចុះនិយាយឡើង ស្នេហានិងបងរ៉ូដូចជាចូលគ្នាអត់ចុះសោះ ចុះបងថាម៉េចចំពោះពាក្យដែល ថាបុរសពិតមិនអាចវាងបានពីចំណង់ផ្លួវភេទនោះ? ទេព រិនដារ៉ូ៖ គឹខ្ញុំ ដូចគេឯងអញ្ចឹង គឺធម្មតាជាមនុស្សប្រុស ខ្ញុំអាចស្វែងរក វិធីរំងាប់និយាយទៅគឺធម្មតាដូច គេឯង។

Sabay៖ តែបងជាតារាល្បីមួយរូប ដូចជាមិនងាយស្រួលទេមែនទេ ក្នុងការស្វែងរកសេវាបែបដោះដូរនៅខាងក្រៅ?ណាមួយចុះបើបងជ្រុលជាមានកូនវិញ? ទេព រិនដារ៉ូ៖ ជាតារា តែខ្ញុំទទួលស្គាល់ថាខ្ញុំនៅតែជាបុរសធម្មតាម្នាក់ក្នុងរឿង ហ្នឹង!ហើយរឿង កូន ប្រសិនបើមានហេតុភេទហ្នឹងមែនខ្ញុំហ៊ានទទួលខុសត្រូវ តែជឿខ្ញុំទៅរឿងហ្នឹងមិនអាចកើតមានលើខ្ញុំបានទេ!

Sabay៖ បងមិនដែលធ្វើជាឳ ពុកគេទេ ហេតុអ្វីបងអាចសម្ដែងរឿងទឹកចិត្តឳពុកបានល្អម្ល៉េះ? ទេព រិនដារ៉ូ៖ ខ្ញុំអត់ មានកូនមែន ប៉ុន្តែក្មួយទាំងបីខ្ញុំថែទាំដូចកូន បង្កើតពួកគេក៏ចាត់ទុកខ្ញុំជាឳពុកដែរ!ឯស្នាដៃក្នុង រឿង ក្រៅពីព្យាយាមខ្លួនឯង ធារីដឹងហើយរឿងហ្នឹងដឹកនាំដោយអ្នកនិពន្ធល្បីពាន់ភួងបុប្ផា គាត់ជាមគ្គុទ្ទេសក៍ដ៏ល្អ។

ទស្សនៈ ជីវិត មុនពេលបញ្ចប់បទ សម្ភាសន៍ តារាប្រុស ល្បីឈ្មោះរូប នេះបានបញ្ចេញទស្សនផ្ទាល់ខ្លួនថា យុវវ័យគួរមានអាពាហ៍ពិពាហ៍ដោយជម្រើសផ្ទាល់ខ្លួន ដោយសុំយោបល់ខ្លះពីឪពុកម្ដាយ ក៏មិនមែនមានន័យថាត្រូវតែទទួលយកអាពាហ៍ពិពាហ៍ដោយការបង្ខំចិត្ត ដែរ។ “ក្មួយ ប្រុសខ្ញុំដែលខ្ញុំទុកគេជាកូន គេក៏ទុកខ្ញុំជាប៉ា។ខ្ញុំគាំទ្រអោយគេមានស្នេហាចាត់ចែងវាសនា ខ្លួនឯង ការនៅលីវដូចខ្ញុំមិនមែនជាអ្វីដែលខ្ញុំរំពឹងអោយគេយកតម្រាប់ តាមទេ ជីវិតមនុស្សមានលក្ខខ័ណ្ឌផ្សេងគ្នា ខ្ញុំគឺផ្សេងគេគឺផ្សឹង មិនមែនអ្វីដែលខ្ញុំជ្រើសសុទ្ធតែត្រូវគួរយកតម្រាប់តាមទេ តែមនុស្សម្នាក់ៗមានហេតុផលផ្សេងៗគ្នា”៕

អរគុណបងរ៉ូសម្រាប់បទសម្ភាសន៍ពិសេសនេះ!

អត្ថបទ៖ Sabay

សូមចុចអាន៖ ជួប អ្នកលើកទង់ជាតិខ្មែរ នៅWTO (ផ្សាយជាលើកទី២) សូមចុចអាន៖ លោកស្រីធីតា ឃិះ ស្ត្រីខ្មែរដ៏ជោគជ័យ សូមចុចអាន៖ ឯកឧត្ដម ខៀវ កាញារីទ្ធ បើកទំព័រ “ឧត្ដមជនខ្មែរ”