ព្រឹទ្ធាចារ្យ ជ័យ ប៊ុនឈឿ ធូរស្រាលមួយកម្រិតក្រោយចាក់ថ្នាំគីមីបានពីរលើក

2015-11-12 21:50:01
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតអាជ្ញាកណ្ដាលលោកតាព្រឹទ្ធាចារ្យ ជ័យ ប៊ុនឈឿ បានធូរស្រាលពីជំងឺមហារីកសាច់ជើងបានមួយកម្រិតក្រោយចាក់ថ្នាំគីមីសម្លាប់មេរោគបានពីរលើកនៅមន្ទីរពេទ្យកាល់ម៉ែត្រ កាលពីពេលថ្មីៗ នេះ។

លោកតា ជ័យ ប៊ុនឈឿ កាលធ្វើជាអាជ្ញាកណ្តាល

លោកតា ជ័យ ប៊ុនឈឿ បានឲ្យដឹងថា លោកបានធូរស្រាលបានបន្តិចហើយ ថែមទាំងអាចនិយាយបាន និងដើរបានតិចៗ ទៀតផង។ គ្រូពេទ្យដែលទទួលបន្ទុកចាក់ថ្នាំជាតិគីមីសម្លាប់មេរោគមហារីកបានប្រាប់លោកតាថា ត្រូវចាក់រហូតគ្រប់ចំនួន៦ ដងទើបបានជាសះស្បើយវិញបាន ប៉ុន្តែក្រោយចាក់គ្រប់ចំនួនរួចហើយ គ្រូពេទ្យនៅតែបន្តពិនិត្យរហូតអាចសន្មតថាសភាពជំងឺមិនឈឺម្ដងទៀតទើបឈប់ចាក់ថ្នាំគីមី។

អ្នកស្រី ឈឿន សុធារី កូនស្រីទីពីររបស់លោកគ្រូ ជ័យ ប៊ុនឈឿ បានប្រាប់ឲ្យដឹងដែរថា ប្រាក់ថ្លៃចាក់ថ្នាំគីមីម្ដងចំនួន១ពាន់ដុល្លារអាមេរិក។ សម្រាប់ការចំណាយក្នុងការចាក់ពីរលើកកន្លងទៅនេះ គឺមានលោកស្រី ហ៊ុន ម៉ាណា អគ្គនាយិការនៃទូរទស្សន៍បាយ័នជាអ្នកជួយចេញទាំងស្រុង។ ក្រៅពីនេះក៏មានថ្លៃធ្វើដំណើរពីផ្ទះរបស់លោកគ្រូមកមន្ទីរពេទ្យ និងការចំណាយផ្សេងៗ លោកស្រីអគ្គនាយិការក៏បានជួយចេញដែរ។

កូនស្រីទីពីររូបនេះបន្ថែមថា អ្នកស្រីមិនទាន់ដឹង តើលោកស្រី ហ៊ុន ម៉ាណា នៅតែបន្តជួយសម្រាប់ការចាក់ថ្នាំលើកក្រោយៗ ទៀត ឬយ៉ាងណានោះឡើយ។ ចំពោះការចំណាយនៅមន្ទីរពេទ្យមិត្តភាពខ្មែរសូវៀត(ពេទ្យរុស្ស៊ី)កន្លងទៅ ក៏មានលោកជំទាវ ប៊ុន រ៉ានី ហ៊ុន សែនជួយផងដែរ៕

អត្ថបទ៖ ស្រី សុវណ្ណដារ៉ា